ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
2 декабря 2015, 11:09

Саҥа дьыллааҕы сахсаан кэмигэр сэрэҕи умнумаҥ!


Эмиэ биир сыл элэстэнэн ааһан эрэр. Сотору Саҥа дьыл бырааһынньыгар бэлэх, кэһии, ас-таһаҕас, таҥас-сап атыылаһыы түбүгэ саҕаланыа турдаҕа. Дьокуускай болуоссаттарыгар харыйалары туруортаары үлэлии-хамсыы сылдьалларын көрөн, киһи ол настарыанньаҕа кыралаан ылларан киирэн барар. Ол гынан баран, бырааһынньыктааҕы сүпсүлгэн да кэмигэр сэрэҕи сүтэрбэт наада. Онуоха тугу билэр нааданый?

Ис дьыала уорганнарын статистиката көрдөрөрүнэн, атыы-эргиэн дьиэлэрин, ырыынактар, кууһунан атыылыыр базалар оройуоннарыгар буруйу оҥоруу бу кэмҥэ биллэрдик элбиир. Уонна итинник сирдэргэ уоруу, халааһын үксүгэр сиэртибэ бэйэтин дьалаҕайыттан, көтүмэҕиттэн тахсар. Холобура, ыксыы сылдьар киһи, ырыынакка дуу, маҕаһыыҥҥа дуу киирээри, массыынатын собуоттаан баран хаалларар эбэтэр таһаҕаһын таһа сылдьан, аанын аһаҕас хаалларан кэбиһэр. Массыыналары, табаардары уордахтара ол. Маннык түбэлтэлэр сылын аайы тахсаллар.

Аны куоракка элбэх харчылаах кэлээри сылдьан, ол туһунан бөһүөлэк дьонугар уҥа-хаҥас кэпсиир наадата суох диэн полиция сүбэлиир. Ол эн дойдуҥ дьонун туһунан куһаҕаны саныыргар буолбатах, -- ол сонун алҕас “туора кулгаахха” иһиллиэн сөбүттэн сэрэнэн.

Бэйэ тутта-хапта сылдьыытын туһунан. Ыксалга кумааһанньыккын тас сиэптэргэр, суумкаҥ үөһэтигэр укта сылдьарыҥ, атыыласпыт малларыҥ үрдүгэр уурарыҥ букатын табыллыбат. Харчыны хас да гына үллэрэн, иһирдьээҥҥи сиэптэргэ тус-туспа араартаан илдьэ сылдьар ордук.

Аҕыйах тыл -- дьиэҕэ-уокка сэрэхтээх буолуу туһунан. Араас Тымныы Оҕонньотторго, Хаарчааналарга, ыҥырыллыбатах ыалдьыттарга ааҥҥытын мээнэ аһан биэримэҥ. Онтон ыалга бырааһынньыктыы барарга, дьиэни-уоту үчүгэйдик хатаан, түннүгү-үөлэһи бүөлээн-сабан барар ордук.

Оттон эгэлгэ салюттары, фейерверктэри, петардалары, пиротехническэй оҥоһуктары ырыынактан буолбакка, маҕаһыынтан атыылаһарга сүбэлииллэр. Онуоха харайыллар болдьоҕун болҕойон ааҕар ордук. Алдьаммыт, имиллибит-хомуллубут буоллаҕына, ылыма. Инструкцията хайаан да нууччалыы тылынан суруллубут буолуохтаах.

Саҥа дьыллааҕы бырааһынньыгы туох да сүтүгэ суох көрсөргүтүгэр баҕарабын.

При частичном или полном использовании материалов гиперссылка на сайт ysia.ru обязательна.
Категория: Жизнь Просмотров: 753 Источник: ЯСИА Автор: Вера Макарова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ