Бу күн улуус олохтоохторо эт-үүт бородууксуйаны сөбүгэр сыанаҕа атыылаһаннар, кыһыҥҥы хаһаастарын хааччыннылар.
Атыылааччылар ынах, сылгы, сибиинньэ эттэрин, сүөһү-сылгы иһин-үөһүн, Кэбээйи соботун, Салбаҥтан киирбит, Модуттан аҕалыллыбыт тоҥ арыыны, күһүҥҥү оҕуруот астарыттан оҥоһуллубут кэнсиэрбэлэри, бурдук ас арааһын, барыанньалары, тууһаммыт балык бары көрүҥүн атыылаатылар.
Дьаарбаҥка үөрүүлээх аһыллыытыгар кыттыылаахтары эҕэрдэлээн «Нам улууһа» МТ баһылыга Александр Атласов, «Ленскэй нэһилиэк» МТ баһылыга Андрей Новгородов, улуус депутаттарын Сэбиэтин председателэ Иван Попов уонна «Аграрнай партия» бырабылыанньатын чилиэнэ Олег Марков тыл эттилэр.
Нэһилиэктэр икки ардыларыгар ыытыллар көрүү-куонкуруска 8 нэһилиэк: Хатыҥ-Арыы, Ленскэй, Искра, Модут, II Хомустаах, Маймаҕа, Салбаҥ, Хамаҕатта кыттыыны ыллылар. Нэһилиэктэр бары олус тэрээһиннээхтик бэлэмнэнэн кэлбиттэр. Маймаҕалар, модуттар, 2-хомустаахтар, төһө да ыраах олордоллор, урукку сыллардааҕар быдан тэринэн, түмсэн кэлбиттэрэ хайҕаллаах. Нэһилиэктэр бэйэлэрин историяларын сырдатар араас элбэх бүлүүдэлэри оҥорбуттара дьүүллүүр сүбэни да, көрөөччүлэри да сөхтөрдө.
Бородууксуйа быыстапкатын кытта тыҥааһыннаах спортивнай күрэхтэһии (хары баттаһыы, дартс, ханаат тардыһыы) түмүгүнэн бастакы миэстэни ылан 150 тыһ. солк. суумалаах сертификатынан Ленскэй нэһилиэк наҕараадаланна. Иккис миэстэни Хатыҥ-Арыы нэһилиэгэ ылан 100 тыһыынчалаах сертификаты тутта. Оттон 2-хомустаахтар эрэллээхтик үһүс миэстэҕэ тахсан 50 тыһ. сертификаты ыллылар.
Комментарии
Авторизация на сайте через социальные сети