Үөскээбит кыһалҕаны быһаарар инниттэн «Сахатранснефтегаз» ААУо ыытыллыахтаах уонна тохтоон турар үлэни барытын бэйэтин илиитигэр ылар сыалтан былырыын тутар-таҥар управлениены тэрийэргэ күһэллибитэ.
Үлэ хаамыытын туһунан «Сахатранснефтегаз» ААУо тутар-таҥар управлениетын начаалынньыга Михаил Кириллин маннык кэпсээтэ:
– Бырайыак быһыытынан, Төҥүлүгэ гаас ситимин 900 дьиэ тэлгэһэтин аттыгар тардыахтаахпытыттан, 440-нун оҥордубут. Былырыын биэс хочуолунайга гаас ситимин аҕалбыппыт. Итини таһынан үс газорегуляторнай пуун туруоруохтаахпыт.
Оттон Тумулга хантараак быһыытынан 20 км уһуннаах гаас ситимин тардыахтаахпытыттан, 12 км оҥордубут. 350 дьиэҕэ ситим аҕалыахтаахпытыттан, 250-гар тиэртибит.
Былаан быһыытынан үлэ балаҕан ыйыгар бүтүөхтээх. Ыалга барытыгар киириэхтээх гынан баран, Тумул нэһилиэгэр “Алексеев” ИП 700 м уһуннаах гаас ситимин бүтэрбэккэ сылдьар. Итинтэн сылтаан сорох ыалларга гаас быйыл киирбэт туруктаах. Бу предприниматель үлэ хантараагын СӨ Промышленноска министиэристибэтин кытта түһэрсибит. Ол быһыытынан бүддьүөт үбэ кинилэргэ төлөммүт. Онон тустаах министиэристибэ хантараагы көтүрдэҕинэ эрэ, куонкурус хаттаан биллэриллэн, саҥа бэдэрээтчит быһаарылыннаҕына эрэ үлэ ыытыллар туруктаах. Ол баччааҥҥа диэри быһаарылла илик.
Ити боппуруоска Тумул нэһилиэгин баһылыга Иннокентий Птицын санаатын үллэһиннэ:
-- Анисий Анисьевич тэрилтэтэ «Алексеев” ИП Тумулга икки сыллааҕыта үлэлээбитэ. Октябрьскай уонна Птицын уулуссаларыгар баар 33 ыал тэлгэһэтин аттыгар диэри ситими тардыбыта эрээри, хаачыстыбата суох оҥорбутун түмүгэр турба иһигэр уу киирбит этэ. Былырыын ыраастыы сатаабыттара да кыайтарбатаҕа, онон хамыыһыйаҕа туттарыллыбатаҕа. Онон бу 33 ыалга гаас киирэрэ уустугурда. СӨ Промышленноска министиэристибэтин кытта “Алексеев” ИП дуогабардаах. Ол иһин бу боппуруоһу тустаах министиэристибэ төрдүгэр-төбөтүгэр диэри быһаарыан наада. Көрөргүт курдук, “Сахатранснефтегаз” ААУо ылсан, атын ыалларга диэри ситими үчүгэйдик тарда сылдьар.
Ол кыаллыбатах ситими “Сахатранснефтегаз» ААУо хампаанньа уолаттара оҥорон биэриэхпит дииллэр эрээри, үбэ-харчыта быһаарыллыан наада. Онон бу күннэргэ боппуруос быһаарыллыбатаҕына, 33 ыалга быйыл гаас киирбэт туруктаах.
Миниистир оннугар сэкирэтээр эппиэттээтэ. Тоҕо? «Панов солото суох!»
Бу боппуруоска хоруй ылаары СӨ промышленноска миниистирэ Андрей Панов приемнайыгар эрийэ сырыттым. Сэкирэтээр балтараа чаас курдугунан эрийээр диэтэ. Этиллибит кэмҥэ эмиэ эрийдим. Сэкирэтээр миниистир адьас солото суоҕун туһунан эттэ уонна «Алексеев» ИП үлэни толорботоҕунан дьыалата прокуратура көрүүтүгэр киирэн сытарын туһунан эт диэбитин эйиэхэ тиэрдэбин диэтэ. Киһи мантан элбэҕи тойоннуон сөп. Кыстык кэлээри турдаҕына, Тумулга 33 ыалга гаас киирбэт туруктаммыта тустаах салайааччыны улаханнык долгуппат эбит диэн санаа киирэр.
«Үйэм уһаабытыттан олус астынан олоробун»
Аҕа дойду Улуу сэриитин кыттыылааҕын огдообото, 85 саастаах Устинья Стручкова:
– Мин Аҕа дойду Улуу сэриитин кыттыылааҕа, улуус бочуоттаах олохтооҕо, үйэтин тухары трактористаабыт Егор Колосов огдообото буолабын, тыыл, үлэ ветеранабын. Дьэ, бу үйэм уһаан олох үчүгэйин көрөр дьолго тигистим. Сотору 85 сааспын туолабын. Дьиэбэр гаас киирэн, ааспыт кыһын мас оттор, оһох сабар диэни билбэккэ кыстаатым. Дьиэбит сып-сылаас, ахсынньы аам-даам тымныытыгар тоҥор диэни билбэтим. Онон, түгэнинэн туһанан, Ил Дархан Егор Борисовка, «Сахатранснефтегаз» ААУо генеральнай дириэктэрэ Иван Макаровка уонна улууспут баһылыга Николай Старостиҥҥа барҕа махталбын тиэрдэбин.
Бу билигин хампаанньа уолаттара нэһилиэккэ үлэлии сылдьалларын көрө-көрө үөрэбин. Барахсаттарга барыта этэҥҥэ буоллун диэн алгыс тылбын этэбин.
Комментарии
Авторизация на сайте через социальные сети