Бэс ыйын 24-25 күннэригэр үрдүк тэрээһиннээхтик ыытыллыбыт Ыһыахха ыраахтан-чугастан кэлбит дьон тоҕуоруста, толору чороонноох кымыс иһилиннэ, дорҕооонноох тойук доллоһуйа кутулунна, ыраахха диэри оһуохай дуорайда, ырыа-үҥкүү көҕүлүттэн тутулунна.
Ыһыах уруккуттан олохтоммут үгэһинэн күндү ыалдьыттары көрсүүттэн саҕаланна. Икки бүк үбүлүөйдээх Ыһыахха СӨ бастакы президенэ Михаил Николаев, СӨ бырабыыталыстыбатын бэрэссэдээтэлин солбуйааччы Виктор Омуков, СӨ култуураҕа уонна духуобунай сайдыыга миниистирэ Владимир Тихонов, «Анаабыр алмаастара» хампаанньа генеральнай дириэктэрэ Матвей Евсеев, Ил Түмэн депутата, «Сахабазальт» собуот директора Егор Жирков, уопсастыбаннай, судаарыстыбаннай деятель Климент Иванов, С.А.Зверев-КыылУолун кыыһа Варвара Иванова-Зверева, Бүлүүчээнтэн 101 саастаах бэтэрээн СофронДанилов уо.д.а. ыалдьыттаатылар.
Айыыларга алгыс тылы СӨ култууратын үтүөлээх үлэһитэ И.Ф. Васильев эттэ. Алгыс тыл бүтээтин кытары ыас былыттарынан бүрүллээри куттаан турбут халлааммытыгар күммүт күлүмнүү оонньообутунан тахсан кэллэ. Дьон-сэргэ бэйэлэрэ да билбэттэринэн, биир тэҥҥэ суугунаһа түстүлэр, үөрбүт-көрбүт харахтарынан күнү уруйдуу көрүстүлэр.
Бу күн оһуохай чорооно өрөспүүбүлүкэ барыулуустарын кэрийэн, төрөөбүт түөлбэтигэр төннөн кэллэ. Чороону сунтаардар киэн туттар тойуксуттара, Туймаада ыһыаҕын дархан этээччитэ, Олоҥхо театрын артыыһа Дмитрий Иванов улуус аҕа баһылыгар Анатолий Григорьевка утары уунна.
Ыһыах үс чаас устата барбыт аһыллыытыгар улуус 16 нэһилиэгиттэн кэлбит үҥкүү ансаамбыллара Кыыл Уола туруорбут композицияларын өрө көтөҕүллэн туран толордулар. Тойуксут Егор Тимофеев үүтү үкчү Сергей Зверев сценаҕа кэтэр таҥаһын курдук көстүүмнээх кылыһахтаах куолаһынан туойан доллоһутта.
Сунтаар киэҥ нэлэмэн, күөх отунан чэчирии үүммүт Добун түһүлгэтигэр Сергей Зверев номох буолбут «Оһуор» үҥкүүтүн биир киһи курдук толоруу хас биирдии киһини долгутта. Улуус нэһилиэктэриттэн мустубут үҥкүүһүттэр уонна С.Зверев аатынан Үҥкүү театрын артыыстара (барыта 300-чэ киһи) чээлэй күөх хонууга оһуор ойуутун оонньоттулар, добун дорҕоону таһаардылар. Кыыл Уолун туһунан «Сүрэхпит иэйиитин эйиэхэ аныыбыт» кинигэ ааптара Захар Саввинов эппитинии, «кыргыттар нарын-намчы хамсаныыларыгар, уолаттар эрчимнээх ыстаныыларыгар, хорсун-хоодуот туттунууларыгар саха киһитин иэйиитэ, баҕа санаата, олоххо дьулуура, дьолго-сорго тардыһыыта бүтүннүү көстөн ааста» эбээт. Биир бэйэм санаабар, «Оһуор» ансаамбыл актыыбынай кыттыылааҕа Мария Кириллина түһүлгэ ортотугар тахсан, чэпчэки-чэпчэкитик үҥкүүлээн дайбыта үгүс көрөөччүнү долгутуулаах 1957 сылга, ол эбэтэр «Оһуор» үҥкүүтэ улуу Москубаҕа туруоруллубут күннэригэр төнүннэрэн ылбыт буолуохтаах.
Ыһыах дьонун сүргэтин көтөхпүт өссө биир сүдү түгэнинэн биир дойдулаахтара Матвей Евсеев Сунтаарга духуобунай-култуурунай киини тутууга үлэ саҕаланар буолбутун туһунан иһитиннэриитэ буолла. Матвей Евсеев сакаастаан оҥорторбут Зверев аатынан тускул тусаһатын бырайыага тыһыынчанан киһи мустубут түһүлгэтигэр сүрэхтэннэ.
Комментарии
Авторизация на сайте через социальные сети