РФ Экономикаҕа министиэристибэтин дааннайынан, 2015 сылга дойду үрдүнэн 35,4 мөл. т уматык туһаныллыбыт буоллаҕына, кэлэр сылга 36,4 мөл. т тиийиэ диэн быһаараллар. Онон билиҥҥи былаанынан ньиэп бородууктатын оҥорор собуоттар хааччына соҕус 39,7 мөл. т уматыгы бэлэмниэхтэрэ.
Москватааҕы уматык ассоциациятын генеральнай дириэктэрин солбуйааччы Григорий Сергиенко этэринэн, кэлэр сылга бензин сыаната ортотунан 6,5 бырыһыан үрдүөҕэ. Ол аата 2 солкуобай. Ону тохсунньу 1 күнүттэн Евро-5 кылаастаах бензин акциһа 2000 солк. үрдээһинин кытта сибээстииллэр.
Ньиэп хампаанньалара 2016 сылга уматык сыаната үрдүүрэ-үрдээбэтэ кулун тутар ый саҕана биллиэ диэн тойоннууллар. Ол гынан баран, Россиятааҕы уматык сойууһун вице-президенэ, «Афайол» хампаанньа генеральнай дириэктэрэ Ринат Фаттахов кэлэр сыл олунньугар бензин сыаната үрдүөн оннугар 1 солк. түһүө диэн сабаҕалыыр.
Экспертэр санаалара
Саха сиригэр кэлэр сыл саҥатыгар уматык сыаната хайдах буолуоҕун өрөспүүбүлүкэҕэ бензини атыылыыр «Саханефтегазсбыт» ААУо, «Сибойл» ХЭУо хампаанньалартан ыйыталастыбыт.
«Саханефтегазсбыт» ААУо пресс-сулууспатын үлэһитэ Сергей Шугаев:
– Кэлэр сыл тохсунньу 1 күнүттэн хампаанньа атыылыыр уматыгын сыанатын үрдэппэт. Уопсайынан, 2016 сыл бастакы кыбартаала бүтүөр диэри сыана уларыйыа суоҕа.
«Сибойл» хампаанньа генеральнай дириэктэрэ Сергей Черных:
– Тэрилтэ кэлэр сыл тохсунньу 1 күнүттэн бензин сыанатын үрдэтиэ суоҕа.
Гаас уматык сыаната хайдах буолуой?
Бензин сыаната күн-түүн ыарыы турара тимир көлөлөөхтөр хармааннарыгар охсуута улахан. Ол иһин, дьон саҥа технология быһыытынан бензин оннугар гааһы туһанар буолан эрэр. Дьокуускай куоракка гаас уматыгынан (пропан-бутан) анал станцияҕа саппараапкалыыллар. Саха сиригэр бу уматыгы «Сахатранснефтегаз» уонна «ЯТЭК» хампаанньалар атыылыыллар.
Бу икки хампаанньаҕа сыана араас: «Сахатранснефтегаз» гаас 1 лиитирэтин 18 солк. атыылыыр буоллаҕына, «ЯТЭК» 15 солк. батарар.
Ааспыт нэдиэлэ саҥатыгар «Сахатранснефтегаз» ААУо генеральнай дириэктэрэ Иван Макаров суруналыыстары кытары көрсүһүүгэ бу боппуруоска: «Бүгүҥҥү күҥҥэ хампаанньаҕа гаас уматык 1 лиитэрэтэ 18 солк. буоллаҕына, «ЯТЭК» 15 солк. атыылыы олорор. Онон биһиги “ЯТЭК”-тар сыаналарыгар тэҥнэһэр сыалтан үүнэр 2016 сыл саҥатыгар ити боппуруоһу булгуччу быһаарыахпытын наада», – диэн бэйэтин санаатын үллэһиннэ.
Комментарии
Авторизация на сайте через социальные сети