ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт

На карте

16 октября 2015, 10:24

Үлэһит үөрүүтэ


Ааспыт сылга «Лоҥкур» бааһынай хаһаайыстыбата (салайааччы А.Н.Попов) өрөспүүбүлүкэҕэ «Дьиэ кэргэн ферматын сайыннарыы» программаҕа киирсэн, Грант ылбыта. Ол харчытын билигин олоххо киллэрэн, хаһаайыстыба ньирэйдэри тутарга анаан хотон тутунна.

Алтынньы 13 күнүгэр «Лоҥкур» бааһынай хаһаайыстыбаҕа биир эмиэ бэлиэ күн буолла. Тэрээһиҥҥэ кытта диэн  биир массыынаҕа тыа хаһаайыстыбатын управлениетын үлэһиттэрин кытта баран иһэбит. Лоҥкурга чугаһаан истэхпитинэ, хаһаайыстыба сүөһүлэрин аттаах бостуук  мэччирэҥтэн сылгылаан үүртэлээн иһэрэ ыраахтан көстөр. Ыанньык ынахтар, эдэр сүөһүлэр иннилэригэр хаһаайыннара,  куудара баттахтаах пиэрмэ «аҕа баһылыга» – атыыр оҕус хаһаайынныы туттан баран иһэрэ  хайдах эрэ оҕо сааспар сайылыкка сайылыыр кэмнэрбин санатта. Суол биир өттүгэр тыа хаһаайыстыбатынан саҥа дьарыгыран эрэр эдэр киһи  Иван Петров хотонун тутта сылдьар. Кини эмиэ «Саҥа саҕалааччы фермер» Граҥҥа киирсэн ылбыт харчытынан куннаах трактор ылыммытын бу соторутааҕыта  аҕалбыт. Хотонун эһиил туттан үлэҕэ киллэрэр санаалаах. Манна даҕатан эттэххэ, кини аҕа кынна  Анатолий Акимов  бу баран иһэр хаһаайыстыбатыгар – «Лоҥкурга» хас да сыл үлэлээбит. Анатолий Николаевич билигин хаһаайыстыбабын оҕолорум салгыы сайыннарыахтара, мин бэйэм илии-атах буолан, хотон иһинэн-таһынан сылдьан сүөһү көрсүөм диэн этэр.

Лоҥкурбутугар кэлэбит. Хаһаайыстыба салайааччыта, СӨ тыатын хаһаайыстыбатын туйгуна, СӨ тыатын хаһаайыстыбатын үтүөлээх үлэһитэ, СӨ президенин 2003, 2007 сыллар Граннарын хаһаайына, СӨ судаарыстыбаннай бириэмийэтин лауреата Александр Николаевич Попов саҥа хотонун аттыгар көрсөр. Үлэ киһитин сирэйигэр үөрүү, долгуйуу биллэр.  Кини бүгүн ньирэйгэ аналлаах хотонун тутан бүтэрэн, үлэҕэ киллэрэр үөрүүтүн дьонун-сэргэтин кытта үллэстэр. Ону сэргэ хаһаайын төрөөбүт күнэ буолан соһутта. Өссө алтынньы 12 күнүгэр олоҕун аргыһа Ольга Попова эмиэ төрөөбүт күнэ ааспыт эбит. Онон Поповтар хас да бэлиэ түгэни биирдэ бэлиэтээтилэр. Манна даҕатан эттэххэ, Александр Николаевич хаһаайыстыбатын тутууларын бэйэтин төрөөбүт күннэригэр сөп түбэһиннэрэн киллэртиир үгэстээх эбит. Ону сэргэ сарсыҥҥыттан кыстыкка киирии, сүөһүлэри хотоҥҥо баайыы.

Саҥа хотон аһыллыытыгар улууспут баһылыгын быстах кэмҥэ солбуйааччы Максим Прокопьев, нэһилиэк баһылыга Эдуард Филиппов, тыа хаһаайыстыбатын управлениетын начальнигын солбуйааччы Надежда Корнилова  салайааччылаах управление тутаах үлэһиттэрэ, нэһилиэк тыатын хаһаайыстыбатын специалиһа Антонина Степанова,  Александр Попов табаарыстара, хотонун тутуутугар көмөлөспүт  дьоно, уруулара, оҕолоро бааллар.

Хаһаайыстыбаҕа 100-тэн тахса сүөһү кыстыкка киирдэ. Олортон ыанара 60-ча. Кыстык отторун булунан олороллор. Хаһаайыстыба быйылгыттан сибиинньэ иитиитинэн дьарыктанар санаалаах, ийэ сибиинньэ буолар сибиинньэ оҕолорун Дьокуускай куораттан племенной хаһаайыстыбаттан атыылаһан аҕалбыта. Сибиинньэ оҕолорун атыылаһарыгар улуус харчы биэрэн, хаһаайын үөрүүтэ сүрдээх. «Улууспут, тыабыт хаһаайыстыбатын управлениета, өрөспүүбүлүкэбит, бэйэбит министиэристибэбит улахан көмөлөөх буолан, үлэбит-хамнаспыт таһаарыылаах. Бу сибиинньэлэрим этэҥҥэ буоллахтарына эһиил, бэйэбит бородууксуйабытын атыыга таһаарыахпыт. Онно саамай кылаабынайа сибиинньэ да буоллун, ынах сүөһү да буоллун, аһылыгынан хааччыллыылара буолар. Онон сири кытта үлэни күүһүрдүөххэ. Эһиил бэйэм хаһаайыстыбабар күрүөлээһин сылын биллэрэр былааннаахпын. Бу иннинэ тутуу сыла диэн этэ», –  диир Александр Попов.

Сүөһү иитиитигэр  эдэрдэр ылсан эрэллэрэ үөрдэр. Ити курдук, үөһэ этэн аһарбыт Анатолий Акимовпытын оҕолоро солбуйаллар. Оттон Александр Попов эмиэ хаһаайыстыбатын кыыһыгар Варвара Поповаҕа туттарар санаалаах. Ол да курдук, быйыл кырдьаҕас Поповтар Сунтаарга дьиэлэригэр көһөн киирбиттэр. Мантан олорон сүбэ-соргу буолуохтара. Онтон улахан хаһаайыстыбаларын  кыыстара Варвара кэргэнинээн Семеннуун тутан «Лоҥкурга» кыстыахтара.

 

При частичном или полном использовании материалов гиперссылка на сайт ysia.ru обязательна.
Категория: Территория Просмотров: 752 Источник: ЯСИА Автор: Яина Власьева Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ