Тоҕо диэтэххэ, Россия министиэристибэтэ бэйэбит саҥа объегы тута сатаабакка, ыарыһахтарбытын Хабаровскайга уонна Владивостокка ыытыахпытын сөбүн туһунан этэллэрэ. Кинилэр көрүүлэрэ өйдөнөр. Тоҕо диэтэххэ, Владивостокка сүҥкэн улахан ядернай киин тутулунна, иркутскайдар эмиэ тута сылдьаллар, Хабаровскайга эмиэ искэни эмтиир улахан киин үлэлиир. Төһө да Уһук Илиҥҥэ искэни эмтиир улахан объектар баалларын иһин, биһиэхэ бэйэбитигэр Киин баар буолуохтааҕын улахан сыранан дакаастаатыбыт.
Россия доруобуйа харыстабылын министиэристибэтэ Саха сиригэр Онкология киинин тутууну федеральнай бырагыраамаҕа киллэрэргэ сөбүлэҥин биэрдэ.
Онон билигин иккис түһүмэхпитигэр – бырайыактааһыҥҥа киирдибит. Бу күннэргэ радиология комплексын бырайыагар куонкурус биллэриэхпит. Сыл бүтүөр диэри сытар балыыһа бырайыагар куонкурус буолуоҕа.
Тутууну үс комплекска араардыбыт. Бастакы комплекс – поликлиникалаах уонна радиология отделениелаах балыыһа, иккиһэ – пэт-киин (позиционнай-эмиссионнай томография киинэ), үсүһэ – гостиница. Бастакы комплекска өрөспүүбүлүкэ бюджетыттан 2 млрд 500 мөл солкуобай бэриллэр. Тиийбэт харчыбытын федеральнай бюджеттан ылыахтаахпыт. Иккис объегы судаарыстыбаннай-чааһынай бииргэ үлэлээһин ньыматынан тутуохпут. Реестрдэр бааллар. Пэт-киини тоҕо реестрдэринэн туттарабыт диир буоллахха, билигин аан дойду үрдүнэн пэт-кииннэри чааһынайдар туталлар. Судаарыстыба өҥөтүн эрэ атыылаһар. Онтон гостиницаҕа ыарахан ыарыһахтарга паллиативнай куойкалар баар буолуохтара.
Онкология киинэ Петр Алексеев аатынан уулуссаҕа оҕо сэллигин санаторий ын оннугар тутуллуоҕа. Уопсайынан, ити оройуон биир стилинэн тутуллубут медицинскэй кыбартаал буоларын былаанныыбыт.
Биллэрин курдук, Россияҕа эмтиир тэрилтэлэри оптимизациялааһын күүскэ бара турар. Ол гынан баран, биһиги бэйэбит усулуобуйабытын, климаммытын учуоттаан, Россия таһымыгар туруорсабыт. Соторутааҕыта СӨ Ил Дархана Егор Борисов РФ доруобуйа харыстабылын миниистирэ Вероника Скворцоваҕа киирэн уһук сытар нэһилиэктэргэ балыыһалары саппакка, төттөрүтүн тутуу ыытылларын туһунан иһитиннэрбитэ.
Комментарии
Авторизация на сайте через социальные сети