Бу күн поэттар Саргылаана Гольдерова-Саргы Куо, Наталья Михалева-Сайа, Мария Алексеева, Мэхээс Сэмэнэп, Ирина Харайданова, Любовь Горохова-Сүүмэх, Александра Попова-Долгура, Елизавета Мигалкина, Дорҕоон Дохсун Борогууһун уо.д.а. хоһооннорун бэйэлэрэ аахтылар.
Ону сэргэ поэттар айымньылара туохтан сиэттэрэн суруллубутун, оччотооҕу ис туруктарын, поэзия туһунан тус өйдөбүллэрин кэпсээтилэр.
Анатолий Старостин-Сиэн Кынат «Литература сыала-соруга тугуй»? диэн ыйытыыга: «Норуот иэйиитин-куойуутун кырдьыктаахтык биэрии, бэйэтин норуотун ис санаатын, сүрүн-кутун суруйуу – ол дьиҥнээх литература буолар», – диэн санаатын үллэһиннэ.
«Күрүлгэн» литературнай-публицистическай сурунаал эрэдээктэрэ, Иван Гоголев-Кындыл аатынан литературнай бириэмийэ лауреата Афанасий Гуринов-Арчылан бэйэтин хоһоонунан мустубут дьону төрөөбүт дойду ахтылҕаныгар куустаран ылла. Кырдьыга да, айар үлэ алыптаах аартыгын арыйарга (баҕар, бэйэбит да билбэппитинэн) төрөөбүт дойдуҥ, чугас дьонуҥ сиэтэн киллэрэллэр. Ол да иһин, Арчылан төрөөбүт дойду туһунан хоһоонун билиһиннэриини маннык тылларынан саҕалаатаҕа:
«Үүтүн тохпут оҕо курдук кэри-куру буоллум» диэн этии баар. Ол курдук, киһи үүтүн тоҕоруттан саҕалаан, киһи олоҕор хомолтолоох түгэннэр баар буолаллар. Уончалаах саастаахпар эбитэ буолуо, биирдэ санаам түспүт кэмигэр таайым Иван Ксенофонтович Федотов билиҥҥэ диэри умнубат тылларбын этэн турар. Кини миэхэ: «Санааҕын хайа да түгэҥҥэ түһэрбэт буол. Эн ол күнү көрөҕүн, эн ол былыты көрөҕүн, ол аата эн тыыннааххын, ол аата эн дьоллооххун. Уол оҕо биир күн ат өрөҕөтүгэр, биир күн ат арҕаһыгар».
Литературнай музей научнай үлэһитэ, алгысчыт Егор Дохунаев-Наҕыл «Хас биирдии киһиэхэ хамнатар күүс баар буолуохтаах, ол күүс умайа сылдьар кутаа уокка маарынныыр буолуохтаах» диэн тойоннооһунуттан «Кутаа уот» диэн хоһооно суруллубут.
Поэттар хоһоонноругар суруллубут ырыалары сцена бэтэрээнэ Зинаида Евсеева-Тойуктаах Токуева, Опера уонна балет, Эстрада, Саха театрдарын артыыстара толордулар.
Ыытааччылар Маргарита Иванова уонна Татьяна Апросимова хас биирдии хоһоонньуту кылгастык билиһиннэриилэрэ көрөөччү кинилэри өйдөөн хааларыгар көмөлөспүтэ, поэт уонна ааҕааччы икки ардыгар быстыбат ситими олохтообута саарбаҕа суох.
Саха Өрөспүүбүлүкэтин народнай поэта Иван Гоголев төрөөбүтэ 85 сылыгар кыргыттара устубут «Күн хайата» саҥа документальнай киинэлэригэр поэт сырдык мөссүөнэ көстөн, тыыннаах куолаһа иһиллэн ааста.
Хоһоонньуттарга барыларыгар поэзия киэҥ түһүлгэтигэр кыттыбыттарын туоһулуур «Бичик» кинигэ кыһатын анал бэлиэтин, ырыаһыттарга сертификаттары туттардылар.
Комментарии
Авторизация на сайте через социальные сети