Бастатан туран нэһилиэкпитигэр олус ситиһиилээхтик үлэлии турар тэрилтэлэр – оскуола, оҕо уһуйаана, кулууп, «Сырдык аартык» кооператив сүрүннүүр специалистара, салайааччылара үлэлэрин-хамнастарын туһунан кылгас иһитиннэриини оҥордулар. Дьэ ол кэнниттэн нэһилиэкпит баһылыга Иван Константинов эрдэтинэ былааннаммыт бары үлэлэр кэмигэр барбыттарын туһунан кэпсээтэ. 860 нэһилиэнньэлээх Күндэйэ сүрүннээн тыа хаһаайыстыбатын өрө тутан олорор. Улууска биир бөдөҥ хаһаайыстыбалаах буолан, туруктаахтык олоробут. Бу кэм иһигэр үгүс үлэлэр тэтимнээхтик бардылар. Эдэр ыаллар субсидия суотугар толору хааччыллыылаах дьиэ туттан, киириилэрэ элбээтэ. 100 ынах сүөһү турар иккис саҥа хотон тутуллан, билигин үлэлии турар. Икки квартиралаах дьиэ бу күннэргэ тутуута бүтэн, олохтоохтор күлүүстэрин тутаары олороллор. Түөрт саҥа маҕаһыын нэһилиэнньэни аһынан-үөлүнэн, табаары хааччыйан олорор.
Оттооһун былаана аһара туолан, улууска бастаан 100 тыһ. солк. суумалаах сертификаты ыллыбыт. Сенаж, бурдук үүнүүтэ үчүгэй. Үүтү туттарыы былаана эмиэ туолан иһэр диэн баһылык иһитиннэрдэ. Маны таһынан уулуссаларбыт уоттара барыта холбонон, сорох сирдэргэ СИП провод тардылынна. Суоллар буорунан, гравийынан кутулуннулар. Сайын 7 сайылык суоллара оҥоһуллан, ньиргиччи кҥһҥн тахсан, ньир-бааччы үлэлээтилэр.
Ити да үрдүнэн билиҥҥитэ быһаарылла илик боппуруостар эмиэ бааллар. Биир оннук боппуруоһунан үлэлиир бырааспыт уоппускаҕа бараары сылдьарынан, кинини солбуйар үлэһит көстүө суох курдук. Маны сэргэ мунньахха арыгыны атыылааһын боппуруоһун көрдүбүт. Олохтоохтор нэһилиэк инникитин арыгыны испэт чөл олохтоох буолуоҕуҥ диэн баҕа санааларын эттилэр. Кэнники кэмҥэ оҕолор техника араас көрүөүнэн көҥүл сүүрдэллэрэ элбээтэ. Маны төрөппүттэр кытаанах хонтуруолга ылыахтаахтар диэн хас да киһи бэйэлэрин санааларын эттилэр.
2017 сылга нэһилиэкпит төрүттэммитэ 100 сыллаах үбүлүөйэ буолуоҕа. Инники соруктар, былааннар бары онно туһуламмыттар. Сквердэр оҥоһуллаллара былааннанар. Онно ким туох, саҥа көрүүлээҕин сүбэлээн биэрэллэригэр нэһилиэк дьаһалтата көрдөстө. Нэһилиэккэ булгуччу музей дьиэтэ уонна саастаах дьон мустан сэһэргэһэр, дьарыктанар балаҕаннара тутуллуохтарын туһунан этиини мустубут дьон бары үөрэ, сэргии иһиттибит. Маны таһынан тэрилтэлэр ис-тас көстүүлэрин тупсарар сыалтан ону көҕүлүүр күрэхтэһиилэри тэрийэн ыытыахтара. Бастаабыкка сыл түмүгүнэн улахан бириис олохтонуоҕа.
Ааһан эрэр сылга Күндэйэ нэһилиэгин дьаһалтата ыыппыт үлэтин истэн баран, олохтоохтор биир санаанан «үчүгэйинэн» сыаналаатылар.
Комментарии
Авторизация на сайте через социальные сети