Бүгүн оройуон баһаарынай сулууспатыгар 38 киһи үлэлиир. Мантан 28-һа - Хонууга, 10 байыас Улахан Чыыстай нэһилиэгэр бааллар. Былырыыҥҥыттан Соболоох, Чыбааҕылаах, Индигир уонна Төбүлэх нэһилиэктэригэр уоннуу киһилээх добровольнай этэрээттэр тэриллибиттэр. Манна нэһилиэктэр дьаһалталарын баһылыктара баһаартан сэрэхтээх буолуу нэһилиэк уопсай интэриэһэ буоларын өйдөөн көхтөөхтүк ылсан үлэлэһиэхтээхтэр эбит.
Баһаарынай этэрээттэр үлэҕэ туттуллар таҥаһынан-сабынан, сэбинэн-сэбиргэлинэн толору хааччыллыбыттар. Уопсайынан, Муома оройуонун баһаарынай сулууспата кэнники сылларга, ордук 2009 сылтан бэттэх материальнай-техническэй базата бөҕөргөөн, кэҥээн, хаҥаан, билигин республикаҕа бастыҥнар кэккэлэригэр киирсэр, хотугу улуустарга саамай үчүгэй хааччыллыылаах тэрилтэнэн буолар. «Бу баһаарынай сулууспа республикатааҕы салалтатын утумнаах, сыралаах үлэтин түмүгэ», ― диир олохтоох баһаарынай чаас начальнига Серафим Николаевич Мараказов.
Техника өттүнэн быйыл Хонууга «Сивер» вездеход тиэрдиллибит, киинтэн ыраах сытар нэһилиэктэргэ ― Улахан Чыыстайга «Урал» баһаарынай массыына кэлбит, оттон Төбүлэххэ уу баһар носуостаах прицеп аҕалыллыбыт. Өссө биир техника, күһүөрү кыһын, суол турдаҕына, Хонууга кэлиэхтээх.
Манна үлэҕэ киирии улахан куонкурустаах. Бастатан армияҕа сулууспалаабыт уолаттары ылаллар. Итини тэҥэ үлэҕэ киириэн баҕалаахтар анал тургутууну (тестирование) ааһаллар. Үксүгэр биир миэстэҕэ уончалыы киһи күрэстэһэр эбит. Үлэҕэ чэгиэн доруобуйалаах, хорсун, куһаҕан дьаллыга суох киһини ыла сатыыллар. Штаты кэҥэтиигэ үлэ күүскэ барар. СР Правительствотын председателин солбуйааччы В.В. Омуков Муомаҕа көрдүүр-быыһыыр этэрээт тэриллэрин өйүүрүн биллэрбит. Онон хаһан эмэ бу ЫБМ структуратын иһинэн үлэлиир салаа биһиэхэ да арыллыан сөп.
Олохтоох баһаарынай сулууспаҕа быйыл алта уол үлэҕэ киирбит. Үлэҕэ киирбиттэр сылга иккитэ иккилии ый Дьокуускайга учебнай-методическай кииҥҥэ курска үөрэнэ бараллар. Былырыыҥҥыттан барар-кэлэр бырайыаһы толуйар сыалтан куораттан преподаватель аҕалан үөрэттэрэллэр. Быйыл күһүн икки преподаватель кэлэрэ күүтүллэр.
«Үлэбитигэр эдэр дьон кэлиилэрэ коллективпыгар саҥа сүүрээни, саҥа тыыны киллэриэ», ― диир начальник. Коллективка 10-тан тахса сыл үлэлээбит уопуттаах үлэһиттэр бааллар. Саха Республикатын баһаарынай сулууспатын туйгуннара С.Н. Мараказов, А.В. Неустроев, С.П. Никулин, И.Г. Слепцов, В.В. Слепцов эдэрдэргэ үлэлэригэр сүбэһит-амаһыт, аҕа табаарыс буолаллар. Оттон салайааччылара Серафим Николаевич баһаарынай сулууспаҕа 1999 сылтан үлэлиир, 2004 с. тэрилтэ начальнигынан талыллыаҕыттан дьоҕус, ол гынан баран улахан эппиэтинэстээх тэрилтэтин күн бүгүҥҥэ диэри ситиһиилээхтик салайар.
Муоматааҕы баһаарынай сулууспа үлэһиттэрэ «Сайыҥҥы биир күн дьылы аһатар» диэнинэн салайтаран, бу сайын оттуохтарын саныыллар. «Уруккуттан оттуур сирдээхпит, онно барыахпыт», ― диир Серафим Николаевич. Оттон билигин баһаарынай сулууспа уолаттара сайыҥҥы хаалбыт күннэргэ хаһаайыстыбаннай үлэлэрин үмүрүтээри үлэ үөһүгэр сылдьаллар.
Комментарии
Авторизация на сайте через социальные сети