Биһиги эдэр тустууктарбыт хаалсыбаттар. Хаандыгаҕа кинилэр сайыҥҥы спортивнай лааҕырга дьарыктаннылар. Кинилэр ортолоругар Хаандыга б., Новай уонна Мэҥэ Алдан сэлиэнньэтин бэрэстэбиитэллэрэ бааллар. Дьокуускай к. олимпийскай эрэл училищетын үс иитиллээччитэ уонна Өймөкөөн оройуонун биир бэрэстэбиитэлэ сырыттыллар. Барыта 25 оҕо дьарыктанна.
Оҕолор күҥҥэ иккитэ Хаандыгатааҕы хайа-геологическай техникум спортивнай саалатыгар дьарыктаннылар. Тренер Михаил Аммосов бэлиэтииринэн, бу үөрэх тэрилтэтин салалтата улахан өйөбүлү оҥордо. 15 оҕо техникум уопсайыгар олордулар, онно усулуобуйа барыта баар. Остолобуойга аһаан сырыттылар. Оройуон дьаһалтата 15 оҕо аһыырын төлөөтө, асчыт уонна эмп үлэһитин хамнаһын көрдө. 10 оҕо дьиэлэриттэн сырыттыллар.
Оҕолор Михаил Протопопов уонна Виталий Саввин салалтатынан эрчилиннилэр. Кинилэр ортолоругар көҥүл тустууга Саха сирин сүүмэрдэммит хамаандатын үс чилиэнэ бааллара. Бу Олимпийскай эрэллэр училищетын иитиллээччитэ Ефим Протопопов, Ыҥаа оҕо спортивнай оскуолатын иитиллээччилэрэ Сайыына Малышева уонна Женя Огородникова. Кинилэр үһүөн норуоттар икки ардыларынааҕы «Азия оҕолоро» Оонньууларга кыттарга Саха сирин сүүмэрдэммит хамаандатыгар бастакы нүөмэринэн сылдьаллар. Атын оҕолор кинилэри кытта сылдьаллара улахан көдьүүстээх, аатырар биир саастыылаахтарын кыайарга дьулуһаллар.
Ефим Протопопов 8 кылааһы бүтэрдэ. Быйыл 50 киилэҕэ өрөспүүбүлүкэ чөмпүйүөнэ, муус устарга Кыргызстаҥҥа норуоттар икки ардыларынааҕы турнирга үһүс буолбута. Бастакы юношескай разрядтаах. Дьокуускайга Василий Уваровка дьарыктанар.
Максим Лебедев Тополинайтан төрүттээх. Үс сыл Ыҥаа ОСО-тугар дьарыктаммыта, билигин ОЭУ иитиллээчитэ. Онно нэдиэлэҕэ 5 күн, күҥҥэ иккилиитэ эрчиллэр. 54 киилэ ыйааһыҥҥа тустар. Кыргызстаҥҥа эмиэ үһүс призёр буолбута. Краснодар к. турнирга барар, ол кэнниттэн Абхазияҕа сүүмэрдээһиҥҥэ хаалар.
Сайыына Малышева төрдүс сылын Ыҥаа оскуолатыгар дьарыктанар, билигин 5 кыыс сылдьар. 30 киилэ ыйааһыҥҥа тустар. Урут остуол тенниһигэр уонна волейболга оонньуура. Тустууга таптыыр ньымалара өттүктээн быраҕыы, нырок, күлүүс, «Ватанабэ» (Е.Н.: аатырбыт дьоппуон тустуугун аатынан).
Биһиги тустууктарбыт ыалдьааччыларын ситиһиилэринэн үөрдэллэр. Кинилэр төһө да эдэр буолаллар, ситиһии күнтэн күн ахсын дьаныардаахтык дьарыктаннахха кэлэрин өйдүүллэр.
Комментарии
Авторизация на сайте через социальные сети