От ыйын 14 күнүгэр Олоҥхо дьиэтигэр Геройга анаммыт “Где же вы, друзья-однополчане” саҥа кинигэ cүрэхтэниитэ буолла. Кинигэ автора – хорсун офицер кэргэнэ, РСФСР уонна Саха АССР культураларын үтүөлээх үлэһитэ, “Бочуот Знага”, “Доҕордоһуу” орденнар кавалердара, Саха Республикатын, Дьокуускай куорат, Бүлүү улууһун бочуоттаах олохтооҕо, СР Суруналыыстыкаҕа государственнай бириэмийэтин лауреата, биһиги бары бэркэ билэр, ытыктыыр киһибит Н.И. Протопопова. Кинигэ сүрэхтэниитигэр Нина Иннокентьевна, уола Петр Николаевич кэргэнинээн Мария Романовналыын, кыыһа Елизавета Николаевна, сиэннэрэ, хос сиэнэ кэлэн кыттыыны ыллылар.
Бу “Бичик” кинигэ кыһатыгар 500 экземплярынан бэчээттэнэн тахсыбыт кинигэҕэ аан тылы философскай наука доктора, М.К. Аммосов аатынан ХИФУ философия кафедратын профессора В.Д. Михайлов уонна РФ культуратын үтүөлээх деятелэ, РФ народнай артыыһа, ССРС, РФ бириэмийэлэрин лауреата А.С. Борисов суруйбуттар. Салгыы Николай Алексеевич Кондаков бойобуой доҕотторун уонна кинилэр дьоннорун суруктара, эҕэрдэ открыткалара, телеграммалар, ахтыылар, Николай Алексеевич сурунар кинигэтиттэн быһа тардыылар, сэрии толоонуттан дьонугар суруйбут суруктара, Хампа орто оскуолатын пионердара хомуйбут ахтыылара, бииргэ сэриилэспит дьоннорун кытта суруйсубут суруктара, ахтыылар, Н.Г. Чернышевскай аатынан Бүлүүтээҕи педколледж студеннарын дакылааттарын тезистэрэ, Советскай Союз Геройун үрдүк аата иҥэриллиитин докумуоннара киирбиттэр.
Кинигэ сүрэхтэниитэ олус истиҥник ыытылынна. Тыл эппит дьон бары бу кинигэ олус үчүгэйин, элбэх үлэ ыытыллыбытын, эдэр ыччаты патриотическай тыыҥҥа иитиигэ улахан суолталааҕын, норуоттар доҕордоһууларын, сомоҕолоһууларын арылхайдык көрдөрөрүн бэлиэтээтилэр уонна Нина Иннокентьевнаҕа сүҥкэн үлэтин иһин улахан махталларын тиэртилэр.
“Бүлүү улууһа (оройуона)” МТ дьаһалтатын баһылыгын бастакы солбуйааччы В.Т. Лукин бу кинигэ тахсыытыгар Бүлүү улууһун олохтоохторо, тэрилтэлэр, общественнай хамсааһыннар “Кыайыы” фондаҕа киллэрбит үптэриттэн үбүлэммитин, онон хас биирдии улуус олохтооҕо кинигэ күн сирин көрбүтүгэр бэйэтин сэмэй кылаатын киллэрбитин эттэ. СР Бэчээккэ уонна телевидениенэн, радионан биэриигэдепартаменын директорын бастакы солбуйааччы Н.А. Молчанов кинигэ электроннай варианын туһааннаах сайтарга тарҕатан өссө элбэх ааҕааччыга тиэрдиэххэ сөбүн бэлиэтээтэ. Түмүккэ Нина Иннокентьевна бу кинигэни таһаарар санаа хайдах кэлбитин, хайдах суруллубутун кэпсээтэ уонна СР норуотун хаһаайыстыбатын үтүөлээх үлэһитэ, Бүлүү улууһун бочуоттаах олохтооҕо, Аҕа дойду Улуу сэриитин кыттыылааҕа, ытык кырдьаҕас А.И. Николаевка, “Бүлүү улууһа (оройуона)” МО дьаһалтатын баһылыгар С.Н. Винокуровка, Бүлүү улууһун дьонугар-сэргэтигэр Аҕа дойду Улуу сэриитин кыттыбыт Бүлүү дьонун сырдык ааттарын үйэтитэргэ тугунан да кэмнэммэт улахан өҥөлөрүн, үлэлэрин иһин истиҥник махтанна.
Суостаах сэрии сылларыгар саҕыллыбыт доҕордоһуу, төрөппүттэргэ, Ийэ дойдуга таптал, эдэр ыччакка холобур буолар уһулуччулаах олох туһунан кэпсиир кинигэ аахпыт эрэ киһи дууһатын кылын таарыйар, оччотооҕу кэм тыынынан илгийэр курдук. Албан ааттаах Геройдарбытын үйэтитэргэ өссө биир хардыы оҥоһуллан, бу кинигэ Улуу Кыайыы 70 сылыгар уонна Герой Н.А. Кондаков төрөөбүтэ 95 сылыгар ааҕааччыларга дьоһун бэлэҕинэн буолла.
Комментарии
Авторизация на сайте через социальные сети