Субуотунньук үтүө үгэскэ кубулуйан, үлэ палисадниктары кырааскалааһыныттан саҕалаан, тиит маһы, талаҕы олордууга, бөҕү-сыыһы хомуйууга тиийэ хабылынна. Айылҕа харыстабылын Орто Халыматааҕы инспекциятын судаарыстыбаннай инспектора Наталья Бурнашова биллэрбитинэн, улууска уопсайа 47 тыһ. кв.м иэннээх сир бөҕө-сыыһа хомуллубут, 700 тиит мас, талах, хатыҥ олордулунна. Бөҕү хомуйууга 7 тыраахтар, 1 КАМАЗ, 4 МТЗ, 1 „Синтай“ техника сыһыарылынна.
„Субуотунньук кэмигэр сорох нэһилиэккэ киэҥ бырагыраама тэрилиннэ. Ол курдук, Арҕахтаахха „Охрана природы“ куонкурус, „Күһүн бэлэхтэрэ“ дьаарбаҥка ыытылынна. Оттон Ойуһардаахха дьаарбаҥканы ыччат отдела тэрийдэ. Орто Халыма куоракка субуотунньук чэрчитинэн, улуустааҕы библиотека иһинэн дьаарбаҥка буолла. Онон, маннык субуотунньуктарга нэһилиэнньэ инникитин даҕаны көхтөөх, улууспут өссө ыраас, кыраһыабай буоларыгар эрэнэбит“, — диэтэ Наталья Дмитриевна.
Комментарии
Авторизация на сайте через социальные сети