ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
17 декабря 2015, 15:31

Саха сирин олохтоохторугар ыҥырыы: мөкү дьаллыктан босхолонуҥ


Күндү үөрэнээччилэр, төрөппүттэрбит, Саха сирин бары олохтоохторо! Ааспыт үйэ 20-с сылларыгар саха омугу имири эһэртэн быыһаабыт, гражданскай сэриини Саха сиригэр тохтоппут уонна Саха Республикатын тэрийбит саха омук улуу уола Исидор Бараахап биир дойдулаахтара буоларбытынан киэн туттан туран, биһиги, Николай Якутскай аатынан Харбалаах орто оскуолатын үөрэнээччилэрэ, мунньахтаан, сүбэлэһэн баран Саха сирин бары олохтоохторугар маннык диэн ыҥырыы таһаарабыт

Кэлиҥҥи кэмҥэ Россия уонна Саха Республикатын салалтата табааҕы тардары хааччахтыыр элбэх дьаһаллары ылынна. Биһиги олору олус биһириибит. табах доруобуйаҕа буортутун туһунан киһи эрэ барыта билэр. Ол гынан баран, хаһан эрэ бу куһаҕан дьаллыкка ылларан кэбиһэн, онтон кыайан босхоломмокко, табахтарын сатаан бырахпакка, элбэх дьон өйдүү-өйдүү доруобуйаларын күн аайы сүһүрдэ сылдьаллар.

Табах наркотик бииһин ууһа буолар. Киһи табахха дөбөҥнүк ылларар уонна дэбигис босхолоно охсубат. Онтукатынан табах олус сэрэхтээх. Сайдыылаах саҥа үйэ дьоно буоларбыт быһыытынан, доруобуйабытын чөл хаалларарга кыра эрдэхпититтэн бэйэбит кыһаллыахтаахпытын өйдүүбүт. Табааҕы тардымыаххайыҥ, биир эмит табахтыыр оҕо баар буоллаҕына, ол куһаҕан кэмэлдьиттэн түргэнник босхолонуҥ диэн Саха сирин бары үөрэнээччилэригэр туһаайан ыҥырыы таһаарабыт!

Биһиги оскуолабытыгар аҕыйах табахтыыр оҕо баар да, сотору кэминэн кинилэр да табахтарын быраҕыахтара диэн эрэнэбит. Бу ыҥырыыбытын төрөппүттэргэ эмиэ туһаайабыт! Табахсыт төрөппүттэрдээх оҕолор табахтан олус чугас сылдьаллар, хаһан баҕарар бу куһаҕан дьаллыкка убанан хаалыахтарын сөп. Ол иһин, оҕолоргут чөл доруобуйалаах буолуохтарын баҕарар буоллаххытына, табахсыт төрөппүттэр, табаххытыттан түргэнник босхолонуҥ!

Анал үөрэхтээхтэр суруйалларынан, Россия үрдүнэн табахтан сүһүрэн, табах буортутуттан доруобуйалара эмсэҕэлээн, онтон сылтаан сыл аайы 500.000 киһи олохтон туоруур. Биһиги төрөппүттэрбит ыалдьыбакка, уһуннук уонна дьоллоохтук олоруохтарын баҕарабыт! Хас биирдии киһи уһун үйэлээх буолан эһээ-эбээ, хос эһээ-эбээ сааһыгар тиийиэхтин! Хаһан эрэ Саха сирин олохтооҕо табах диэни тардыбат, арыгы диэни испэт, чөл туруктаах доруобуйалаах, үлэлээх-хамнастаах, дьиэлээх-уоттаах, ыраас өйдөөх-санаалаах буолуо диэн эрэнэбит! Ол кэм түргэнник кэлэрин туһугар турунуоҕуҥ!

Үөһээ Бүлүү улууһун Николай Якутскай аатынан Харбалаах орто оскуолатын үөрэнээччилэрэ

2015 сыл, ахсынньы 3 күнэ

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 659 Источник: ЯСИА Автор: СИА Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ