Бу үөрүүлээх түгэҥҥэ СӨ бырабыыталыстыбатын бэрэссэдээтэлэ Галина Данчикова, СӨ үөрэҕин миниистирэ Феодосия Габышева, СӨ ОДьКХ уонна энергетикаҕа миниистирэ Алексей Колодезников, СӨ архитектураҕа уонна тутуу комплексын миниистирин 1-кы солбуйааччы Павел Аргунов, уо.да. а. кытыннылар.
Санатар буоллахха, 2012 сыллаахха анал хамыыһыйа эргэ оскуоланы саахалланар туруктаах диэн быһааран, СӨ инвестиционнай бырагырааматыгар киллэрэн, саҥа дьиэ тутуллар буолбута. Ити сыл боппуруос быһаарыллан, «Монтажник» ПК (дириэктэр Александр Ханин) саҥа дьиэ тутуутун саҕалаабыта. Бырайыак быһыытынан оскуолаҕа 40 оҕо үөрэнэр уонна аҥарыгар, ол эбэтэр оҕо саадыгар 15 иитиллээччи сылдьар кыахтаахтар. Саҥа оскуола Билии күнүн 44 оҕолоох көрүстэ. Маҥнайгы кылааска алта оҕо киирдэ. Кэлэр сылга оскуоланы биэс оҕо бүтэриэхтээх. Эһиил маҥнайгы кылааска аҕыс оҕо үөрэнэ киириэхтээх.
СӨ бырабыыталыстыбатын бэрэссэдээтэлэ Галина Данчикова олохтоохтору, үөрэнээччилэри, тутааччылары Билии күнүгэр саҥа оскуола үлэҕэ киирбитинэн эҕэрдэлээтэ, үтүө суобастаахтык үлэлээбит дьоҥҥо анал махтал суруктары туттартаата. Саҥа кыһа үлэҕэ киирбитин аһар аалай лиэнтэни быһыы кэнниттэн үгэс курдук саҥа кыһа кылаастарын көрүү-истии буолла. Барыта уурбут-туппут курдук тупсаҕай, сырдык-ыраас. Галина Данчикова хас биирдии кылааһы кэрийэн көрдө-иһиттэ. Оҕолору кытта кэпсэттэ, хас биирдиилэригэр ситиһиилээхтик үөрэнэллэригэр алгыс тыллары эттэ.
Саҥа хочуолунай. Батамай олохтоохторугар иккис үөрүүлээх түгэн. Ол курдук, оттук сезона саҕаланаары турдаҕына, 3,2 мегабатт кыамталаах саҥа хочуолунайы үлэҕэ киллэрии сиэрэ-туома ыытылынна. Саҥа объект 1,25 мегабаттаах икки уонна 0,8 мегабаттаах хочуоллардаах. Үһүс хочуол резервеҕэ турар. Ыксаллаах быһыы-майгы үөскээтэҕинэ биирдэ туһаныллыаҕа.
Саҥа хочуолунай үлэҕэ киирэн, олохтоохтор үөрүүлэрэ муҥура суох. Тоҕо диэтэххэ, дьиэлэри төһө кыалларынан кииннэммит ититэр тиһиккэ холбуохтара. Үгүс ыал бэлэм олорор. Барыта 45 дьиэҕэ ититэр ситим тиэрдиллиэҕэ. Быйыл 30-ча ыалга киллэрэри былааннаабыттар. Онон Батамай олохтоохторугар балаҕан ыйын 1 күнэ икки бүк үөрүүнү бэлэхтээтэ.
Комментарии
Авторизация на сайте через социальные сети