Томпоҕо аан дойду кубогын кыайыылаахтарын чиэстээтилэр

Томпо улууһун урукку кэмҥэ мас тардыһыытыгар спорт маастардара Петр Колодезников, ини-бии Афанасий уонна Петр Саввиннар, Александр Захаров, маастарга кандидаттар Александр Скрыбыкин уонна Альберт Мярин аатырдыбыттара. Билигин саҥа көлүөнэ мадьынылар үүнэн таҕыстылар.


Эдэр көлүөнэ мадьынылар быйыл аан дойду кубогар Томпо аатын дорҕоонноохтук ааттаттылар. Ол курдук, 60 кг Дмитрий Саввин (Байаҕантай, Кириэс Халдьаайы) муҥутуур кыайыылаах, оттон саамай ыарахан ыйааһыҥҥа Сергей Фролкин (Саһыл нэһилиэгэ) уонна дьахталларга Ирина Севрюк (Хаандыга) үрүҥ көмүс призердарынан буоллулар.
Мадьыныларга улуус баһылыга Георгий Герасимов уонна муниципальнай тэриллиилэр баһылыктара, Томпо улууһун мас тардыһыыга федерациятын бэрэссэдээтэлэ, ОДьКХ директора Мухитдин Якупов харчы сертификаттарын, сыаналаах бириистэри туттардылар. Манна Кириэс Халдьаайы олохтоохторо Дмитрий Саввиҥҥа 110 тыһ. солк. бэйэлэрин баҕа өртүнэн хомуйан биэрбиттэрин бэлиэтиир тоҕоостоох. Ол курдук, СӨ үөрэҕириитин үтүөлээх үлэһитэ, тыыл бэтэрээнэ, оскуола интернатын сэбиэдиссэйэ Сахасталина Гаврильевна Колесова 10 тыһ. солк. биэрбит. Кини кэргэнэ, физкультура учуутала С.Е. Колесов Кириэс Халдьаайыга элбэх көлүөнэ спортсменнары иитэн таһаарбыта.
Сергей Фролкин дьонун спортивнай ситиһиилэринэн эрэ үөрдүбэт, ол курдук кини бу күннэргэ уол оҕоломмут. Сергей бииргэ төрөөбүт быраата Игорь убайын суолун батыһан эмиэ мас тардыһыытынан дьарыктанар, кини эһиил «Азия оҕолоругар» кыттаары путевка иһин киирсэ сылдьар.
Ирина Севрюк аан маҥнай дьахталлар мас тардыһалларын Хаандыгаҕа буолбут Саха сирин чемпионатыгар көрбүт. Бу көрүҥүнэн дьарыктанарын бастаан ийэтэ өйөөбүт. Ирина сорук оҥостон олох туохха да арылдьыйбакка утумнаахтык дьарыктанар. Ону бэлиэтээн аатырар Татьяна Григорь кинини бэйэтинэн дьарыктаан эрэр.

Томпо улууһун мадьынылара инниктин өссө элбэх ситиһиилэнэллэригэр саарбахтаабаппыт. Онно биир төһүү күүһүнэн иккис сылын Хаандыгатааҕы спорт уонна культура киинин Афанасий Саввин салайара, оттон оройуоннааҕы спорт уонна физкультура салаатын салайааччытынан бу күннэргэ СР спордун үтүөлээх үлэһитэ Александр Захаров анаммыта буолар.
Улуус баһылыга Георгий Герасимов эппитинэн, Томпо мадьынылара бэйэлэрин кыахтарын 2017 сылга Үөһээ Бүлүүгэ буолар Манчаары оонньууларыгар көрдөрүөхтэрэ. Оттон биһиги спортсменнарбыт туруоруммут соруктарын ситиһэллэрин, бары көрүҥҥэ кыахтаахтарын субу соторутааҕыта бильярдка Саха сирин чемпионатыгар үһүс эрэ сылын дьарыктанар Кириэс Халдьаайы оскуолатын 11 кылааһын үөрэнээччитэ Никита Потапов аан дойду чемпионун Александр Чепиковы кыайбыта туоһулуур.