- Эр санаа уруогун быһыытынан барбыт тэрээһиҥҥэ Дьокуускайтан бойобуой дьайыыларга сылдьыбыт бэтэрээннэр республикатааҕы сойуустарын бэрэссэдээтэлэ Егоров Ларион, бойобуой дьайыыларга сылдьыбыт бэтэрээннэр Томпо оройуонунааҕы сэбиэттэрин бэрэссэдээтэлэ Захаров Юрий, өлбүт буойуну кытта бииргэ сулууспалаабыт Егоров Степан, Николаев Станислав, Диодоров Василий, Канаев Павел, оскуола үөрэнээччилэрэ уонна учууталлара, биир дойдулаахтара кытыннылар.
- Саллаат төрөппүттэригэр: ийэтигэр Екатерина Дмитриевнаҕа, аҕатыгар Прокопий Дмитриевичка, бииргэ төрөөбүттэригэр олус долгутуулаах түгэн буолла. Интернационалист-буойуттар өйдөбүнньүк дуосканы аҕалбыттарын Арыы Толоон оскуолатыгар туруордулар. "Кыайыы" фонда суотугар оҥоһуллубут обелиск аны саас Геройдар болуоссаттарыгар туруоруллуоҕа.
- Михаил Сыромятников олус кылгас олоҕу олорон ааспыта. Кини 1996 с. 19 сааһыгар сылдьан Чечняҕа боевиктары кытта киирсиигэ Чурапчы уола Роман Ноговицынныын өлбүтэ. Син атын оҕолор курдук оскуолаҕа үөрэммитэ, спордунан (чэпчэки атлетиканан, боксанан, остуол тенниһинэн) дьарыктаммыта. Элбэх оҕолоох дьиэ кэргэҥҥэ сэттис оҕо этэ, ханнык да үлэттэн туора турбатаҕа, бииргэ төрөөбүттэрин кытары окко үлэлиирэ, мас бэлэмниирэ, ийэтигэр барыга-бары көмөлөһөрө.
- Миитиҥҥэ оройуон дьаһалтатын общественнай тэрилтэлэри кытта үлэҕэ координатора Н.Е. Ефимов, Байаҕантай нэһилиэгин бэтэрээннэрин сэбиэтин бэрэссэдээтэлэ С.Д. Матаркина кытыннылар.
- Михаил аҕата Прокопий Дмитриевич доруобуйатынан бу тэрээһиннэргэ кыайан сылдьыбата, уолун табаарыстарын дьиэтигэр көрүстэ. Манна олус истиҥ, долгутуулаах көрсүһүү буолла. Доҕотторо Михаилы эдэр сааһыгар көрдөөх, кыһамньылаах уонна эрэллээх доҕор быһыытынан өйдөрүгэр-санааларыгар хаалбытын аҕыннылар.
- Маны таһынан эр санаа уруоктара Кириэс Халдьаайы орто оскуолатыгар, Герой Ф. Охлопков аатынан музейга буолуталаатылар.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети