ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
2 декабря 2015, 15:18

Хонууга «Синяя птица» айар талааннаах оҕолор күрэстэрэ олохтоохтор сэҥээриилэрин ылла


Сэтинньи 26-29 күннэригэр Хонууга оройуоннааҕы «Осикат» Этно-культурнай кииҥҥэ «Синяя птица» диэн айар талааннаах оҕолор күрэстэрэ буолла. Манна Хонуу, Суон Тиит, Буор Сыһыы, Улахан Чыыстай, Соболоох, Чыбааҕылаах оҕолоро кэлэн көхтөөхтүк кытыннылар.

Ол курдук, сэтинньи 26 күнүгэр оскуолаҕа киириэн иннинээҕи саастаах оҕолор куоталастылар. Кырачааннар «Синяя птица»күрэскэ бу аан бастаан кыттыылара. Сэтинньи 27 күнүгэр ырыа-үҥкүү түһүлгэтигэр 1-5 кылаас үөрэнээччилэрэ таҕыстылар. Оттон сэтинньи 28 күнүгэр 6-11 кылаастар күөн көрүстүлэр. Оҕолор икки сүрүн жанрга ― ырыаҕа уонна үҥкүүгэ күрэс былдьастылар. Итини таһынан фольклорга, театральнайга, о.д.а жанрдарга ким бастыҥын быһаарыстылар.

Быйыл алтыс төгүлүн ыытыллар «Синяя птица» куонкуруһу Муома оройуонун баһылыгын солбуйааччы Х.П. Кривошапкина, Муома национальнай нэһилиэгин баһылыга А.В. Андреев, «Осикат» этно-культурнай киин директора Б.И. Заровняевбэйэлэрин эҕэрдэлэринэн арыйдылар.

Сылтан сыл көрдөххө, куоҥкурус таһыма үрдээн иһэр: оҕолор толорор маастарыстыбалара, сценическэй көстүүмнэрэ, уус-уран салайааччылар үөрэтэр, уһуйар ньымалара, о.д.а. тупсар, уларыйар, сайдар. Оҕолор репетуардара киэҥ. Норуот ырыаларыттан, үҥкүүлэриттэн саҕалаан омук ырыатыгар, үҥкүүтүгэр тиийэ толордулар. Саха ырыатын дьиэрэттилэр, эвен сээдьэтин эттилэр, нуучча ырыатын унаарыттылар. Хомуска оонньоон дьүрүһүттүлэр. Итини таһынан араас омуктар үҥкүүлэрин үҥкүүлээтилэр: эвеннии, сахалыы, нууччалыы, грузинныы, испанскайдыы, индиялыы, алтайдыы, аныгы, хотугу, о.д.а. Спортивнай үҥкүүлэри, художественнай гимнастиканы көрдөрдүлэр.

Олохтоох автордар Анатолий Старков “Маҥан хаар”, Андрей Старков «Көрбүтүм эйигин ыһыахха», Василий Слепцов «Күндү ийэбэр» ырыаларын көрөөччүлэр биһирии иһиттилэр.

Оҕолор толорууларын Дьокуускай куораттан кэлэ сылдьар культура үлэһиттэрин Россиятааҕы айар союзтарын Саха сиринээҕи отделениетын толорооччу директора, Культура уонна искусство колледжын преподавателэ, СР эдэр ыччат политикатыгар туйгуна А.Е. Черноградскай председателлээх дьүүллүүр сүбэ сыаналаата.

Сэтинньи 29 күнүгэр «Осикат» этно-культурнай кииҥҥэ үгүс киһи муһунна. Бу күн «Синяя птица» куонкурус бастыҥ нүөмэрдэринэн гала-концерт буолла. Үс күн устата сотовай сибээс көмөтүнэн көрөөччүлэргэ анаан ыытыллыбыт «Көрөөччүлэр биһирэбиллэрэ» түһүмэх түмүгэ таҕыста.

Дьэ, ол курдук, Синяя птица» күрэс саамай бочуоттаах бирииһин - гран-прини ыллылар: ырыаҕа ― Сайаана Слепцова («Девочка-снегурочка» ырыатын иһин, «Сказка» д/с), «Сибэкки» кыргыттар ансаамбыллара («Оҕо саас» ырыа, Индигир), трио Сардаана Старкова, Айыына Слепцова, Маша Слепцова («Сахам сирэ», искусство оскуолата), үҥкүүгэ ― «Кэскил» оҕо садынүҥкүүһүттэрэ ( «Ыһыахха» үҥкүү), «Кыымчаана» үҥкүү ансамбла (хотугу үҥкүү, Индигир), искусство оскуолатын Улахан Чыыстайдааҕы филиалын үҥкүүһүттэрин бөлөҕө («Духи моря», Улахан Чыыстай), фольклорга ― хомусчуттар ансамбллара («Дыхание Севера» дьүһүйүү), Күннэй Ефимова (норуот ырыата, Хонуу). Араас номинацияҕа тигистилэр: «Теремок» детсад иитээччилэрэ (фокус), Сайыына Тарабукина (Умсуур Удаҕан оруолун иһин, «Сказка» д/с), Яша Соломатин («Почемучка» ырыа, Муома начальнай оскуолата), Сахамин Ильин, Кирилл Слепцов (норуот ырыата, Муома орто оскуолата), кыргыттар квинтеттэрэ («Ийэ таптала» ырыа), Артем Атласов (Айыы Уолун репертуарыттан ырыа). Гран-прини ылбыт оҕолор уонна коллективтар музыкальнай центринэн наҕараадаланнылар.

Бастакы степеннээх лауреаттар: ырыаҕа ― уолаттар ансаамбыллара («Три пингвина» ырыа, «Кэнчээри» д/с), Муома начальнай оскуолатын 2 «а» кыл. үөрэнээччилэрэ («Ийэ күнэ» ырыа), Данил Атласов (Анатолий Старков репертуарыттан «Маҥан хаар» ырыа, Индигир), үҥкүүгэ ― «Осикат» д/с үҥкүүһүттэрэ («Озорные мышата» үҥкүү, Улахан Чыыстай), эдэр гимнасткалар бөлөхтөрө («Акробатика», Индигир), Соболоох оскуолатын үҥкүүһүттэрин бөлөҕө («Оһуор» үҥкүү).

photoByWidth&id=50942&width=1000

Иккис степеннээх лауреаттар: ырыаҕа ― «Күнчээн» д/с уолаттара («Кулунчук», Индигир), АйдынАтласов («Чуораанчык» эвеннии ырыа, Индигир), Уруйдаана Старкова, Вася Аммосов («Таптал ырыата», Орто Дойду), үҥкүүгэ ― «Осикат» д/с үҥкүүһүттэрэ (дүҥүрдээх үҥкүү, Улахан Чыыстай), Марфа Слепцова, Жора Уваровскай (хотугу үҥкүү, Соболоох), оҕо айар дьиэтин кыргыттара («Кыталык» үҥкүү, Хонуу), «Туундара үөрүүтэ» ансаамбыл (саха үҥкүүтэ, Хонуу), фольклорга ― Настя Мартынова (хомуска илии араас охсуулара), “Дэгэрэҥ” ансаамбыл (Муома орто оскуолата).

Үһүс степеннээх лауреаттар: ырыаҕа ― Эйнара Таркова ( ырыа, «Кэнчээри» д/с), Анжелика, Жанна Фазульяновалар (искусство оскуолата, Хонуу), Индигир уолаттара («Московский бит» ырыа), үҥкүүгэ ― “Теремок” д/с үҥкүүһүттэрин бөлөҕө (“Булчуттар” үҥкүү), Дуся Хабарова, Игорь Алексеев (“Пробуждение”, искусство оскуолата).

Дипломаннарынан буоллулар: 1 степень ― «Кэскил» д/с уолаттара ( “Мин булчуппун” ырыа, Суон Тиит), уолаттар ансамбллара (“Супермен”, Орто Дойду), Проня Скрыбыкин («Ырыабар үөрүүнү туойабын» ырыа, Индигир), искусство оскуолатын үҥкүүһүттэрэ («Тарантелла», Хонуу), 2 ст. ― Данил Корнилов («Гномики» ырыа, Муома начальнай оскуолата), Люда Симонова («Потанцуем, Джек» ырыа), 3 ст. ― Айлаана Слепцова («Сэбирдэх», Индигир), кыргыттар триолара («Хотугу дойдум», Орто Дойду).

Күрэс түмүгүнэн бастыҥ уус-уран салайааччы аатын хореограф Нина Геннадьевна Соркомова (Улахан Чыыстай) ылла. «Синяя птица» тэрийээччитэ Василий Аммосов туруорбут Кубогынан Данил Атласов наҕараадаланна. Бастыҥ айар үлэлээх оскуоланан Н.А. Брызгалов аатынан Индигир орто агро-оскуолата ааттанна (директор С.А. Сергеева, уус-уран салайааччы, СР культуратын туйгуна В.В. Слепцов). Ураты бириис көмөтүн, сүбэтин иһин «Осикат» этно-культурнай киин директора Б.И. Заровняевка туттарылынна. «Оҕо айар дьоҕурун сайыннарыыга кылаатын иһин» наҕарааданы Муома начальнай оскуолатын учуутала Л.Н. Федорова тутта.

Быйылгы «Синяя птица» хас даҕаны рекорду олохтоото. Ол курдук, манна 1050-тан тахса оҕо кыттыны ылла. Итини таһынан сотовай телефонунан «Көрөөччүлэр биһирэбиллэрэ» куоластааһыҥҥа 4563 киһи кытынна. Көрөөччүлэр биһирэбиллэрин ылбыт нүөмэрдэринэн буоллулар ― «Озорные мышата» («Осикат» д/с, Улахан Чыыстай), «Барбарики» (Муома начальнай оскуолата, Хонуу), «Индийскэй үҥкүү» (искусство оскуолатын Улахан Чыыстайдааҕы филиала).

Дьүүллүүр сүбэ күрэс таһыма таһыччы үрдүгүн бэлиэтээтэ.

photoByWidth&id=50941&width=1000

Оттон жюри председателэ Айдыс Черноградскай бу курдук эттэ: «Мин Муомаҕа бу аан бастаан кэлиим. Оҕо музыкальнай куоҥкуруһа элбэх, ол эрээри маннык киэҥ далааһыннаах, үрдүк таһымнаах күрэскэ аан бастаан сырыттым. Соһуйдум. Үс күн устата 40-нуу нүөмэри көрдүбүт. Оҕолор олус бэрээдэктээх эбиттэр, дорооболорун туппутунан сылдьаллар. Уус-уран коллективтар салайааччыларын таһыма үрдүк. Үҥкүү коллективтарыттан Улахан Чыыстай бөлөҕүн биһирээтим. Бэртээхэй үҥкүүлэри бэлэмнээн аҕалбыттар. Ырыаҕа Индигир нэһилиэгиттэн Василий Васильевич Слепцов бэлэмнээбит ырыаларын сөбүлээтим».

Дьүүллүүр сүбэ уус-уран салайааччылартан Н.Г. Соркомова (Улахан Чыыстай), В.В. Слепцов (Индигир), кэргэннии Скоробогачтар, М.А. Старкова, А.И. Кравцов, С.В. Неустроева, А.А. Егоров (Хонуу), М.А. Афанасьева (Соболоох), о.д.а. үлэлэрин үрдүктүк сыаналаата. Куонкуруһу тэрийээччи, СР эдэр ыччат политикатыгар туйгуна В.В. Аммосов иилээн-саҕалаан ыытта. Киниэхэ «Осикат» этно-культурнай киинтэн Алексей Варламов, Василий Слепцов уонна Муома орто оскуолатыттан учууталлар Анна Слепцова, Елена Неустроева, Андрей Громов көмөлөстүлэр.

При частичном или полном использовании материалов гиперссылка на сайт ysia.ru обязательна.
Категория: Культура Просмотров: 787 Источник: ЯСИА Автор: Туйаара Слепцова Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ