«Россия ийэлэрэ» бүтүн Россиятааҕы уопсастыбаннай хамсааһын тэрийэр конференциятыгар «Россия ийэлэрэ» Бүтүн Россиятааҕы уопсастыбаннай хамсааһын бэрэссэдээтэлэ В.А.Петренко, Россия Федерациятыттан, чугас дойдулартан, Приморье кыраайыттан, Бурятия Өрөспүүбүлүкэтиттэн, Красноярскай кыраайтан, Новосибирскай уобаластан, Ингушетияттан, Дагестантан, Саха Өрөспүүбүлүкэтиттэн уопсастыбаннай хамсааһыннар бэрэстэбиитэллэрэ кыттыахтара.
В.А.Петренко Саха сирин Ил Дархана Егор Борисовы кытары көрсүөҕэ. Ыалдьыттар Ийэ скверигэр уонна Медицина национальнай киинин Перинатальнай киинигэр сылдьыахтара. «Доруобай ийэ – доруобай оҕо», «Төрөппүттэр эппиэтинэстэрэ уонна оҕо интэриэһэ» «төгүрүк остуоллар» буолуохтара. Конференция Дьиэ кэргэн, таптал уонна бэриниилээх буолуу күнүн чэрчитинэн ыытыллар.
Саха Өрөспүүбүлүкэтигэр «2014-2016 сылларга дьиэ кэргэн, демография уонна ыччат политикатын олоххо киллэрии» судаарыстыбаннай бырагыраама ылыллыбыта. Бырагыраамаҕа демография балаһыанньатын тупсарарга, элбэх оҕолоох дьиэ кэргэттэри уонна кырдьаҕас дьону өйүүргэ, социальнай тулайаахтар үөскүүллэрин сэрэтиигэ анаммыт дьаһаллар киирэллэр.
Дьахталлар уопсастыбаннай хамсааһыннара үгүс кыһалҕаны туоратарга күүскэ үлэлииллэр, баалларын биллэрэллэр. 2012 с. «Россия ийэлэрэ» Бүтүн Россиятааҕы уопсастыбаннай хамсааһын үлэтин саҕалаабыта. Кини 700-тэн тахса уопсастыбаннай хамсааһыны түмэр. Дьиэ кэргэн, ийэ уонна оҕо харыстабылыгар үлэлиир регионнааҕы отделениелар Россия 63 субъегар тэрилиннилэр.
– «Россия ийэлэрэ» регионнааҕы отделениета Саха сиригэр 2014 с. тэриллибитэ. Өрөспүүбүлүкэ 24 улууһугар отделение салаалара үлэлииллэр.
Олох биир сиргэ турбат, кэм-кэрдии, политика тутула уларыйаллар. Ол гынан баран, дьиэ кэргэн хаһан баҕарар, хайа да кэмҥэ эрэллээх тыылынан, киһи сыаннастарын, духуобунаһы уонна көлүөнэ историческай утумун харыстааччынан хаалар.
Киһи төһө да баай-талым олохтооҕун уонна ситиһиилээҕин иһин, киниэхэ кытаанах доруобуйа, дьоллоох дьиэ кэргэн – кыһамньылаах төрөппүттэр, мындыр өйдөөх эбэлэр уонна эһэлэр, таптыыр убайдар-бырааттар, эдьиийдэр-балтылар наадалар.
Бу бырааһынньык хас биирдии дьиэ кэргэҥҥэ тапталы уонна бэриниилээх буолууну, чэчирии сайдыыны уонна нус-хас олоҕу аҕаллын!» – диэн, «Россия ийэлэрэ» уопсастыбаннай хамсааһын Саха сиринээҕи отделениетын бэрэссэдээтэлэ Прасковья Борисова бу үтүө бырааһынньыгынан Саха сирин олохтоохторун, дьиэ кэргэттэрин ис сүрэҕиттэн эҕэрдэлээтэ.
Комментарии
Авторизация на сайте через социальные сети