ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
15 сентября 2015, 13:16

Лээги куубагын кыайыылааҕа - Хэвенли Стид


Бастакы куубак 2012 сыллаахха икки туомнаах Лээги кинигэтэ сүрэхтэниитигэр ыытылыбыта. Онтон ыла сыл ахсын кытааччылара элбээн, бирииһин пуондата улаатан, улахан рейтиннээх ат сүүрдүүтүн таһымыгар таҕыста. Быйылгы төрдүс сүүрдүү Кыайыы 70 сылыгар анан, уратытык ыытылынна. Ол курдук Польша, Белорусия уонна Казахстан дойдуларыттан ыҥырыылаах ыалдьыттар кэллилэр. Россия киин куораттарыттан массыыналары, спецтехникалары оҥорор улахан хампаанньалар бэрэстэбиитэллэрэ Ульяновскайтан "Автопрофи", Москваттан "Белагро", Хабаровскайтан "Лесотехника", Челябинскайтан "Машида", Пермьтан "Уралинструментопт" уо.д. а. бэйэлэрин бириистэрин туруордулар, саха төрүт оонньуутун сэҥээрэн көрдүлэр. Сүүрдүүнү үгэс быһыытынан биллиилээх меценат, урбаанньыт Руслан Федотов уонна Амма улууһун ат спордун федерацията тэрийдилэр.

Тэрээһин Дьөһөгөйгө сүгүрүйэр сиэри-туому көрдөрөр театрилизованнай дьүһүйүүнэн, хамаандалар параадтарынан саҕаланна. Күрэхтэһии свето-звуко техническэй киэргэтиитэ чахчы үчүгэйдик оҥоһулунна. Ол курдук көрөөччүлэргэ анаан икки улахан светодиоднай экран турда, Саха НКИК устар бөлөҕө тэрээһини видеокамеранан толору уһулла. Итиниэхэ аттар сүүрүүлэрин батыһан устууга видеокоптеры (үөһэттэн көтө сылдьан видеоҕа уһуллар аппараат) туһаннылар. Онон Лээги куубагар ыытыллыбыт бары сүүрдүүлэри телевидениеҕэ сиһилии көрүөхпүт. Сүүрдүү кэмигэр Саха эстрадатын сулустара Аскалон Павлов, Виталий Очиров, Юлиана-Дьүрүйээнэ, Джида ылбаҕай ырыаларын көрөөччүлэргэ бэлэхтээтилэр, тэрээһини ситэрэн, киэргэтэн биэрдилэр.

Республика саамай түргэн атахтаах сылгылара 9 улуустан түмсэн, 8 дистацияҕа биэтэги былдьастылар. Быйылгы сүүрдүүгэ дистанциялар кыайыылаахтарыгар уонна призердарыгар туттарыллар бириистэр (булт саатынан, убаһанан, техниканан уонна харчынан) уопсай сууммалара 2.5 млн солк. тиийдэ. Ол иһигэр улуус тыа хаһаайыстыбатын тэрилтэлэрэ "Давидофф", "Т.Лукин", "Бөтүҥ", "Болугур" уонна "Строд" кыттыһан дистанцияларга 300 тыһ. солк. суммалаах убаһанан бириистэри туруордулар. Амма ТХППК  800 м дистацияҕа Иван Николаевич Емельянов аатынан 250 тыһ. солк. бирииһи олохтоото.

Буоларын курдук тэҥ баайыылаах сылгылар сүүрүүлэрэ улахан эрийсиилээх буолла. Уһулуччу түргэн бириэмэни көрдөрбөтүлэр эрээри сүүрүктэр бэйэ бэйэлэрин ыган күүскэ сүүрдүлэр. Арай Кустук уонна Харачаас эрэ дистанцияларыгар холкутук бастаатылар. Көрөөччүлэр сэҥээрэр сылгыларыгар ыалдьан ыһыытаһан-хаһыытаһан, күрэх күүрээниттэн эниэргийэлэнэн үөрдүлэр-көттүлэр. Тоҕуоруһан турар дьон ортотуттан: "ким буоллун, хастыы бардабыт, Кустук, Рашен Дэй, Комментант, Маджестик ким утарар баарый?" - диэн оонньууга көҕүлүүр саҥалар элбэхтик иһилиннилэр. Онтон комментатор: "Аттар түстүлээр!...", - диэн биллэриитигэр, кэтэһэн турбут дьон халҕаһата буурҕалаах муора курдук өрө үллэ түһэр.

photoByWidth&id=44462&width=1000

Дистанцияларга кыайыылаах сылгылар:

Саха боруодаларыгар:

7000 м дистанцияҕа Николай Андреевич Попов бириһиигэр Самныбат кыайда (10м02с.3.), `Grasshopper~ мини-трактор. Кини хаһаайына М.В.Григорьев Амма улууһа, сүүрдээччитэ В.Н. Мухаметов, тренерэ А.А.Баишев.

10000 м дистанцияҕа Кустук кыайда (14м06с.4), `Кедр~ пилорама. Кини `Тумул~ ТХПК сылгыта Мэҥэ-Хаҥалас улууһа, сүүрдээччитэ В.В.Кандинскай, тренерэ Н.Н.Платонов.

Сиэлиик уонна дьоруо сылгыларга: 1600 м дистанцияҕа Харачаас кыайда (2м57с.39), роторнай косилка уонна убаһа. Кини ООО `Давидофф~ сылгыта Амма улууһа сүүрдээччитэ А.А.Платонов, тренерэ А.А. Баишев.

photoByWidth&id=44461&width=1000

Ыраас хааннаах сүүрүк сылгыларга:

800 м дистанцияҕа Иван Николаевич Емельянов бирииһигэр Байтал кыайда (52с.4). Кини хаһаайына Н.И.Оконешников Чурапчы улууһа, сүүрдээччитэ Р.Ф.Ларионов, тренерэ Осипов Д.С. Бу сүүрдүүгэ ат спордун федерациятын быһаарыытынан кыайыылаахха уонна призердарга 60 тыһ.солк. тэҥҥэ үллэрдилэр.

photoByWidth&id=44463&width=1000

Никифор Оконешников Чурапчы: `Муона миэхэ соргулаах ипподром, 2012 сыллаахха маҥнайгы куубакка Златоуст диэн атыырым кыайбыта. Быйыл Байталым кыайда. Кини Айаада уонна Бараммат диэн республикаҕа биллэр сүүрүк сылгылар оҕолоро. Икки сааһын саҥа туолла, ороһу. Утарсааччылара киниттэн сыл аҥаарынан аҕалар, ол да буоллар кыайдыбыт. Быйылгы сүүрдүү олох бырааһынньык курдук, олус үчүгэйдик тэрийбиттэр. Руслан Еремеевичка махтал, урукку да сүүрдүүлэр үрдүк таһымҥа ааспыттара~, - диэн санаатын үллэһиннэ.

1600 м дистанцияҕа Павел Гаврильевич Иванов-Кэриэтээн бирииһигэр Чыпчаал кыайда (1м49с.7), МР-155 булт саата. Кини хаһаайына И.А. Андреев, Хаҥалас улууһа, сүүрдээччитэ Е.Н.Оконешников, тренерэ И.А.Андреев.

1600 м дистанцияҕа Кыайыы 70 сылыгар анаммыт бирииһи Комментант ылла (1м44с.4), `Тайга~ пилорама. Кини ОАО `Быйаҥ~, `Эрэл~ ТХПК, ОАО `НКТЭ~  кыттыгас сылгылара, сүүрдээччитэ А.А.Куличкин, тренерэ С.П.Ядреев.

Ат сүүрдүүтүн сэҥээрээччилэр саамай кэтэспит 2015 сыллаах Лээги куубагын хаһаайынын быһаарар 2400 м дистацияҕа Хэвенли Стид кыайда. Кини ОАО `Колми~ сылгыта, сүүрдээччитэ А.А.Куличкин, тренерэ С.П.Ядреев. Онон бириис УАЗ массыына Нам улууһугар айаннаата. Амма сылгыта Фрут Элли биэтэккэ иккиһинэн кэлэн, хаһаайыттара 250 тыһ. солк. тигистилэр. Куубак фаворита Хаҥалас сылгыта Рашен Дэй бу сырыыга үһүс буолла. Кини хаһаайыттара 200 тыһ. солк бирииһи туттулар. Манна даҕатан эттэххэ Фрут Элли бэйэтиттэн аҕа саастаах, Республика ипподромун саамай быһый сылгыларын кытта тэҥҥэ сүүрдэ. Эһиилги улахан сүүрүүлэргэ киниэхэ ситиһиилэри баҕарыаҕыҥ.

Меценат, урбаанньыт, Лээги куубагын сүрүн тэрийээччитэ Руслан Федотов: `Улуус олохтоохторун, бука барыгытын бырааһынньыгынан эҕэрдэлиибин! Быйылыгы Лээги куубага Кыайыы 70 сылыгар ананар, аҕа көлүөнэ хорсун быһыытыгар сүгүрүйэр бэлиэбит. ¬үнэр көлүөнэ эдэр ыччакка Улуу сэрии кырыктаах кыргыһыытыгар сырдык тыыннарын харыстаабакка сэриилэспит аҕаларбыт, эһэлэрбит, убайдарбыт ааттарын үйэтитии буолар. Тэрээһиммитин сыл аҥарын инниттэн бэлэмнэнэн, дьоҥҥо аныгылыы тыыннаах ат сүүрдүүтэ хайдах барыахтааҕын көрдөрдүбүт. Россия киин куораттарыттан бииргэ үлэлэһэр партнердарбытын ыҥыртаан, элбэх сыаналаах бириистэри туруордубут. Көрөөччүлэргэ анаан улахан таблоҕа биэс сиртэн видеокамеранан тэрээһини көрдөрдүбүт уонна аттар сүүрүүлэрин видеокоптерынан батыһан уһуллубут. Сүүрдүү программатыгар саха аттарыгар икки дистанцияны уонна сиэлиик, дьоруо аттарга икки дистацияны киллэрдибит. Ити олохтоох сылгыны иитээччилэргэ стимул уонна ат спордун сайдыытыгар олук буолуоҕа. Саха сиригэр ат спордун российскай таһымҥа таһаарарга дьулуһабыт. Саха омук сылгы таҥаралаах, биһиги сахалар курдук ат сүүрдүүтүн сэҥээрэр омук суох. Бүгүн бырааһынньыкпытыгар элбэх эдэр ыччат баарын көрөбүн, ол аата биһиэхэ сахаларга ат спорда инникилээх, кэскиллээх~, - диэн кэпсээтэ.

Маны кытта элбэх бириистээх бырааһынньык лотореята оонньонно. Муҥутуур бириис-`Квадрацикл~ Амматааҕы лицей технологияҕа учуутала Трифонова Марианна Ивановна бааттаах илиитигэр тосхойдо. Тэрээһин халлаан хараҥарыар диэри интириэһи тарта. Көрөөччү дьон кыралыын кырдьастыын бырааһынньык салютун көрөн, оһуохайга кыттан тарҕастылар.

При частичном или полном использовании материалов гиперссылка на сайт ysia.ru обязательна.
Категория: Спорт Просмотров: 803 Источник: ЯСИА Автор: Иван Дьячковскай Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ