- Тэрийээччилэринэн култуура уонна духуобунай сайдыы управлениета (начальник э.т. М.В.Кобельянова), Кутана нэһилиэгин дьаһалтата, «Ньургуһун» литературнай түмсүү, А.А.Иванов-Күндэ аатынан литературнай музей (салайааччы Т.С.Кириллин), Сунтаардааҕы кииннэммит библиотека ситимэ (директор Т.Н. Иванова) уонна «Сунтаар сонуннара» хаһыат редакцията (редактор-директор Б.П.Николаев) буоллулар.
- Тэрээһин күнүс 12 чаастан олохтоох култуура пааркатыгар айар дьоҕурдаах дьон парадтаан киириилэринэн саҕаланна. Манна барыта 9 нэһилиэктэн (Кириэстээх, Аллыҥа, Сунтаар, Элгээйи, Күндэйэ, Кутана, Күүкэй, Сиэйэ, Түбэй-Дьаархан) 60-тан тахса киһи кэлэн кыттыыны ылла. Кириэстээх курдук Кутанаттан тэйиччи сытар нэһилиэктэн бүтүн делегация кэлэн кыттыбыта тэрээһин таһыма үрдүгүн көрдөрөр, Альберт Бүлүүйүскэй айар дьоҕуругар сүгүрүйэр дьон улууспут бары нэһилиэктэригэр баалларын арылхайдык туоһулуур.
- Кыттааччылар сценаҕа тахсан бэйэлэрин билиһиннэрдилэр. Кинилэр ортолоругар Альберт Бүлүүйүскэй чугас доҕотторо, аймахтара эмиэ бааллар, поэт айбыт хоһооннорун иэйэн туран ааҕан иһитиннэрдилэр. Биир сонун түгэнинэн литературнай бырааһынньыкка П.А.Ойуунускай аатынан Саха академическай театрын артыыһа, СР үтүөлээх артыыһа З.Г.Попова кэлэн кыттыбыта буолла. Кини поэт хас да хоһоонун ааҕан, мустубут дьону чахчы да долгутта. Ону сэргэ тэрээһиҥҥэ Ангелина Шадринова-Суоһааны кэлэн кыттыбыта үгүспүтүн сэргэхситтэ.
- Төһө да дохсун ардахтаах күн буоллар, тэрээһин эбиэккэ диэри пааркаҕа буолла. Иккис түһүмэҕинэн быйыл күн сирин көрбүт «Сонеттартан кинигэ» сүрэхтэниитэ буолла. Расул Гамзатов «Книга сонетов» кинигэтин Альберт Бүлүүйүскэй тылбаастаабытын, хомуйан таһаарбыттар. Кинигэни дьон дьүүлүгэр Күндэ аатынан музейы төрүттээччи Т.С.Кириллин таһаарда.
- Салгыы тэрээһин халлаан ардаан, Күндэ музейыгар буолла. Бу сырыыга айар куттаах дьон бэйэ икки ардыларыгар Альберт Бүлүүйүскэй айымньыларын билиигэ, ырыатын толорууга куоталастылар.
- Ол курдук, «Хоһоон сүрэххэ тыллар» поэт хоһооннорун уус-уран ааҕыыга, «Ыллыахпын баҕарабын» ырыа буолбут айымньыларын толорууга, «Ыйдаҥа ырыата» Бүлүүйүскэй айымньыларынан ырыа матыыбын айыыга уонна А.Бүлүүйүскэй олоҕун, айар үлэтин туһунан таайбараҥ күрэхтэрэ буоллулар. Онно барыта отучча киһи көхтөөх кыттыыны ылла. Ырыа матыыбын айыыга үс киһи кыттыбытыттан Гран-прини Элгээйиттэн Ариан Кондратьев ылыаҕын ылла. Поэт хоһооннорун уус-уран ааҕыыга 18 киһи кытынна. Олортон поэт хоһоонун дьиҥ сүрэҕинэн ылынан толорон, кыайыылааҕынан Ефрем Афанасьев (Сунтаар) буолла. «Ыллыахпын баҕарабын» күрэскэ кыайыылаах аатын Кириэстээхтэн Альберт Данилов ылла.
- Альберт Бүлүүйүскэй олоҕун, айар үлэтин билиигэ анаммыт викторинаҕа үгүс киһи кытынна. Бу күрэһи библиотека салалтата ыытта.
- Инникитин маннык хабааннаах тэрээһиннэр уостубакка салҕанан бара туруохтара.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети