Ону сэргэ бу күн научнай-практическай конференция ыытыллыа. Конференция аһыллыытыгар «Луохтуур Сокольников» диэн документальнай киинэ көрдөрүллүөҕэ.
Прокопий Нестерович олоҕун туһунан интэриэһинэй кэпсэтии тахсыаҕа, саҥа чахчылар биллиэхтэрэ. Ол иһигэр, медицинскэй наука доктора, СӨ наукатын үтүөлээх деятелэ Карл Башарин П.Сокольниковы саха норуотуттан бастакы быраас быһыытынан, М.К.Аммосов аатынан ХИФУ доцена, педагогическай наука кандидата Фекла Сокольникова аймаҕа Прокопий Нестерович төрүччүтүн, медицинскэй наука доктора, П.А.Петров аатынан СӨ Судаарыстыбаннай бириэмийэтин лауреата Валериан Николаев кини уопсастыбаннай олоҕун сырдатыахтара.
Ыспыраапка:
Прокопий Нестерович Сокольников 1865 с. от ыйын 1 күнүгэр Боотуруускай улууһун 3-с Дьохсоҕон нэһилэгэр Нэлэгэр диэн алааска төрөөбүтэ. Кинини быраас эрэ буолбакка, амарах дууһалаах, үтүө сүбэһит-амаһыт, боростуой дьон улахан доҕорун быһыытынан билэллэрэ. Прокопий Нестерович политическай сыылынайдар эрэллээх доҕордоро этэ. Э.К. Пекарскай сахалыы тылдьыты оҥороругар күүс-көмө буолбута. Прокопий Сокольников өссө биир үтүөтүнэн нуучча суруйааччытын Лев Толстойу кытта билсиһиитэ, Саха сирин Толстойу кытта сибээстээһинэ буолар.
Саха луохтуура элбэх сыратын биэрэн, 1912 с. бастакы типовой балыыһа дьиэтин туттарбыта. Кэлин Чөркөөххө уонна Чычымахха фельдшерскэй пууннары астарбыта. Прокопий Нестерович ыарыылар тарҕаныыларыгар олох-дьаһах усулуобуйата улахан оруолу ыларын тоһоҕолоон бэлиэтиирэ. Дьадаҥы дьон олоҕо быстар куһаҕаныттан улаханнык хараастара.
Сахалартан үрдүк үөрэхтээх маҥнайгы луохтуур 1917 с. ахсынньы 10 күнүгэр баара-суоҕа 52 сааһыгар өлбүтэ, Чурапчыга көмүллүбүтэ.
Комментарии
Авторизация на сайте через социальные сети