– Кэлиҥҥи кэмҥэ гаас промышленноһа атаҕар бигэтик турарыгар элбэх үлэ оҥоһулунна. Ол курдук, бу кэмҥэ 6 тыһ. км уһуннаах магистральнай уонна куорат, нэһилиэк иһинээҕи гаас ситимнэрэ тардылыннылар. Кэлиҥҥи кэмҥэ нэһилиэнньэлээх пууннарга гааһы киллэрии икки төгүл улаатта.
Бары билэрбит курдук, нэһилиэнньэлээх пууннары гааһынан хааччыйыы судаарыстыбаннай бырагырааманы олоххо киллэрэр сыалтан магистральнай ситим үһүс утаҕын тутуу саҕаламмыта. Быйыл биһиги утах төрдүс учаастагын үлэҕэ киллэриэхпит диэн эрэнэбин.
Өлүөнэ эбэни туоруур иккис утаҕы тутан, илин эҥэр улуустары гааһынан хааччыйар кыах үөскээтэ. Бүгүҥҥү күҥҥэ Чурапчы улууһугар диэри магистральнай гаас ситимин тардыы күүскэ бара турар. Билигин өрөспүүбүлүкэ үрдүнэн 85 нэһилиэнньэлээх пуун гааһынан хааччылынна. Хампаанньа күүһүнэн Горнай улууһун Аһыма бөһүөлэгэр гаас ситимин тардыы ыытыллар уонна Мэҥэ-Хаҥалас Тумул, Төҥүлү сэлиэнньэлэригэр иһинээҕи ситими тардыы үмүрүйэн эрэр, ГРЭС-2 гааһынан толору хааччылларын ситистибит.
Билэргит курдук, Уһук Илиҥҥи региоҥҥа гааһы переработкалыыр соҕотох собуот 15 сыл устата эҥкилэ суох таһаарыылаахтык үлэлээн кэллэ. Дьокуускай куорат олохтоохторун гааһынан хааччыйыыга куттал үөскээбэтин диэн бу собуот тутуллубута.
Итини тэҥэ, собуот углеводородтаах ыгыылаах гааһы ырыынакка атыылыыр. Үрдүк октаннаах бензини солбуйан, тимир көлөлөөхтөрү абыраата. Сылга ортотунан 16000 т кэриҥэ экологическай өттүнэн ыраас бородууксуйаны атыылыыр.
Төһө даҕаны экономическай кириисис буолбутун үрдүнэн, хампаанньа гааһы переработкалыыр собуот кыамтатын улаатыннарар соругу ылынна. Биһиги бүгүҥҥү сүрүн сыалбыт – ыгыылаах гааһы хас биирдии киһи тимир көлөтүгэр уонна коммунальнай сыалга туһанарын хааччыйыы.
«Сахатранснефтегаз» ААУо нэһилиэнньэҕэ өҥөнү оҥорууну судургутутарга кыһаллар. Туһанааччыллар анал сайт нөҥүө гаас төлөбүрүн оҥороллорун сэргэ, билигин дьиэлэриттэн олорон эрэ техническэй холбонууга сайаапка биэрэр кыахтаннылар. «Биир кэлим түннүк» тиһигэ үлэлээн, туһаанааччылары кытары үлэни лаппа тупсарда.
Хампаанньа нэһилиэнньэ иннигэр социальнай эппиэтинэһи сүгэрин толору өйдүүр, ол туоһутунан «Сахатранснефтегаз» ААУо-ҕа олохтоох уолаттар үлэлииллэрэ буолар. Бүгүҥҥү күҥҥэ манна 2 000-тан тахса киһи үлэлиир. Исписэлиистэрбит уопуттара хаҥыырыгар, идэлэрин таһыма үрдүүрүгэр өрүү кыһаллабыт. Өрөспүүбүлүкэтээҕи уонна Россиятааҕы анал куонкурустарга ситиһиилээхтик кытталлар. Холобур, быйыл Уһук Илиҥҥи Бүтүн Россиятааҕы күрэхтэһиигэ биһиги уолбут Михаил Павлов ситиһиилээхтик кыттан, бастыҥ сварщик аатын ылары ситистэ.
Мин биир бэйэм «Сахатранснефтегаз» хампаанньаҕа гаас идэтин ис сүрэхтэриттэн сөбүлүүр бэриниилээх дьон үлэлииллэринэн киэн туттабын. Хампаанньа судаарыстыбаннай промышленнай бөдөҥ тэрилтэ буоларын быһыытынан, техническэй кадры бэлэмнээһиҥҥэ уонна аныгы технологияны баһылааһыҥҥа үлэлиир исписэлиистэри куруутун өйүүр. Өрөспүүбүлүкэтээҕи куонкурустарга өрүү бастыҥ инженердэринэн биһиги уолаттарбыт буолаллара ону туоһулуур.
Түгэнинэн туһанан, «Сахатранснефтегаз» ААУо бары үлэһиттэрин уонна Саха сирин олохтоохторун гаас уонна ньиэп үлэһиттэрин күннэринэн итиитик-истиҥник эҕэрдэлиибин! Барыгытыгар дьолу-соргуну баҕарабын. «Күөх төлөн» эһиги дьиэҕитин куруук сылааһынан угуттаатын!
Комментарии
Авторизация на сайте через социальные сети