ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
26 ноября 2015, 14:39

Чурапчы улууһун дьоно-сэргэтэ луохтуур Прокопий Сокольников аатын үйэтитиигэ үлэлэһэр


Сахаттан бастакы үрдүк үөрэхтээх луохтуур Прокопий Нестерович Сокольников быйыл төрөөбүтэ 150 сыллаах үбүлүөйүн Чурапчы улууһун дьоно-сэргэтэ киниэхэ ытыктабылынан, сүгүрүйүүнэн бэлиэтиир, үйэтитиигэ үлэлэһэр.
Үбүлүөйдээх сыл чэрчитинэн араас дьаһаллар сылы быһа ыытылыннылар. Сэтинньи 20 күнүгэр „Айылгы“ Култуура уонна духуобунай сайдыы киинигэр П.Н. Сокольников олоҕун, үлэтин ахтан ааһар дьоро күн буолла. Итиннэ улуустааҕы доруобуйа харыстабылын үлэһиттэрэ, тэрилтэ салайааччылара, ыаллыы Таатта улууһун делегацията, ыҥырыылаах ыалдьыттар сырыттылар.
Сарсыарда 10 чаастан Прокопий Нестеровичка аналлаах «төгүрүк остуолга» киин балыыһа үлэһиттэрэ, улуус кыраайы үөрэтээччилэрэ кытыннылар. Сахаттан бастакы бырааспыт туһунан „Саха“ НКИК „Аал луук мас“ биэрии редактора Д.Д. Бястинов уһулбут „Луохтуур Сокольников“ диэн документальнай киинэтэ көрдөрүлүннэ. Бу айымньыны ырытыыга кыраайы үөрэтээччилэр В.Д. Пинигина, Ю.С. Толстоухов, М.Е. Филиппова, учуутал Л.М. Винокурова, киин балыыһа үлэһиттэрэ Л.М. Григорьева, А.В. Седалищева, о. д. а. кыттыыны ыллылар. Мэлдьэхси көһөрүллэ сылдьар музейын төрүттээбит А.Д. Аммосов бу нэһилиэктэн доруобуйа харыстабылыгар үлэлээбит дьон мэтириэттэрин быыстапкалыыр саалаҕа туруорда, хас биирдиилэрин туһунан көрөөччүлэргэ сиһилии билиһиннэрдэ.
Сцена аһыллаатын кытта, экраҥҥа уун-утары П.Н. Сокольников мэтириэтин аннынан 150 саас диэн ырылыччы суруллан турара ыытыллар дьаһал сыалын-соругун тута көрөөччүлэргэ тиэртэ.
photoByWidth&id=50400&width=1000
Чурапчытааҕы народнай театр туруоруутунан „Луохтуур Сокольников“ литературнай дьүһүйүү көрдөрүлүннэ. Артыыстар Алексей Ходулов, Гаврил Лебедев, Ольга Ноева, Надежда Заболоцкая, Кэнчээри Слепцов, Иван Бушков сахаттан бастакы быраас Саха сиригэр кэлиитин, эмтээһиҥҥэ бастакы хардыыларын туһунан итэҕэтиилээхтик, долгутуулаахтык оонньоотулар. Экраҥҥа Прокопий Нестерович олоҕун, үлэтин туоһулуур түгэннэр көрдөрүллэн истилэр.
П.Н. Сокольников олоҕун, үлэтин туһунан дакылааты улуус баһылыгын социальнай боппуруостарга солбуйааччы О.Ф. Петрова оҥордо.
П.Н. Сокольников Боотуруускай улууһун үһүс Дьохсоҕон (билигин Чөркөөх) нэһилиэгэр төрөөбүтэ. Томскайдааҕы университет медицинскэй факультетыгар, Москватааҕы университет медицинскэй факультетыгар үөрэнэн быраас идэтигэр үрдүк үөрэҕи бүтэрбитэ. И.М. Сеченев, Н.Ф. Филатов, Н.В. Склифосовскай курдук улуу учуонайдарга үөрэммитэ. Чурапчыга кэлэн участковай бырааһынан үлэлээбитэ. Билигин Чурапчытааҕы киин балыыһа кини аатын сүгэр.
Үбүлүөйдээх сылы бэлиэтээһиҥҥэ өрөспүүбүлүкэтээҕи, улуустааҕы хамыыһыйалар тэриллэн, үгүс өрүттээх үлэни ыыттылар. Оройуоҥҥа доруобуйа харыстабылын сайдыытын туһунан кинигэ бэчээттэннэ, „Луохтуур Сокольников“ киинэ уһулунна, научнай-практическай конференциялар ыытылыннылар, Олоҥхо ыһыаҕар киниэхэ аналлаах балаҕан тутулунна, уҥуоҕар мэҥэ таас туруорулунна. Үлэ ветерана, ССРС култууратын туйгуна В.Н. Дьячковскай Прокопий Нестерович 1912 сыллаахха туттарбыт балыыһатын макетын оҥордо. Кэлэр өттүгэр саҥа балыыһа таһыгар бюст туруоруллуута, кинигэ таһаарыыта, И.С. Клиорина суруйбут драматын туруоруу, өрөспүүбүлүкэтээҕи научнай-практическай конференцияны ыытыы, о. д. а.үйэтитиигэ туһуламмыт үлэ-хамнас былааннанар.
Бу бэлиэ күнүнэн улуус баһылыга А.Т. Ноговицын, улуус депутаттарын сэбиэтин председателэ Я.П. Оконешников, киин балыыһа кылаабынай бырааһа А.И. Коркин, улуус эмчиттэрин профсоюһун председателэ У.Д. Попова, Чөркөөхтөн И.Я. Жерготова эҕэрдэ тыл эттилэр.
Бу үөрүүлээх дьаһалга улууспут доруобуйа харыстабылын бастыҥ үлэһиттэригэр наҕараадалар туттарылыннылар. Улууска доруобуйа харыстабылын историятын үөрэтиигэ, музейы үлэлэтиигэ таһаарыылаахтык үлэлиир Л.М. Григорьеваҕа „Гражданскай килбиэн“ бэлиэни туттарыы дохсун ытыс тыаһынан доҕуһуолланна. Улуус баһылыгын бочуотунай грамотатынан А.А. Попов, бочуотунай грамотанан, үрүҥ көмүс бэлиэнэн А.В. Седалищева, улуус сэбиэтин грамотатынан И. Г. Салгынова, „Улуус социальнай-экономическай сайдыытыгар киллэрсибит кылаатын иһин“ үһүс степеннээх бэлиэнэн В.А. Гоголев, Д.Д. Бястинов, махтал суругунан В.Д. Пинигина, В.Н. Дьячковскай, И.И. Бушков, „Саха Республикатын доруобуйа харыстабылыгар туйгуна“ бэлиэни Л.А. Лыткина, С.Д. Пудова, В.Ф. Трофимова, А.А. Николаева, М.Р. Митина ыллылар. Российскай Федерация эмкэ үлэһиттэрин профсоюһун президиумун бочуотунай грамотатынан А.Т. Винокурова наҕараадаланна. СР Доруобуйа харыстабылыгар министиэристибэтин бочуотунай грамоталарынан П.Ф. Слепцова, У.С. Соломова, Е.Е. Белина, Г.П. Васильев наҕараадаланнылар. Оттон улуус баһылыгын бочуотунай грамотатын А.А. Федоров, Е.Н. Попова туттулар.
photoByWidth&id=50401&width=1000
Үбүлүөйдээх сылга оҕолорго П.Н. Сокольниковка аналлаах уруһуй уонна хоһоон куонкуруһа ыытыллыбыта. Ити түмүгүн дьүүллүүр хамыыһыйа чилиэттэрэ А.В. Седалищева, Л.М. Григорьева иһитиннэрдилэр. Орто сүһүөх үөрэнээччилэргэ хоһооҥҥо Нарыйа Макарова, улахаттарга Юля Монастырева кыайыылааҕынан тахсан анал бириистэринэн наҕараадаланнылар. Оттон уруһуйга Сандаара Керемясова, Алена Никифорова, Айта Макарова бастакы миэстэлэри ыллылар.
Үөрүүлээх бырааһынньык ыллам ырыанан, сахалыы үҥкүүнэн доҕуһуолланна.
Саха норуотуттан бастакы профессиональнай быраас, актыыбынай общественнай деятель,саха бастакы интеллигенциятын биир чулуу киһитэ Прокопий Нестерович Сокольников үтүө аата-суола үйэлэргэ ахтылла туруоҕа.
При частичном или полном использовании материалов гиперссылка на сайт ysia.ru обязательна.
Категория: Территория Просмотров: 744 Источник: ЯСИА Автор: Алексей Слепцов Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ