Билиҥҥитэ кооператив 6 сайылыктаах.  Былырыын тэрилтэ бэйэтэ киллэрбит дохуотун үбүнэн 100 ынах сүөһү турар хотонун тутан үлэҕэ киллэрбитэ. Билигин эмиэ саҥа хотону тута сылдьаллар. Маны сэргэ үлэһиттэргэ анаан эмиэ уопсай дьиэни туппуттара. Инньэ гынан «сырдык аартыктар» дьонноругар бары усулуобуйаны оҤороллор.

   Бэйэлэрэ учредитель быһыытынан тэрийбит «Тускул» ХЭТ нөҥүө нэһилиэнньэттэн үүт тутан, үгүс бородууксуйаны оҥорон таһааран, улуус үрдүнэн үс  маҕаһыыннаахтарыгар сөбүгэр сыанаҕа батараллар. Онон дьоно-сэргэтэ дохуоттаналларыгар кыах биэрэллэр.

   Билигин өрөспүүбүлүкэбитигэр тыа хаһаайыстыбатын сайдыытын туһунан СӨ сокуонун барылын дьүүллэһии көхтөөхтүк бара турар. Сонуннары киэҥник тарҕатар тиһиктэр манна бары ылсан үлэлииллэр. Нэһилиэктэринэн специалистар сылдьан, сокуон ис тутулун билиһиннэрэллэр, дьон санаатын-оноотун истэллэр.

   Итинэн сибээстээн биһиги «Сырдык Аартык» кооператив салайааччыта Розалия Алимфиевна Ивановаттан саҥа сокуон барылын туһунан бэйэтин санаатын этэригэр көрдөстүбүт:

   – Сахабыт сирин тыатын хаһаайыстыбатын сайыннарыыга туһуламмыт саҥа сокуон ылыллан эрэрэ хайҕаллаах. Манна бары салаалар киириэх тустаахтар. Барылы кытта билистим. Онон бэйэм тус санаабын этиэхпин баҕарабын. Бастатан туран, үүт тутан астыыр тэрилтэлэри (заготовитель) миэстэтигэр бииринэн, иккинэн хааччахтаабакка эрээри, боломуочуйаны кыахтаах тэрилтэлэргэ биэрэллэрэ буоллар. Эбэтэр, саатар, икки-үс нэһилиэги хабан биир заготовитель баар буолуохтаах. Бары өйдүүргүт буолуо, хас да сыллааҕыта «Сунтаар-Ас» СПоК тэриллэн үлэлии сатаан баран, иэс бөҕөҕө киирэн тохтообутун. Маннык хартыына инникитин хатыланыа суохтаах.

   Билигин нэһилиэк дьаһалталарыгар үлэлиир тыа хаһаайыстыбатын специалистара билбэттэрэ-көрбөттөрө үгүс диэн аһаҕастык этиэххэ наада. Олор истэригэр анал үөрэҕэ суох дьон эмиэ бааллар. Ол иһин саҥа сокуон барылыгар «Тыа хаһаайыстыбатын тэрээһинин технологиятын хааччыйыы» диэн 15-с ыстатыйатыгар тыа хаһаайыстыбатынан утумнаан дьарыктанар тэриллиилээх хаһаайыстыбалаах нэһилиэктэргэ инникитин земскэй зоотехник, земскэй агроном диэн саҥа идэлэри олохтуур туһунан пуунун сэҥээрдим. Оччотугар хаһаайыстыбаларга дьиҥнээх көмө буолуо этэ.

   Ынах сүөһү боруодатын тупсарарга селекционнай-племенной үлэҕэ улахан болҕомто ууруллубута олус үчүгэй. Манна искусственнай сиэмэлээһини кытаатыахха наада. Оччоҕо эрэ улууспутугар ынах сүөһү ахсаана элбиэҕэ.