Бу мунньахха иитэр-үөрэтэр тэрилтэ салайааччылара үлэлэрин билиһиннэрдилэр. Ол курдук, Күүкэй нэһилиэгин баһылыга Ф.С. Федоров этиитэ дьон болҕомтотун тарта. Кини этэринэн, учуутал кумааҕы үлэтэ, отчуота олус элбээн, программанан бэриллибит уруогун ыытарын таһынан оҕону көрөр-истэр, үөрэтэр бириэмэтэ тиийбэт буолан хаалла. Итиэннэ оскуола техническэй үлэһиттэрин хамнастарын үрдэтиэххэ наада диэтэ. Маны тэҥэ, 1 №-дээх оскуола дириэктэрин үөрэх чааһыгар солбуйааччы В.В. Николаева дакылаатыгар ФГОС таһымыгар эппиэттиир гына үөрэхтээһини тупсарар үлэ туһунан сиһилии кэпсээтэ. Оскуолаларга информационнай сайдыы баар буолуохтаах диэтэ. Ол эбэтэр интернетынан, Smart-технологиянан сөпкө туттуу, оскуолалар икки ардыларынан интернет-конференцияны тэрийии, оскуола сайтын арыйыы о.д.а. үлэлэр ыытыллыахтаахтар.
Быйыл Сунтаар улууһугар 58 эдэр специалист үлэлии кэлбит. Онон эдэр учууталлары, оҕо саадын иитээччилэрин, психолог-педагогтары көрүстүлэр, сэмэй бэлэхтэри туттардылар.
Эдэр учууталлар кэпсииллэр
Уарова Татьяна Николаевна, Аллыҥа орто оскуолатыгар алын кылаас салайааччыта:
- Сунтаар нэһилиэгиттэн төрүттээхпин, быйыл ХИФУ пединститутун бүтэрэн Аллыҥа оскуолатыгар ананан үлэлии кэллим. Олорор дьиэнэн хааччыйдылар. Ол эрээри дьиэ миэбэлэ суох буолан, кыра ыарахаттар үөскээтилэр. Кылааспар уопсайа 9 оҕолоохпун, коллектив үчүгэйдик көрүстэ.
Сантаева Виктория Анатольевна, Уһун Күөллээҕи оҕо саадын иитээччитэ:
- Бордоҥ нэһилиэгиттэн сылдьабын, үөрэхпин бүтэрэн ананан кэллим. 2 квартиралаах уопсайга дьиэ биэрдилэр. Миэбэлинэн көмөлөһөллөр. Бииргэ үлэлиир дьоммун кытта билистим, үчүгэйдик көрүстүлэр.
Федотова Мария Васильевна, Сунтаардааҕы «Чебурашка» оҕо саадын иитээччитэ:
- Бэйэм Үөһээ Бүлүү Боотулуу нэһилиэгиттэн сылдьабын. Кэргэним Сунтаар, манна дьиэлээхпит. Быйыл саҥа үлэлээн эрэбин. 2-с кыра бөлөххө 3 саастаах оҕолорго иитээччинэн үлэлиэлиэхтээхпин уонна 6 саастаах оҕолорго омук тылын үөрэтиэхтээхпин. Бэнидиэнньиктэн үлэбит саҕаланар, барыта этэҥҥэ буолуо диэн эрэнэбин.
Иванова Алина Алексеевна, Кэппэндээйи орто оскуолатын математикаҕа учуутала:
- Быйыл ХИФУ математика уонна информатика институтун бүтэрэн дойдубар Кэппэндээйигэ үлэлии кэллим. 9-11 кылаастарга матема-тиканы үөрэтиэхтээхпин. Выпускниктары математика эксээмэнигэр бэлэмниир сыал-сорук турар. Оҕолор эдэр учуутал диэн «сэнээбэккэ» киһи этэрин истэллэр, сыһыаннара үчүгэй диэхпин баҕарабын.
Бабиченко Павел Алексеевич, Дьаархан орто оскуолатыгар информатика учуутала:
- Мин Нам улууһуттан кэллим. Дьокуускайга үлэ дьаарбаҥкатыгар сылдьан, учуутал миэстэтэ баарын билбитим. Кэргэним эмиэ Дьаархаҥҥа география учууталынан үлэлии киирдэ. Чааһынай дьиэ биэрдилэр, онон хата дьиэ боппуруоһа суох. Дьаархаҥҥа уопсайа 5 саҥа учуутал кэлбит, онон эдэр дьон элбэх. Оҕолор сыһыаннара олус үчүгэй, коллектив үчүгэйдик көрүстэ. Сунтаары наһаа сөбүлээтибит, хаһан да сылдьыбатах дойдубут буолан сэргээтибит.
Дьаарбаҥканы кэрийдэххэ
«Чебурашка» оҕо саадын үлэһиттэрэ аныгылыы маһынан оҥоһуллубут оҕо өйүн сайыннарар оонньуурдарын көрдөрөллөр.
«Сардаана» оҕо саада. Массажка аналлаах ат сиэлинэн, өрүс таастарынан, туораахтарынан оҥоһуллубут ыллык.
«Сулусчаан» оҕо саадын иитиллээччилэрэ сбербанк үлэһитэ, быраас, иистэнээччи, эбэтэр парикмахер буолар кыахтаах эбиттэр. Бу дьааһыктар истэригэр сбербанк, быраас үлэһиттэрэ туттар маллара, парикмахер кыптыыйа, фена о.д.а. мал бааллар.
Уһун-Күөл агропромышленнай оскуола кабачогунан, моркуобунан, оҕурсунан уо.д.а. оҕуруот астарынан оҥоһуктара .
Комментарии
Авторизация на сайте через социальные сети