Сарсыҥҥаттан, атырдьах ыйын 6 күнүттэн, чэппиэртэн, Болгария киин куоратыгар - Софияҕа боксаҕа Европа чемпионата саҕаланар. Бэҕэһээ дойду сүүмэрдэммит хамаандатын кылаабынай тренерэ Александр Лебзяк континент сүрүн күрэхтэһиитигэр кыттар хамаанда бүтэһиктээх састаабын билиһиннэрдэ.
Болгария рингэтигэр Россия чиэһин көмүскүөхтэрэ: 49 кг диэри ыйааһыҥҥа - Василий Егоров (Саха сирэ), 52 кг - Вячеслав Ташкараков (Хакасия-Новосибирскай), 56 киилэҕэ бэрэстэбиитэлбит суох, 60 кг - Адлан Абдурашидов (Чечня), 64 кг - Виталий Дунайцев (Белгородскай уобалас), 69 кг - Раджаб Бутаев (Ростов-Дагестан), 75 кг - Петр Хамуков (Санкт-Петербург), 81 кг - Никита Иванов (Московскай уобалас-Хабаровскай), 91 кг - Евгений Тищенко (Белгородскай уобалас), 91 кг үөһэ - Магомед Омаров (Дагестан).
Чемпионат атырдьах ыйын 15 күнүгэр диэри буолар. Континент сүрүн күрэхтэһиитигэр 10 ыйааһыҥҥа алта бастыҥ иһигэр киирбиттэр алтынньы 5-18 күннэригэр Катарга ыытыллар аан дойду чемпионатыгар кыттар быраабы ылыахтара. Оттон ол, 2016 сыллааҕы Олимпийскай оонньууларга лицензиялар оонньоноллорунан, сыл саамай эппиэттээх күрэхтэһиитинэн буолара саарбахтаммат.
Икки сыллааҕыта Минскэйгэ Россия боксердара уон кыһыл көмүс мэтээлтэн биэһин ылан, хамаанданан түмүккэ бастакы миэстэҕэ тахсыбыттара. Кылаабынай тренер эппитинэн, быйыл эмиэ ону хатылыыр сорук туруоруллар.
- Бу күрэхтэһиигэ сыалбыт диэн — уон боксербут тутуспутунан аан дойду чемпионатыгар кыттар путевканы ылыытын ситиһии буолар, - диэн Лябзяк Софияҕа көтөөрү туран эттэ.
Комментарии
Авторизация на сайте через социальные сети