Мария Кокорина Өлөөкө-Күөлгэ холкуостаахтар дьиэ кэргэттэригэр төрөөбүтэ. 20-тэн тахса сыл устата холкуос араас үлэлэригэр, ыанньыксытынан, кэлин биэдэмистибэннэйэ суох тэрилтэҕэ харабылынан үлэлээн пенсияҕа тахсыбыта.
«Мария Петровна Кокорина 100 сааһын былыл үөрүүлээхтик бэлиэтээбиппит. Тохсунньу томороон тымныыта, - 45 кыраадыс түһэн турдаҕына, Орто Халыма олохтоохторо аһаҕас халаан анныгар үҥкүүлээн Россия рекордтарын кинигэтигэр киллэриллибиттэрэ. Бу дискотекаҕа Мария Петровна саамай көхтөөх кыттыыны ылбыта», - диэн СИА-ҕа улуус дьаһалтатын пресс-сулууспатын салайааччыта Анна Попова кэпсээтэ.
Биэс оҕо истиҥ ийэтэ, элбэх сиэн, хос сиэн хос эбээтэ дьиэни-уоту көрүүнэн муҥурдаммат. Улууска ыытыллар бары тэрээһиннэргэ көхтөөхтүк кыттар, чөл олоҕу, омук үгэһин, «Хабылык», «Хаамыска» курдук төрүт оонньуулары киэҥник тарҕатар.
«Түгэн көһүннэ эрэ, Мария Петровнаттан маннык үйэ уһуннаах сааска тиийбит кистэлэҥин ыйыталаһааччыбыт. Онуоха кини: «Куруук үтүөҕэ, кэрэҕэ тардыһыахха, дьулуһуохха уонна онуоха эрэниэххэ наада. Киһи олоҕо сандалы ньуурун курдук көнө, эриэ-дэхси буолбат. Ыарахан кэм да ыктаҕына, санааны түһэрэр сатаммат», - диэн хардарааччы», - диир пресс-сулууспа салайааччыта.
Бүтүн Арассыыйа үрдүнэн ыытыллар хаамыы күнэ уопсайа 11 куораты хабыаҕа. Ол курдук, алтынньы 3 күнүгэр Петропавловскай-Камчатскайтан саҕаланан Орто Халымаҕа, Владивостокка, Дьокуускайга, Иркутскайга, Красноярскайга, Омскайга, Екатеринбург куоракка, Ижевскайга, Москваҕа, Калининградка чаас аайы салҕанан баран иһиэҕэ. Ити тэрээһин видео-трансляциятын телевизорынан көрүөххэ сөп.
Комментарии
Авторизация на сайте через социальные сети