Былырыын 12 үлэ кэлэктиибин салайааччылара Улуу Кыайыы 70 сылынан уонна Ньурба куораты тупсарыы сыла биллэриллибитинэн сибээстээн, 70 үтүө дьыаланы оҥорорго ыҥырыы таһаарбыттара. Үгүс тэрилтэ салайааччыта ыҥырыыны ылынан тэтимнээх үлэҕэ туруммута.
Ол курдук, ОДьКХ Ньурбатааҕы филиала уонна "Агроснаб" кэпирэтиип кыттыһан "Трактор" монумены көһөрөн, Убайааҥҥа "Механизатордар сквердэрин" тутарга сорук туруоруммуттара. "Сити-киин" эргиэн дьиэтэ Степан Васильев аатынан уулуссаҕа автобус икки тохтобулун номнуо оҥорон туруорда. "Татыйаана" эргиэн дьиэтэ массыына турар сирдээх "Ыччат скверин" тутар. "Альфа" ХЭТ "Вертолекка" микро-оройуоҥҥа спортивнай былаһаакка тутуоҕа. «Стройтехнология», «Региональнай сайдыы» хааччахтаммыт эппиэтинэстээх тэрилтэлэр Авиапорт оройуонугар Нюрбинка үрэҕи туоруур муостаны чөлүгэр түһэриэхтэрэ. «Вилюйавтодор» акционернай тэрилтэ Үлэ албан аата скверин саҥардар былааннаах.
-- Ити курдук, төрөөбүт улуустарын киинэ - Ньурба куорат - чэчирии сайдарыгар Улуу Кыайыы 70 сылынан куорат бары бөдөҥ тэрилтэлэрэ бэйэлэрин кылааттарын киллэрэн, улуус бары нэһилиэктэригэр холобур көрдөрөллөр, -- диэн улуустааҕы муниципалитет пресс-сулууспатын салайааччыта Саргылаана Федорова иһитиннэрэр.
Комментарии
Авторизация на сайте через социальные сети