Бэс ыйын 19-21 күннэригэр биһиги республикабытыгар Россия Суруйааччыларын союһун көһө сылдьар пленума буолан ааспыта. Ити тэрээһинтэн Гаврил Андросов уонна Уйбаан Ойуур кылгас бэлиэтээһиннэрэ таҕыстылар.
«Чолбон» сурунаал Литература сылынан хас нүөмэр ахсын саха суруйааччыларын чулуу айымньыларын бэчээттиир.
«Кэнэҕэски ойохпор суоһурҕанан, үтүлүкпүн өттүкпэр сууралаамахтаан, илиибин сутуруктуу туттан баран, кырыктаахтык хааман «дыыдалдьыйан» иһэбин.
-- Бу үлүгэри!.. Кэбис, абааһы эмээхсин аайы доҕоргун атаҕастаама, доҕор… Оҕолоруҥ ытаһыахтара ээ… Ийэлэрин көмүскээннэр…» диэн тыллары хас биирдии саха ааҕааччыта ис-иһиттэн сылаанньыйа, манньыйа ааҕара буолуо. Бу нүөмэргэ саха тыллаах бары ытыктыыр улуу суруйааччыта Амма Аччыгыйа «Мотуо» кэпсээнэ бэчээттэннэ. Онон ааҕааччылар ити кими баҕарар уйадытар бэртээхэй кэпсээни ааҕан өссө төгүл уус-уран тыл алыбыгар уйдаран долгуйан, уйаҕас, курус санааларга куустаран ылыахтара.
Проза салаатыгар итини таһынан Дэхси «Уктаа Дьаарын»романын салгыыта, Уруул Уйбаан уонна Уйбаан Тарабыыкын кэпсээннэрэ, Серафим Ильин Виктор Курочкин «Сэриигэ сэрии курдук» диэн сэһэниттэн быһа тардан тылбааһа таҕыстылар.
«Поэзия» салааҕа Чуона Мэхээлэ «Айанньыт кубалар намтааннар» диэн поэмата, Мария Алексеева хоһоонноро бэчээттэннилэр. «Очерк уонна публицистика» салааҕа ааҕааччылар Дора Васильева Павел Федоров-Сомоҕо 60 сааһыгар аналлаах суруйуутун кытары билсиэхтэрэ.
Историяны уонна кыраайы үөрэтиини сэргээччилэр Гаврил Андросов «Павел Ксенофонтов Москватааҕы олоҕуттан чахчылар» диэн суруйуутун сэҥээриэхтэрэ. Улуу Кыайыы 70 сылыгар анаммыт рубрикаҕа И.М.Павлов «Курскайдааҕы тоҕой сэриитэ» уонна Н.Е.Попов «Герой куораттарынар айан» диэн суруйуулара бэчээттэннилэр.
Алааһым саҕатын таптааннар
Утуйа тураллар хатыҥнар,
Сылаас хаар саҕынньах биһигэр
Хатыҥнар сайыны түһүүллэр...
-- диэн тылларынан саҕаланар ырыаны саха дьоно бары даҕаны сүрдээҕин долгуйа истэр буолуохтаахтар. Ити ырыа тылларын биллэр поэт, Россия Суруйааччыларын сойууһун чилиэнэ, Амма улууһун Соморсун нэһилиэгин олохтооҕо Семен Капитонов суруйбута. Ол хоһооно аан бастаан “Хотугу сулус”, билиҥҥинэн “Чолбон” сурунаалга бэчээттэммитэ. Ону таба көрөн матыыбын билигин “Кэскил” хаһыакка үлэлиир суруналыыс Василий Иванов айбыта. Дьэ ити ырыа хайдах айыллыбытын туһунан мелодист Василий Иванов бэйэтин суруйуутун «Кэрэ эйгэтигэр» рубрикаҕа ааҕыаххыт. Оттон «Критика уонна библиография» салааҕа И.П.Григорьев Сергей Зверев ийэтинэн төрдүн-ууһун туһунан билсиэххит.
Бу күннэргэ «Чолбон» сурунаал атырдьах ыйынааҕы нүөмэрэ номнуо бэчээттэнэн эрэр. Үгэс курдук, атырдьах ыйынааҕы нүөмэр эдэр автордарга ананар. Онон кэлэр нүөмэргэ Родион Саввинов-Туустаах, Ангелина Васильева, Аграфена Кузьмина кэпсээннэрин, Оруннаах Номоҕон, Саргылаана Сандаар, Василий Тимофеев уонна Дайаана Макарова хоһооннорун ааҕыаххыт. Ону таһынан республикатааҕы лицей тэрийбит «Алтан сэргэ» литературнай куонкуруһун кыттыылааахтарын уус-уран суруйууга бастакы холонууларын билсиэххит.
Атырдьах ыйынааҕы нүөмэргэ итини таһынан Россия Суруйааччыларын союһун көһө сылдьар пленумугар аналлаах Сэмэн Тумат бэртээхэй бэлиэтээһинин, Гаврил Андросов тылбааһыгар Василий Попов диэн эдэр нуучча поэтын хоһооннорун билсиэххит. Сурунаал бу нүөмэригэр онтон да атын ааҕааччылары интэриэһиргэтэр матырыйааллар тахсыахтара.
Комментарии
Авторизация на сайте через социальные сети