Ыһыахтан уонна дьон сэргэ ортотугар сылдьартан көҕүлүүр күүс ылан, улуус сайдыытыгар туох эрэ күттүөннээҕи оҥорорго, туһалаах дьыаланан дьарыктанарга санаммыттара. Улуус уонна нэһилиэктэр дьаһалталарын кытары сүбэлэһэн, эдэр ыал уопсастыбаннай тэрилтэтин тэрийэргэ быһаарыммыттара.
Үлэлэрин аһымал акциялары ыытыыттан саҕалаабыттара. Ыарыһах оҕолорго уонна улахан дьоҥҥо, олох ыар охсуутугар, иэдээҥҥэ түбэспит дьоҥҥо көмөлөһөр соруктаах икки аһымал акцияны ыытан, концерт тэрийэн, биир дойдулаахтарын сэҥээриилэрин ылбыттара. Көмөлөспүт дьонноруттан биирдэстэрэ эмтэнэн хаама сылдьарын көрө-көрө оҕолуу үөрэллэр. Руслан Семенов аһымал-дьааһыктарга нэһилиэнньэ көхтөөхтүк кыттарын бэлиэтиир. Нэһилиэнньэ ис сүрэҕиттэн оҥорбут үтүө дьыалата ыарыһах дьоҥҥо уонна соторутааҕыта буолбут улахан баһаартан эмсэҕэлээбиттэргэ кырата суох көмө буолбут. Ону сэргэ инбэлииттэр уонна кырдьаҕастар дьиэлэрин олохтоохторун дьиэтээҕи сылаас аһылыгынан кэмиттэн кэмигэр күндүлүүллэр. Дуобат, саахымат илдьэн, интернат иитиллээччилэрэ сынньалаҥнарын туһалаахтык атааралларыгар кыһаналлар.
Саҥа уопсастыба салайааччылара уонна чилиэннэрэ итини барытын тустаах үлэлэриттэн быыс булан оҥороллор. Руслан Семенов бэйэтэ оскуолаҕа уонна Культура дьиэтигэр уус-уран салайааччынан, оттон Ольга Петровна оскуолаҕа социальнай педагогунан үлэлииллэр. Ол да буоллар, эдэр ыаллар уопсастыбаннай дьыалаҕа кыттыһартан сылайбаттар. Кинилэр үлэлэрин сэргэхтик саҕалаабыттарын биһирээн, уопсастыбаны регистрациялаан, Граҥҥа киирсэргэ сүбэлииллэр.
Семеновтар 2014 с. фестивальга кыттан, уон бастыҥ ыал ортотугар киирэн, СӨ Ил Дарханыттан уонна Ыччат министиэристибэтиттэн араас наҕарааданы туппуттара.
– Кыайыы диэн кыайыы. Кыайыы диэн эт-сиин элэйиэр диэри тиритэ-хорута үлэлээһин буолбатах буоллаҕа. Онон төһөнөн дьон ортотугар сылдьаҕын, кинилэр көмөлөрүнэн кыайыы көтөллөнөҕүн да, оччонон эппиэтинэс үрдүүр. Тугу эрэ оҥорон таһаарар үлэҕэ дуу, атын өссө дьоһуннаах дьыалаҕа киирсибит киһи дуу диэн баҕа санаалаахпыт. Уопсайынан, туохха эмэ ылсыстым да, ыһыктыбат идэлээхпин. Онон былааннаабыппытын биэс сыл иһинэн тиһэҕэр тириэрдэр, олоххо киллэрэр санаалаахпыт. Кылаабынайа, куһаҕан санааларга охтубакка, наар үтүөнү, сырдыгы эрэ ыраҥалыы сырыттахха, бэйэтэ орун-оннун булар.
Инникитин чөл олоҕу тутуһууга киэҥник үлэлиэхпит, онно ыччаты тардыахпыт.
Бэйэм, Ньурбаттан төрүттээх киһи, кэргэним дойдутун Горнайы сөбүлээн, иккис дойдум буолла. Олохсуйар санаалаах, дьиэ түстээн эрэбит, – диэн эдэр ыаллары түмэр, сүрүннүүр саҥа уопсастыба салайааччыта Руслан Семенов кичим санааларын үллэстэр.
Оттон биһиги кинилэргэ ситиһиини баҕара хааллыбыт.
Комментарии
Авторизация на сайте через социальные сети