Балаҕан ыйын 14 күнүгэр Күндэйэ нэһилиэгэр агро-оскуолалар ыҺыахтара буолан ааста. Үөрүүлээх тэрээһин аһыллар сиэригэр-туомугар Сунтаар улууһун аҕа баһылыга А.В.Григорьев, Күндэйэ нэһилиэгин баһылыга И.В. Константинов, СР правительствотын Айылҕа харыстабылын уонна агропромышленнай комплекс Департаменын салайааччытын солбуйааччыта, Күндэйэ нэһилиэгин куратора И.И.Алексеев, Сунтаар улууһун үөрэҕин управлениятын начальнига Г.М.Еремеев бочуоттаах, ыҥырыылаах ыалдьыт буолан сырыттылар.
Арыылаах орто агро- оскуолата салайааччы директор Федорова Т.П., Бордоҥ орто агро-оскуолата ( дириэктэр Р.А.Иванов), Сунтаар 2 №-дээх орто агро-оскуолата ( дириэктэр Иванов В.Р)., Күндэйэ орто Юнеско агро-оскуолата (дириэктэр Иванова М.Н) ыһыах параадыгар кытыннылар.
Тэрээһин сүрүн программата: оҕолор тыа хаһаайыстыбатыгар төһө бэлэмнээхтэрин, дьоҕурдаахтарын, билиилэрин көрдөрдүлэр (трактор ыытыы, бэрэбинэ солооһуна, кус үргээһинэ, хапсаҕай, мас тардыһыыта уо.д.а күрэхтэр олус интэриэһинэйдик аастылар). Маны таһынан оскуолалар бэйэлэрин бородуксуйаларын дьаарбанка- быыстапкалара буолан ааста. Баһылык Анатолий Васильевич күһүҥҥү ыһыах-дьаарбаҥка бэйэ үүннэрбит бородуксуйатын хамаҕатык атыылыырга, көрдөрөргө улахан кыаҕы үөскэтэрин бэлиэтээн эттэ. Түмүккэ оскуолалар ырыа үҥкүү, күрэҕэр кытыннылар.
Ыһыах түмүгэр баһылык Анатолий Васильевич оскуолалар дириэктэрдэрин кытта төгүрүк остуол тула олорон баар кыһалҕалары туоратыы туһунан аһаҕастык кэпсэттилэр. Оннук, оскуола салайааччылара материальнай базаларын бөҕөргөтөр туруорсуулаахтар. Тоҕо диэтэххэ, оҕолору араас тиэхиньикэни: тыраахтары, массыынаны тилэри быһылаабыт, анал үөрэхтээх исписиэлиистэри иитэн таһаарар соруктаахтар. Итини таһынан агро-оскуола хаһаайыстыбатын чиҥэтэр санаалаахтар. Баһылык Анатолий Васильевич кинилэр санааларын истэн баран, «Билигин дойдуну кириисис кыһарыйар кэмигэр, биһиги тыа хаһаайыстыбатын, ол иһигэр агро-оскуолалары, кооператордары уо.д.а. өйөөтөхпүтүнэ уонна өрө туттахпытына, кириисис улахан охсуутун биллэ мөлтөтүөхпүт уонна тыа хаһаайыстыбатыгар 8лэлиир кыахтаах ыччаты иитэн таһаарыахпыт", - диэтэ.
Хас биирди агро-оскуола салайааччыта хаһаайыстыбатын үлэтин түмүгүн ааҕынан-суоттанан баран, отчуоттуур үлэни ыытара наадалааҕын баһылык ыйда. "Оччотугар биһиги бырабыыталыстыбаҕа туруорсарбытыгар чэпчэки буолуох этэ. Оттон ол үлэ өссө ордук өрө тахсыылаах буоларыгар олугу ууруоҕа», - диэн түмүктээтэ.
Комментарии
Авторизация на сайте через социальные сети