Мунньаҕы кылгас киирии тылынан оройуон Сэбиэтин депутаттарын “Сугулаан” бэрэссэдээтэлэ Зоя Григорьева арыйда уонна тылы “Анаабыр алмаастара” хампаанньа айылҕа харыстабылыгар уонна сир сыһыаннаһыыларыгар сулууспатын салайааччы Сидор Захаровка биэрдэ. Кини РФ Сокуонугар сөп түбэһиннэрэн хас биирдии сир баайын хостооччу үлэлиэхтээх сиригэр анал экспертизаны ыытыахтааҕын билиһиннэрдэ.
“Анаабыр алмаастара” хампаанньа Өлөөҥҥө алмааһы хостооһуҥҥа бэлэмнэнэринэн, экспертизаны оҥорууга ыыппыт куонкуруһугар кыайыылааҕынан Москва куораттааҕы Экологическай аудиты уонна консалтины тэрийэр киин кыайыылаах тахсан Өлөөн оройуонугар үлэлии кэлбитин иһитиннэрдэ.
Оробуочай бөлөх салайааччыта, Экологическай аудиты уонна консалтины тэрийэр киин генеральнай директора Иван Потравнай кылгастык салайар тэрилтэтин үлэтин сырдатта, үлэтигэр үрдүк квалификациялаах, киэҥ билиилээх, уопуттаах специалистар кыттыыны ылалларын эттэ.
Кинилэр сүрүн соруктарынан оройуон сиригэр-уотугар сир баайын баһылааһын тулалыыр эйгэҕэ, хамныыр харамайга, киһиэхэ-сүөһүгэ оҥорор хоромньутун муҥутуурдук аччатар суоллары көрдөөһүн буоларын бэлиэтээтэ.
Онон сибээстээн оробуочай бөлөх сир баайын баһылааһын нэһилиэнньэ сүрүн дьарыгын харыстаан хаалларар, олохтоох норуот төрүт культуратын, олоҕун укулаатын учуоттаан ыытылларын курдук үлэ-хамнас тэриллиэхтээҕин ыйда. Ол иһин нэһилиэнньэни кытта көрсөн кэпсэтэр, нэһилиэнньэ санаатын истэр, олохтоох усулуобуйаны уонна үөскээбит балаһыанньаны толору билэ сатыыр баҕалаахтарын эттэ.
Мунньахха кыттыыны ылбыт оройуон тэрилтэлэрин салайааччылара этнологическай экспертизаны бэлэмниир оробуочай бөлөх учуонайдарыгар боппуруостары биэрдилэр, кэккэ этиилэри оҥордулар.
Ол курдук оройуоннааҕы аптека салайааччыта Айталина Степанова этнологическай экспертиза түмүгэ төһө кэминэн биллиэҕин ыйыталаста, үөрэх оройуоннааҕы салаатын салайааччы Мария Иванова экспертизаҕа түмүк оҥорууга нэһилиэнньэ доруобуйатын туругун туһунан чинчийии ыытыллара наадатын туруоруста.
“Дьэлиҥдэ” таба иитэр муниципальнай тэрилтэ директора Октябрина Иванова алмааһы хостооһун хотугу төрүт салаа сайдыытыгар охсуулааҕын, урукку өттүгэр үлэ барбыт сирдэригэр таба сиир ото уонна лабыктата үүммэтин бэлиэтээтэ. Онон инники өттүгэр саҥа технологияны туһанан алмаас хостооһуна айылҕаҕа хоромньуну оҥорботун курдук үлэни тэрийэргэ баҕа санаатын эттэ.
Оройуон кырдьаҕастарын сэбиэтин бэрэссэдээтэлэ Егор Николаев ыытыллар научнай-чинчийэр үлэ төһө кэмҥэ ыытылларын туоһуласта уонна хомуллубут матырыйаалларга олоҕуран ханнык бырагыраама оҥоһуллуоҕун билиһиннэрэргэ көрдөстө.
Ветеринарнай управление салайааччыта, оройуон Сэбиэтин депутата Анжела Николаева алмааһы хостооччулар уонна этнологическай экспертизаны оҥорор учуонайдар оройуон сиригэр-уотугар урукку өттүгэр хамныыр-харамайга кутталлаах ыарыылар турбут сирдэрин үөрэтэргэ үлэни тэрийэллэригэр сүбэ биэрдэ.
Оройуон кырдьаҕастарын Ытык сүбэтин “Осикта” бэрэссэдээтэлэ Николай Стручков этнологическай экспертизаны ыытааччылар Өлөөн сиригэр-уотугар Менделеев таблицатын бары элеменнэрэ баалларынан, үлэни-хамнаһы тэрийэллэригэр уонна түмүк оҥороллоругар ону учуоттуулларыгар баҕарда. “Анаабыр алмаастара” хампаанньаҕа биһиги баҕабыт диэн алмааһы хостооһуну “АЛРОСА” ААУо курдук сир аннынан хостооһуну баһылааһыҥҥа киирэргэ сүбэлиэ этибит, оччоҕуна сир баайыгар баар араас радиоактивнай элеменнэр салгыҥҥа, айылҕаҕа, ууга тарҕаныылара муҥутуурдук аҕыйыа этэ диэн этиилээх буолла.
Комментарии
Авторизация на сайте через социальные сети