Чүүйэҕэ
Ахсынньы 5 күнүгэр оройуон баһылыга Николай Старостин Ходоро отчуоту нэһилиэгэр туруорда.
Чүүйэлэр 64 буолан отчуоту иһиттилэр, ыйытыылары биэрдилэр. Чүүйэнэн ааһар республикатааҕы суол хаһан асфалланарын, Арыылаах сайылыкка электро-уот хаһан тардылларын, сайылыгы сөргүтүүгэ туох былааннар баалларын, ааспыт сылга «Манчаары» кооперативка туттарбыт үүттэрин харчытын хаһан ылалларын, «Чүүйэ» МУП үлэтин-хамнаһын, Улахан Эбэ алаастан ууну ыытарга итиэннэ Хатыҥнаахха ууну аһардар ханаабаны дириҥэтиигэ туох көмө оҥоһуллуон сөптөөҕүн, уу баһар массыына суоҕунан скважина үлэтин сөргүтэри, «Хаарбах дьиэ» программа туһунан ыйыталастылар, эргэрбит уопсайдары болҕомтоҕо ылалларыгар көрдөстүлэр.
Оскуола күрүөтэ-хаһаата, миэбэлэ хаһан саҥардылларын, тех-үлэһиттэргэ хамнас төлөбүрүн, биэлсэр хаһан үлэлии кэлэрин, нэһилиэнньэ дьарыктаах буолуутун киинигэр учуокка турар дьоҥҥо кылгас болдьохтоох куурустары, дьиэ туттарга, гаас ситимин тартарарга туох көмө баарын сурастылар, культура уонна спорт 60-с эстафетатыгар «Сцена ветерана» диэн бэлиэ ахсаанын элбэтэн биэрэргэ баҕа санааларын эттилэр.
Пенсионер Евдокия Скрябина үрдүк күүрүүлээх линияны уларытыыга РЭС-тэр үлэлэрин хонтуруоллуурга, почта сырыыта мөлтөҕүнэн хаһыакка суруппакка, дьаһалта үлэтин-хамнаһын, улуус сонуннарын билбэттэрин, Улуу Кыайыы 70 сылынан кырдьаҕастарга улахан болҕомто ууруллубутун, улууска үлэ-хамнас тэтимнээхтик ыытылларын бэлиэтээтэ.
Оҕо саадын сэбиэдиссэйэ Раиса Атласова оҕо саадыгар төрдүттэн өрөмүөн үлэтэ ыытыллыбытыгар махтанна итиэннэ салгыы куукуна уонна хочуолунай өртүгэр өрөмүөнү ыытарга, оҕо оонньуур саҥа площадкатын, бааһынай хаһаайыстыба салайааччыта Аркадий Дмитриев саха ынаҕын иитиини сайыннарыыга улууска сөптөөх былааннар, хайысхалар чопчуланалларыгар туруорустулар.
Оскуола завуһа Марина Дмитриева оскуола-саад тэриллибитэ сөптөөҕүн, профсоюз бэрэссэдээтэлэ Мария Кылабысова улууска кэлэр сыл Физкультура уонна спорт сылынан биллэриллибитэ кэскиллээҕин бэлиэтээтилэр.
Тиэлигигэ
I Наахара нэһилиэгэр отчуоту истэ 30-ча олохтоох сырытта.
Газохимическэй собуоту тутуу туһунан кэпсэтии туох диэн түмүккэ кэлбитин, улуустааҕы поликлиникаҕа көрдөрүнэргэ үлэ чааһа тоҕо эрдэ бүтэрин, үүтү туттарааччыларга медицинскэй көрүүнү тоҕо Наахараҕа кииннээбэттэрин, дьахтар бырааһыгар көрдөрүнүү уочарата хаһан бэрээдэктэнэрин, нолуок тэрилтэтиттэн выписканы ылыы тоҕо төлөбүрдээҕин, оскуола үлэһиттэрин хамнастарыгар уларытыылары киллэрии туһунан ыйыталастылар.
Саҥа тутуллар хочуолунайга ититиигэ холбонорго туох көмө баарын, үрдүк күүрүүлээх электро-уот хаһан холбонорун, төлөбүр тоҕо үрдэтиллэрин сурастылар, «Манчаары» кооператив үлэтин, осеменатор хамнаһын, Хаптаҕайдааҕы комбикорм собуотун үлэтин интэриэһиргээтилэр. Сэтинньигэ Тиэлиги эҥэр бөрөлөр үөр атыырын тардыбыт түбэлтэлэрэ тахсыбытын санатан туран, хайдах бултаһар, хантан көҥүл ылары туоһуластылар.
Оҕо саадын сэбиэдиссэйэ Вера Александрова оҕо саадын төрдүттэн өрөмүөннүүрү эбэтэр саҥа оскуолаҕа оҕо саадын холбоон тутарга, бааһынай хаһаайыстыба салайааччыта Наталья Данилова сири оҥорторон сүөһү эбии аһылыгын ыһарга, суол-иис өрөмүөнүгэр көмө оҥоһулларыгар баҕа санааларын биллэрдилэр.
Оскуола директора Николай Пахомов оскуола саҥа дьиэтин бырайыагын кэлэр сылга оҥорторон, үбүлэниитэ суһаллык инвестбюджекка, оттон кулууп директора Давид Трофимов кулууп дьиэтин тутуу кэлэр дьылларга «Үтүө дьыала» программаҕа киллэриллэрин туруорустулар.
Нэһилиэк баһылыга Михаил Денисов нэһилиэккэ дьон-сэргэ олохсуйуутугар үлэнэн хааччыйар, специалистарга анаан толору хааччыллыылаах уопсайдар тутуллаллара, Хочоттон Тиэлигигэ диэри айан суолун биэрэстэ кэриҥин ситэрэр, водохранилище оҥоһуллара наадатын эттэ.
Чыамайыкыга
Чыамайыкыга туруоруллубут отчуокка олохтоохтор көхтөөхтүк кэлэн кытыннылар, мунньах кэпсэтиһии бэрээдэгинэн бэрт уһуннук барда.
Спорт тренерин хамнаһын үрдэтэр суолу тобулары, Аллараа Бэстээххэ элбэх оҕолоохторго хаһан учаастак бэриллэрин, «Манчаары» кооператив хаһан атаҕар турарын, үүт харчытын хаһан ситэри төлүүллэрин, оттуур ходуһа докумуонун оҥорторууга чааһынай риэлтор тоҕо көтүмэхтик сыһыаннаһарын, БТИ үлэһиттэрэ хаһан нэһилиэккэ тахсалларын, коммунальнай төлөбүр тоҕо үрдэтиллэрин, дьиэлэри бүттүүн киин ититиигэ холбуур тоҕо кыаллыбатын, сайыҥҥы уу турбата хаһан тардылларын, саҥа ФАП дьиэтэ хаһан тутулларын ыйыталастылар. «Билайн» сотовай сибээс мөлтөхтүк хабара хаһан туоратылларын, бөһүөлэккэ «Сбербаан», «Алмаасэргиэнбаан» банкоматтара хаһан туруоруллалларын сурастылар.
Оскуола директора Федор Белолюбскай тыл этиитигэр суол-иис куһаҕанын, Сиэллээххэ муоста тутуута суһаллык быһаарылларын, электро-уот мөлтөҕүттэн аныгы техникалар алдьаналларын, оскуола бас билиитигэр турар спортсаала итиэннэ оскуола уота-күөһэ төрдүттэн өрөмүөннэнэрэ наадатын ыйда, маассабай спорт сайдыытыгар спортплощадканы туруоруста.
«Тамма» ТХПК директора Егор Дьячковскай арыы сыаҕын дьиэтин сөргүтэр, тэриллэрэ саҥардылларыгар туох көмө оҥоһуллуон сөптөөҕүн ыйыталаста.
Павел Семенов Аллараа Бэстээххэ Руслан Федотов аһы-үөлү кууһунан атыылыыр маҕаһыына аһыллара былааннанара саамай сөптөөҕүн бэлиэтээтэ, бөһүөлэккэ улахан кыамталаах подстанция туруоруллара наадатын ыйда, суол-иис оҥоһулларыгар бырайыак бэлэмнэниллэрин биһирээтэ.
Нэһилиэк баһылыга Гаврил Семенов киин сиргэ уота-күөһэ, суола-ииһэ суох сиргэ учаастагы биэрэр сатамньыта суоҕун бэлиэтээтэ, салгыы сайдыыга эрэллээхтик хардыылаан иһэргэ ыҥырда.
* * *
Оройуон депутаттарын сэбиэтин бэрэссэдээтэлэ Андрей Находкин Чүүйэҕэ, Тиэлигигэ, Чыамайыкыга РФ Президенэ В.В.Путин уонна СР Ил Дархана Егор Борисов Анал этиилэрин сүрүн ис хоһоонугар бэсиэдэлэри оҥордо, онуоха олохтоохтор дойдубут сайдыытыгар чопчу туох сыал-сорук туруоруллубутун истэн элбэҕи билбиттэрин-көрбүттэрин бэлиэтээтилэр.
Түмүккэ нэһилиэктэр олохтоохторо отчуоту истэн, ыйытыыларга сөптөөх хоруйдары ылан оройуон дьаһалтатын үлэтин-хамнаһын биһирииллэрин биллэрэн биир санаанан куоластаатылар.
Комментарии
Авторизация на сайте через социальные сети