- Оҕолору айар эйгэҕэ уһуйааччынан худуоһунньук‒график идэлээх, Хара орто оскуолатыгар ИЗО, черчение, технология учуутала, РФ үөрэҕириитин бочуоттаах үлэһитэ, СР үөрэҕириитин туйгуна, үрдүкү категориялаах учуутал Лариса Аргунова буолар. Бу күн Лариса Алексеевна музей үлэһиттэрэ быыстапканы олус табыгастаах аатынан сүрэхтээбиттэригэр махталын тиэртэ уонна үөрэнээччилэринэн хайдах курдук киэн туттарын үөрэ-көтө кэпсээтэ:
- ‒ Куруһуокпар баҕалаах оҕолор сылдьаллар. Баҕа баар буоллаҕына дьоҕуру хайдах баҕарар сайынныарыахха сөп. Бу быыстапка туруоруллуутугар оҕолор туох баар дууһаларын ууран, дьаныһан туран үлэлээбиттэрэ. Үөрэнээччилэр айар үлэлэрин быыстапкалара Москва, Санкт-Петербург, Доннааҕы Ростов куораттарга ситиһиилээхтик туруоруллубуттара.
- Солко лиэнтэлэринэн быысапка, батик, сиэл, макраме уо.д.а. технологияларынан оҥоһуллубут үлэлэри Хара орто оскуолатын үөрэнээччилэрэ Нарыйа Дмитриева, Ньургуйаана Дмитриева, Нарыйа Григорьева, Иванна Гаврильева уо.д.а. туруорбуттар. Лариса Алексеевна куруһуогар дьарыктаммыттар инники олохторун айар үлэни кытта ситимнээбит Сахайаана Николаева, Лия Лыткина дизайнер, худуоһунньук идэтин баһылаары үөрэнэ сылдьаллар. Кинилэр үлэлэрэ Москваҕа, Кытайга көрдөрүллүбүттэрэ. Учуутал бастыҥ үөрэнээччилэрин Сардаана Гаврильеваны, Лена Григорьеваны, Надя Павлованы уо.д.а ахтан ааста.
- Кырдьык, хамсаан барыах айылаах харах хатанар ойуулара бииртэн биир дьиктини кэпсииллэр. Сиэлтэн оҥоһуллубут Дьыл Оҕуһа хамсаан барыах курдук, мунчаарбыт Ый Кыыһа, үөрэ-көтө оттуу сылдьар дьон, мэник-тэник оҕо саас, сир симэхтэрэ сибэккилэр, оһуор-мандар ‒ бу барыта кэрэчээн кыргыттар нарын тарбахтарынан оҥорбут үлэлэрэ.
- Уһуйааччыларыгар Лариса Алексеевнаҕа сыралаах үлэтин түмүгүнэн быыстапка туруоруллубутунан Хара нэһилиэгин баһылыга Дария Назарова, культура уонна духуобунай сайдыы управлениетын начальнига Сергей Холмогоров, үөрэх үлэһиттэрин профсоюһун бэрэссэдээтэлэ Степан Андреев, Р.Г.Васильев аатынан кыраайы үөрэтэр музей директора Зоя Шарина, Майатааҕы оҕону эбии үөрэхтээһин киинин үлэһитэ Евдокия Баишева, Хара орто оскуолатын директора Николай Бугаев, Харатааҕы «Айыллаан» Сынньалаҥ киинин салайааччыта Светлана Аргунова эҕэрдэлэрин тиэртилэр, грамоталары, эҕэрдэ суруктары туттардылар, айар үлэтигэр өссө үрдүк ситиһиилэри, оҕолору сырдыкка, кэрэ эйгэтигэр угуйа турарыгар баҕа санааларын эттилэр.
- Бу күн Лариса Аргунова «Хара нэһилиэгин социальнай-экономическай сайдыытыгар кылаатын иһин» диэн бэлиэ хаһаайкатынан буолла. Быыстапка аһыллыбытынан ырыаларын-тойуктарын «Дьүрүлгэн» түмсүү салайааччыта Иван Аргунов уонна Хара оскуолатын үөрэнээччитэ Марианна Семенова бэлэхтээтилэр.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети