Бу иннинэ Америка киинэ артыыһа Стивен Сигал: «Мин бэйэбин нууччабын дэниэхпин сөп. Россияны таптыыбын, онон киэн туттабын. Россияҕа мин элбэх доҕоттордоохпун. Кинилэрдиин истиҥ сыһыанннаахпын, бизнескэ бииргэ үлэлэһэбит», - диэн дойду сонуну киэҥник тарҕатар средстволарыгар билинэн турар.
Сигал бэйэтэ эппитинэн, кини аҕатынан эһэтэ Россияттан төрүттээх эбит, ХХ үйэ бастакы аҥарыгар АХШ-гар тиийэн олохсуйбут. Сигал оҕо сырыттаҕына киниэхэ эһэҥ «монгол» этэ дииллэрэ үһү. Ол эрээри кини ким буолара — монгол, бүрээт, калмык - чопчу биллибэт. Тоҕо диэтэргит, «ону чахчы билэр дьон билигин суохтар». Сигал өйдүүрүнэн, кини эһэтин, дьиэ кэргэнин хаартыскаларыгар кыараҕас харахтаах дьон бааллара үһү.
Бэйэтин төрүттэрин көрдөөн кини Казахстаны, Калмыкияны, Тываны кэрийбит. Бу билигин Саха сиригэр кэлбит. Бу туһунан СИА-ҕа маны чахчы билэр киһи иһитиннэрдэ.
Онон артыыс Мииринэй куоракка эрдэттэн былааннаммыт көсүһүүлэр, тэрээһиннэр кэннилэриттэн кинини саха дэриэбинэтигэр илдьэллэригэр көрдөспүт. Арыылаах сэлиэнньэтигэр Голливуд артыыһыгар саха үгэстэрин, сиэрин-туомун көрдөрбүттэр, олоҕун-дьаһаҕын билиһиннэрбиттэр, саха норуотун историятын кэпсээбиттэр. Ыалдьыты кымыһынан айах туппуттар, оһуохай үҥкүүлээбит. Онтон сүрдээҕин астыммыт.
Арыылаахха баар Аҕа дойду Улуу сэриитигэр өлбүттэр монуменнарыгар тыыннаах сибэкки дьөрбөтүн уурбут.
Салгыы Стивен Сигал Саха сиригэр биир бастыҥынан биллэр «АЛРОСА» АК «Орленок» оҕо лааҕырыгар ыалдьыттаата. Оҕолору кытта көрсөн спордунан дьарыктаныы туһатын, төрөппүттэргэ, аҕа көлүөнэҕэ ытыктабыллаахтык сыһыаннаһыы суолтатын туһунан сэһэргээтэ. Көрсүһүү бэлиэтигэр оҕолор Сигалга моонньугар пионер кыһыл хаалтыһын баайдылар.
Атырдьах ыйын 7 күнүгэр Стивен Сигал анал рейсинэн Удачнай куоракка тиийэн? онно баар хайаны байытар комбинат үлэтин-хамнаһын кытта билсиэҕэ. Бэнидиэнньиккэ, атырдьах ыйын 10 күнүгэр, кини Москваҕа көтүөҕэ.
Комментарии
Авторизация на сайте через социальные сети