ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
4 сентября 2015, 15:52

Аан дойду түһүлгэтигэр Виктор Лебедевкэ сүрүн утарсыыны ким оҥоруоҕай?


Бары билэргит курдук, балаҕан ыйын 7-12 күннэригэр Лас-Вегас куоракка (АХШ) көҥүл тустууга аан дойду чемпионата буолар. Бу улахан түһүлгэҕэ Россия чиэһин 57 киилэҕэ диэри ыйааһыҥҥа биир дойдулаахпыт, аан дойду икки, дойду биэс төгүллээх чемпиона, Европа бастакы оонньууларын кыайыылааҕа Виктор Лебедев көмүскүөҕэ.

Сүүрбэ сэттэ саастаах Виктор Лебедевкэ Лас-Вегастааҕы көбүөр бэһис аан дойдутааҕы түһүлгэтинэн буолуоҕа. Кини планета чулууларын күрэхтэһиититтэн үстэ мэтээллээх эргиллибитэ — иккитэ кыһыл көмүс (2010, 2011) уонна биирдэ боруонса (2009).

Саха бөҕөһө быйыл тахсыылаахтык туһунна — тохсунньуга Иван Ярыгин турнирын кыайыылааҕынан буолбута, ыам ыйыгар дойду чемпионун аатын бэһис төгүлүн ылбыта, Европа бастакы оонньууларыгар итэҕэтиилээхтик бастаабыта.

Кулун тутарга Стамбулга ыытыллыбыт «Яшар Догу» турнирыгар Реджеп Мунир Акташка 2:3 ахсаанынан баһыйтарыаҕыттан ыла (онно кини 61 киилэҕэ диэри ыйааһыҥҥа өрө тахсан тустан үһүс миэстэни ылбыта), билиҥҥитэ хотторуу хомолтотун билэ илик - уон хапсыһыытын барытын кыайыынан түмүктээтэ. Олорго 54 очукуону сурунна, утарылаһааччыларыгар 13-һү биэрдэ.

Аан дойду чемпионатыгар Виктор Лебедевкэ сүрүн утарсыыны кимнээх оҥоруохтарай диэн ыйытыы саха тустууну сэҥээрээччилэрин долгутар буолуохтаах. Манна бастатан туран аан дойду чемпионнарын - кореец Янг Кьонг Илы (2009, 2014) иранец Хасан Рахими (2013), Грузияттан Олимпиада үрүҥ көмүс призерун Владимир Хинчегашвилины, Кубаттан былырыыҥҥы чемпионат боруонса призерун Йовлиса Бонне ааттаталыахха сөп. Урут Виктор иранеһы иккитэ хотон, былырыын аан дойду чемпионатыгар баһыйтаран турардаах. Оттон грузины Европа чемпионатыгар кыайбыта, кореецка Иван Ярыгин турнирыгар хотторбута. Арай Йовлис Боннены кытта туста илик. Бука, биһиги бөҕөспүтүгэр ыарахан «таһаҕас» буолара буолуо.

Балары сэргэ Турцияттан Сезер Акгул, Белоруссияттан Асадул Лачинов, Казахстантан Артас Санаан, Японияттан Фумитака Моришитан, киргиз Надырбек Уллу Самат, монгол Бехбайар Эрденебат уонна американец Тони Рамос эмиэ мэтээлгэ дураһыйар, Олимпиадаҕа путевканы ыларга суоттанар буолуохтаахтар .

Wrestdag.ru аан дойду чемпионатын көрсө социальнай сеттэргэ ыыппыт ыйытыгар эппиэттээбит тустууну сэҥээрээччилэр 54,8 бырыһыаннара Виктор Лебедев кыайыаҕа диэн эппит. 20,6 бырыһаннара кыайыыны Владимир Хинчегашвилига биэрбит. Ыйытыллыбыт дьон тоҕус бырыһыана Хасан Рахими пъедестал үрдүкү үктэлин дабайарыгар итэҕэйэрин эппит.

Санатан эттэххэ, Виктор Лебедевы сэргэ аан дойду түһүлгэтигэр саха тустууга оскуолатын үс иитиллээччитэ кыттар: Таджикистантан - Николай Ноев, Белоруссияттан - Александр Контоев уонна Киргизияттан - Айаал Лазарев.

При частичном или полном использовании материалов гиперссылка на сайт ysia.ru обязательна.
Категория: Спорт Просмотров: 782 Источник: ЯСИА Автор: Роман Попов Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ