Соторутааҕыта Сунтаарга бэрт сонун, сэргэх көстүү буолла. Үлэ кэнниттэн автобуһунан дьиэлэригэр төннөн иһэр дьоҥҥо библиотека үлэһиттэрэ Иванова Мария Христофоровна уонна Алексеева Мария Леонидовна Улуу Кыайыы 70 сылыгар уонна Литература сылыгар ананан улууска тахсыбыт саҥа кинигэлэри билиһиннэрдилэр. Интэриэһиргээбит өттө кинигэлэри илиитигэр ылан тутан-хабан көрдө, сорох мэктиэтигэр имэрийэн ылла.
«ПМК-Химия” маршрутунан айаннааччылар бу «Ааҕар айан” акцияны бэркэ сэргээтибит.
Итинтэн сэдиптээн түөрт уонтан тахса сыл анараа өттүнээҕи хартыына харахпар көстөн кэллэ. «Роман-газета” уочараттаах нүөмэрин паарта быыһынан кылатан ааҕа сатыы олорор үөрэнээччи кыыс. Кини учууталлартан хаста-хаста мөҕүллүбүтүн, аны итинник гыныа суох буолан тылын биэрбитин, ол гынан баран саҥа кинигэни, сурунаалы илиитигэр ыллаҕына ол биэрбит тылын ааҕыы абылаҥа, саҥа кинигэ, кэпсээн умсулҕана умуннаран кэбиһэрин санаан кэллим. Өйдөөн кэллим Амма оройуонун Алтан нэһилиэгин куула тыа саҕатыгар турар быыкаайык дьиэни – урукку нэһилиэк библиотекатын. Быраҕыллыбыт ампаарга кыстана сытар, кыайан көһөрүллүбэккэ хаалбыт элбэх да элбэх кинигэни. Ол кинигэлэри саҥа ааҕар буолбут оҕо барахсан дьоно утуйбутун кэннэ суорҕан анныгар кистээн ааҕа сатыырын...
Тоҕо суоҕуй билигин оннук умсулҕан, оннук ааҕыыга тардыһыы?...
Ити умсулҕаны уһугуннара сатыыр улуустааҕы библиотека үлэһиттэригэр барҕа махтал буолуохтун.
Комментарии
Авторизация на сайте через социальные сети