Онуоха ити дьэҥдьиир “Дьалаҕай быһыы” диэн ыстатыйанан тэриллибит холуобунай дьыала силиэстийэтин кэмигэр буолла диэн этиллибит. Итиэннэ 30 мөл. солк. сууманы хорон сиэһиҥҥэ Кондаков уонна кини үлэһиттэрэ уорбаланалларын курдук өйдөбүлү үөскэппит. “Саха сирэ” хаһыат ити иһитиннэриилэр төһө дьиҥнээхтэрин чуолкайдаста.
Мария Миронова, РФ ИДьМ-тын СӨ ИДьМ-тын пресс-сулууспатын начальнига:
- Холуобунай дьыала Ис дьыала министиэристибэтин дуоһунастаах дьонугар туһуланан тэриллибэтэҕэ. Миниистир Владимир Прокопенко соруйуутунан ИДьМ хонтуруоллуур-ревизиялыыр отдела ыыппыт бэрэбиэркэтин түмүгэр булуллубут кэһиилэр чахчыларынан тэриллибитэ. Ити кэһиилэри экспертиза бигэргэтиэҕэ биитэр бигэргэтиэ суоҕа.
Надежда Дворецкая, РФ Силиэстийэлиир кэмитиэтин Саха сиринээҕи управлениетын салайааччытын сонуннары киэҥник тарҕатар ситимнэри кытта үлэҕэ старшай көмөлөһөөччүтэ:
- РФ СК ССУ ураты суолталаах дьыалалары силиэстийэлиир отдела РФ Холуобунай кодексатын 293-с ыст. 1 чааһынан (“Дьалаҕай быһыы”) тэриллибит холуобунай дьыаланы силиэстийэлии сылдьар.
Силиэстийэ сабаҕалыырынан, 2014 сыллаахха Горнай, Кэбээйи уонна Уус-Алдан улуустарын ис дьыалаҕа отделларын саҥа модульнай дьиэлэрин тутуу үлэтин “СӨ ИДьМ-тын хаһаайыстыбаннай уонна сервиснэй хааччыйыытын киинин” дуоһунастаах сирэйдэрэ хонтуруоллуур эбээһинэстэрин сөптөөхтүк толорботохтор. Ол түмүгэр, застройщик кэккэ үлэлэри хаачыстыбата суохтук, бырайыактааһын докумуонуттан атыннык толорбут, ону ити киин дуоһунастаах үлэһиттэрэ кэмигэр булбатахтар. Ити кэһиилэри СӨ ИДьМ-тын хонтуруоллуур-ревизиялыыр отдела булан, силиэстийэ уорганнарыгар ыыппыта.
Билигин силиэстийэ салҕанар. Экспертнэй чинчийиилэр ыытыллаллар, ол түмүгүнэн дуоһунастаах дьон дьайыытыгар правовой сыанабыл бэриллиэҕэ уонна оҥоһуллубут хоромньу суумата биллиэҕэ.
Онон, харчы ханна “уччуйбутун”, ким онно буруйданарын-суоҕун силиэстийэ түмүктэннэҕинэ билиэхпит.
Комментарии
Авторизация на сайте через социальные сети