Матрена Афанасьевна кэпсээбитинэн, уон сыл устата тутуу ыытыллыбатах нэһилиэгэр комплексы дьэндэтэргэ, Лондоннааҕы Паралимпиадаҕа (2012 с.) биир дойдулаахтара Степанида Артахинова оҕунан ытыыга уһулуччу ситиһиитэ (боруонса призер буолуута) улахан тирэх буолбут. Кыыстарын кыайыытыттан улаханнык кынаттаммыт нэһилиэнньэ оччотооҕу баһылыктарын Виталина Габышеваны, улуустааҕы культура, ыччат уонна спорт дьыалаларыгар управлениены кытта сүбэлэһэн, бэрт суһаллык үлэни саҕалаабыттар. «Норуот күүһэ – көмүөл күүһэ» дииллэринии, улахан тутуу аҕыйах сыл иһигэр бар дьон көмөтүнэн түмүктэммититтэн билигин нэһилиэккэ баһылыктаан олорор Оксана Саввинова үөрүөн үөрэр.
Комплекс аһыллыытыгар улуус дьаһалтатын баһылыгын 1 солбуйааччы Павел Харбин, баһылыгы социальнай боппуруостарга солбуйааччы Евгений Березин, нэһилиэктэр баһылыктара уо.д.а. кыттыбыттар. Оҕунан ытыыга норуоттар икки ардыларынааҕы кылаастаах спорт маастара Степанида Артахинова төрөөбүт сиригэр бочуоттаах ыалдьытынан ыҥырыллыбыт.
КСК 100-тэн тахса киһи киирэр киэҥ-куоҥ саалалаах, холга теннис оонньуур остуол туруоруллубут, иккис мэндиэмэҥҥэ библиотекалаах, кабинеттаах. Ыччаттар нэһилиэк бары тэрээһинэ манна ыытылларыттан улаханнык үөрэллэр.
-- Дьиэ акылаатын уонна көҥдөйүн олохтоох тутуу биригээдэтэ, «Быйаҥ» КФХ салайааччыта Альберт Габышев, Владимир Саввинов, Владимир Канаев, Валерий Борисов, о.д.а. туппуттара. Ону Вартан Оганесян салайааччылаах биригээдэ ситэрдэ-хотордо. Саҥа дьиэни үлэҕэ киллэрэ охсор баҕаттан нэһилиэк дьоно бары күүс-көмө, өйөбүл буолан улахан хамсааһыны оҥордулар. Маны сэргэ, Дьокуускайга, республика атын улуустарыгар олорор дойдулаахтарбыт көмөлөстүлэр, -- диэн директор киэн туттар, махтанар.
Бу күн алгыс бастыҥа этиллибит, «Харысхал» этно-бөлөх, «Кустук» ансаамбыл, ырыаһыттар, үҥкүүһүттэр ис дууһаларыттан өрө көтөҕүллэн кэнсиэр бэртээхэйин көрдөрбүттэр.
Дьоро күн чэрчитинэн хапсаҕайга улуустааҕы турнир ыытыллыбыт. Күрэхтэһии абсолютнай чемпионнарыгар предпринимателлэр Николай Коротких, Альберт Габышев уонна Игорь Нутчин анал бириистэри туруорбуттар.
Олохтоохтор саҥа саалаҕа күннэтэ мустаннар тэрээһиннэргэ көхтөөхтүк бэлэмнэнэллэр. Онуоха бу күннэргэ СР Спортка министерствотын өйөбүлүнэн ылыллыбыт саҥа тренажердар кэлиэхтээхтэрэ санааларын өссө улаханнык көтөхпүт.
Комментарии
Авторизация на сайте через социальные сети