Үөрүүлээх түгэҥҥэ СР Ил Дархана Егор Борисов кэргэнинээн Прасковья Петровналыын, Ил Түмэн государственнай мунньаҕын председателэ Александр Жирков, СР Правительствотын председателэ Галина Данчикова, СР Правительствотын председателин солбуйааччы, 2015 сыллаах Олоҥхо ыһыаҕын тэрийэр хамыыһыйатын председателэ Алексей Дьячковскай, Россия Суруйааччыларын союһун председателэ Валерий Ганичев, Америкаттан, Турцияттан, Азербайджантан, Японияттан уонна да атын тас дойдулартан кэлбит дьон күндү ыалдьыттарынан буоллулар.
Үгэс быһыытынан ыһыах алгыстан, арчыланыыттан саҕаланна. Кыталык кыргыттары, туруйа уолаттары арыаллатан киирбит алгысчыт аал уоту оттон, тоҕус Айыыттан норуотун, дьонун туһугар уйгу-быйаҥ, дьоллоох-соргулаах олоҕу түстүүллэригэр көрдөстө.
Ол кэннэ кылаабынай режиссер, биир дойдулаахпыт Амгалена Барашкова туруоруутугар театрализованнай көстүүнү көрдүбүт. Бу көстүү “Куруубай хааннаах Кулун Куллуустуур” олоҥхоҕо олоҕурда. Орто дойду оҥоһуута, силигилээн туруута, онтон хараҥа күүстэр - абааһы аймахтара Күн айыы дьонун атарахсытыылара, Үрүҥ Аар Тойон Айыы уолун - Кулун Куллустууру ытык сиргэ түһэриитэ, кини бухатыырга уһаарыллыыта, Орто дойдуну абааһы аймаҕыттан быыһыыра ырылыччы, өйдөнүмтүөтүк ойууланна. Түмүккэ 999 эр дьон хора, Олоҥхо ыһыаҕа Чурапчыга аһыллыбытын туһунан чабырҕах патриотическай өйү-санааны уһугуннарда, киэн туттууну үөскэттэ. Санатар буоллахха, режиссер Амгалена Барашкова 19-с “Манчаары оонньууларын” аһыллыытын туруорбута. Кини режиссер быһыытынан таһымнааҕын, айылҕаттан бэриллибит талааннааҕын бу да сырыыга көрөн итэҕэйдибит. Ураты хараҕынан, тус көрүүтүнэн хас биирдии көстүүнү туох эрэ дьиктилээх, алыптаах гына толкуйдуура киһини сөхтөрөр, астыннарар. Ол курдук, элбэх кыттааччыны аттаран туруорара, декорацияны, киэргэтиини хото уонна табыгастаахтык туттара көрөөччү кутун-сүрүн күүстээхтик тутар. Биһиги олохтоохтор даҕаны, ыалдьыттар даҕаны сөхтүбүт-махтайдыбыт.
Улуу Кудаҥса аҕалан биэрбит Ытык Дуоҕатын Ил Дархан Егор Борисов пъедесталга аста.
Егор Афанасьевич дьонугар-сэргэтигэр туһаайан: “Ханнык баҕарар норуот бэйэтин култууратын, сиэрин-туомун, үгэһин тутуһар, сайыннарар буоллаҕына - кэхтибэт. Ол туоһутунан бу ыһыахпыт буолар. Биһиги, сахалар, олоҥхобут баар буолан сахалыы тыыммыт сүппэт, тылбыт кэхтибэт. Инникитин даҕаны норуотум бу үгэһин тута сылдьыа диэн эрэлим улахан”, - диэн эппитин ытыс тыаһынан бигэргэттибит.
Кини “Саха Республикатын үтүөлээх бырааһа” ааты улууспут фтизиатр-бырааһыгар Иван Гулькоҕа, “Гражданскай килбиэн” бэлиэни кырдьаҕас олоҥхоһуппутугар Николай Тарасовка, Саха Республикатын баһылыгын махтал суругун Чурапчытааҕы колледж коллективыгар (директор Евгений Попов) туттарда.
Олоҥхо 10 сыллаах программатын бэлэмнээн ыытар ассоциациятын председателэ Александр Жирков, Россия Суруйааччыларын союһун председателэ Юрий Ганычев, 2015 сыллаах Олоҥхо ыһыаҕын тэрийэр хамыыһыйатын председателэ Алексей Дьячковскай, Чурапчы улууһун баһылыга Андрей Ноговицын, о.д.а. бэйэлэрин эҕэрдэ тылларын эттилэр, ыһыах хас биирдиибитигэр умнуллубат түгэннэри, кыайыыны-хотууну бэлэхтииригэр баҕардылар.
Аһыллыы кымыс үрдүн охторуутунан, тыһыынчанан киһилээх оһуохайынан түмүктэннэ.
Комментарии
Авторизация на сайте через социальные сети