- Манна түөрт машинист, биир чох киллэрээччи үлэлииллэр. Мин машинистА.Н.Леверьевы көрсөн кэпсэттим. Александр Леверьев чох быраҕарын быыһыгар үлэтин-хамнаһын билиһиннэрдэ.
- Температурнай режими ыйыллыбыт графигынан көрөн тутуһабыт, манна барыта автомат - ыйыллыбыт температураҕа тиийдэҕинэ итии ууну хачайдыыр носуостар бэйэлэрэ холбоноллор. Төһө уу, уот ороскуоттанара эмиэ көстөн турар. Үлэлиир хочуолунайбыт толору хааччыллыылаах, ол курдук душевой кабина, туалет бааллар. Онон, сменабыт бүттэ да суунан-тараанан, таҥаспытын уларыттан баран барабыт, - диэтэ.
Хочуолунай үлэһиттэрэ сайынын кыстыкка бэрт кичэллээхтик бэлэмнэммит буоланнар, санаалара бөҕөх. Электрик В.С.Максимов манна үлэлээбитэ балайда буолбут.
- - Быйыл бу хочуолунайтан 13 ыалга сылаас киирэн олохтоохтор үөрүүлэрэ улахан. Олорор усулуобуйалара тубустаҕа дии. Сиинэҕэ уокка оттор мас кыһалҕата сытыытык турар. Оттон бу электрик быһыытынан үлэбин сырдатар буоллахха, оттук сезона саҕаланыан иннинэ эрдэ үлэбэр тахсабын. Оборудованиены барытын бэрэбиэркэлээн көрөбүн. Баар итэҕэстэри туоратабын, бэлэмниибин. Билигин күннэтэ көрөн-истэн ааһабын, машинистартан электрооборудование хайдах үлэлиирин ыйыталаһабын, - диир Валерий Максимов.
- Кытыл Дьураҕа дьаһалта дьиэтин, «Сайдыы» култура-спорт киинин сылааһынан хааччыйар хочуолунайга таарыйан аастым. Манна олорор дьиэ-уот коммунальнай хаһаайыстыба тэриллиэҕиттэн үлэлиир Андрей Сакердоновтан үлэ усулуобуйатын туоһуласпыппар, “Көрөргүт курдук, хочуолунайбыт иһэ сорох ыаллартан ордук”, диэтэ. Кырдьыга даҕаны, аһыллар-сабыллар түннүк сырдык шторалаах, остуоллара ыскаатырдаах, мотуор куугунааһына иһиллибэтин курдук ааннара лип сабыллар.
- - Бастаан тэриллэрбитигэр дириэктэрбит А.С.Захаров: “Тугу наадыйаргытын тутатына этэн иһиҥ, төһө кыалларынан хааччыйыахпыт,”- диэбитэ. Онон, бастаан гипсокартоны кытта бу кафелы, онтон олоппостору ыыппыта. Маннык усулуобуйаҕа хайдах үлэлээбэт буолуоххунуй? - диир Андрей Сакердонов.
- Билигин урукку буолбатах, хочуолунайдарга үлэ усулуобуйата тупсар, манна үлэҕэ киирэргэ аҥаардас бэрээдэктээх эрэ буолбакка, олоххо көхтөөх буолуоххун наада. Ол курдук, Хаҥаластааҕы олорор дьиэ-уот, коммунальнай хаһаайыстыба үлэһиттэрэ спортка да, уус-уран самодеятельноска да эмиэ инники күөҥҥэ сылдьаллар.
Комментарии
Авторизация на сайте через социальные сети