Улуустааҕы киин балыыһа салалтатын кытта сүбэлэһии кэнниттэн анал үөрэхтээх специалистары Ньурбаҕа ыҥыран үлэлэтэр сорук турбута. Биллэн турар, олорор дьиэ боппуруоһа ханна баҕарар курдук, биһиэхэ да сытыытык турар.
Өрөспүүбүлүкэ үрдүнэн тыа сирдэригэр үлэлии барар быраастарга «Земскэй доктор» диэн тосхол үлэлиир да, Ньурба куорат ити бырагыраамаҕа хапсыбат. Онон былырыыҥҥыттан ыла «Ньурбатааҕы доктор» диэн улуустааҕы анал тосхолу ылынан, Ньурбаҕа кэлэр специалистары дьиэнэн хааччыйыы өттүгэр үлэ чопчуланна. Ол түмүгэр 4 специалист бу тосхол чэрчитинэн Ньурбаҕа үлэлии кэллэ. Маны таһынан бу докумуоҥҥа олоҕуран, эдэр быраастар билиҥҥи аныгы медтиэхинэкэҕэ сыстан, таһымнарын балачча үрдэтинэр кыахтаннылар. Бу тосхол чэрчитинэн үлэлиэн баҕалаах эмчит ахсаана элбээтэ.
Хомойуох иһин, доруобуйа харыстабылын салаатын оптимизациялааһыҥҥа ыытыллыбыт үлэ нэһилиэктэргэ улахан охсуулаах буолбутун бары истэ, билэ сылдьабыт. Учаастактааҕы балыыһалар пуун быһыытынан уларыйдылар, быраастар штаттара сарбыллынна. Нэһилиэнньэни итинник дьаһал олус долгутар. Өрөспүүбүлүкэ Доруобуйа харыстабылыгар министиэристибэтэ итини эмиэ өйдүүр уонна өйүүр. Бу быһыыны-майгыны көннөрөргө биир сөптөөх быһаарыы ылылынна. Ол -- мобильнай медицина көрүҥүн туһаныы уонна онуоха сөптөөх үлэни тэрийии. Толору хааччыллыылаах специализированнай массыыналар уонна онно үлэлиир кадрдар боппуруостара күүскэ турда. Мобильнай флюорография, кардиограмма, УЗИ, лаборатория тиэйиилээх массыынаны ылар туһунан кэпсэтии бара турар. Күн бүгүн, нэһилиэктэринэн быраастар мобильнай бөлөхтөрө үлэтин номнуо саҕалаата.
Комментарии
Авторизация на сайте через социальные сети