ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
16 декабря 2015, 10:15

Көс оскуола: Саҥа балааккаҕа үөрэх


Ааспыт үѳрэх дьылыгар Өлөөн оройуонун Харыйалаах кѳс оскуолатын учуутала суох буолан, ыстаадаҕа үѳрэниини кыайан тэрийбэтэхпит. Оттон быйыл тахсыахтаах, үѳрэттэрбит учууталбыт кыра оҕото ыалдьарынан, эмиэ кыайан тахсыбат буолбута. Онон дьаһалта үлэһиттэрэ сүбэлэһэн баран, предметчик учууталлары командировкалаан, үѳрэҕи саҕалыахха диэн түмүккэ кэлбиппит.

Бастакынан урут үлэлии сылдьыбыт учууталы Белолюбская Василиса Христофоровнаны ыыттыбыт. Кини уонча хонукка тахсан, үлэни саҕалаан киирдэ. Мантан салгыы кини кэпсээнин истиэҕиҥ:

Ыстаадалар кыстыыр сирдэригэр Түбэ үрэҕэр саҥа кѳһѳн кэлбиттэр. Урукку сирдэрин, базалаах, дьиэлээх сирдэрин, таба аһа тэпсиллибитинэн, аҕыйаабытынан атын сиргэ кыстаары кэлбиттэр. Онон били үчүгэй баҕайы дьиэ туран хааллаҕа дии. Ол оннугар, саҥа технологиянан тигиллибит, сабыс-саҥа, ичигэс балаакка биэрбиттэрин туруордубут. Саҥа учуутал кыыс тиийдэҕинэ, итиннэ олорон оҕолору үѳрэтиэхтээх. Онон кини билэн киириэҕэ, тѳһѳ ичигэһин. Сүрдээх киэҥ-куоҥ балаакка, 5х5 иэннээх. Сүүстээх буочуканан оҥоһуллубут тимир оһох кыра диэннэр, табаһыттар бэйэлэрин икки сүүстээх буочуканан оҥоһуллубут тимир оһохторун биэрэн туруортардылар.

photoByWidth&id=52229&width=1000

Билигин мин үс оҕону – Никон Христофорову (6 кылаас), Таня Матвееваны (8 кылаас), Валентин Степановы (3 кылаас) үѳрэтэн киирдим. Икки дьиэ үлэһитэ оҕолорун саҥа дьыл кэнниттэн илдьэ тахсыахтара, оччоҕо уонча оҕо буолуоҕа. Астара-үѳллэрэ баар. Бензин кыайан булбакка, ол эрэ тиийэ илик. Оҕолор үѳрэ-кѳтѳ үѳрэнэллэр. Кинилэр үѳрэнэр балааккаларын хомуйан туруорууга, бырааттарым улаханнык кѳмѳлѳстүлэр. Матвеев Александр, түс-бас киһи диэх курдук, барыта киниэхэ эрэ баар. Тоһоҕото, ѳтүйэтэ, туттар тэрилин барытын илдьэ сылдьар эбит. Барыта кини тэрилинэн тутуннубут. Кѳс оскуола бастакы выпускнига Семен Степанов, билигин бэйэтэ үөрэнэр оҕолордоох тѳрѳппүт, саҥа дьыл кэнниттэн оҕолорун таһаараары, эргэ базаттан хаптаһын тиэйэн кэлэн, итиччэ улахан, аны бэлэм каркаһа суох балаакканы туруордулар. Табаһыт Андрей Иванов кѳмѳтѳ эмиэ улахан. Онон кылгас кэмҥэ элбэх үлэни кѳрүстүлэр уонна кѳс оскуола үлэлиир усулуобуйатын оҥордулар. Онон, бырааттарбар махтал, – диэн кэпсээнин түмүктээтэ.

Ити Василиса Христофоровна кэпсиир балааккатын интернеккэ кѳрѳн, Нерюнгрига баар «Баай мас» фирматтан сакаастаабытым, тѳлѳбүрүн, оройуон дьаһалтата, баһылыкпыт Иванов А.С. уйуммута. Олох саҥа технологиянан тигилиннэ диэн реклама бѳҕѳ этэ, ичигэс, тыал хоппот, ардахха тэстибэт диэн, ону ити боруобалаары сылдьабыт.

photoByWidth&id=52230&width=1000

Түмүккэ, сүрдээх түбүктээх, ыарахан үлэбитин саҕаласпыт дьоммор В.Х.Белолюбскаяҕа, кини уолугар Олегка, ыстаада табаһыттарыгар истиҥ махталбын тиэрдэбин. Ыстаада биригэдьиирэ, эмиэ кѳс оскуола выпускнига Христофор Степановка, табаһыт Григорий Степановка, саҥа үлэлии тахсар эдэр учууталбытын Ульяна Христофорованы тэрийсэн илдьэ тахсыбыттарыгар эмиэ махтал. Эдэр дьон үлэлэрэ–хамнастара таһаарыылаах буоллун, доруобай буоллуннар диэн алгыы хааллыбыт.  

 

К.В.Кириллова, кѳс оскуола салайааччыта 

 

Хаартыскаҕа: саҥа балаакка-оскуола тас кѳстүүтэ уонна кѳс оскуола үѳрэнээччилэрэ саҥа дьылга аналлаах пластилинынан оҥоһуктарын кытта.

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 679 Источник: ЯСИА Автор: СИА Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ