ЯСИА12+ СахаМедиа

Сюжеты

Главное Политика Экономика Общество Территория Инвестник Происшествия Культура Спорт Природа Жизнь Подробно Не факт
22 июня 2015, 09:42

Cахалартан бастакы Сэбиэскэй Сойуус Геройа Федор Поповка анаммыт пааматынньык Аллараа Бэстээххэ аһылынна


Улуу Кыайыы 70 сылын өрөгөйдөөх үбүлүөйүн бэлиэтээһиҥҥэ Мэҥэ-Хаҥалас улууһун киинигэр - Аллараа Бэстээххэ мемориальнай комплекс аһыллыбыта. Комплекс турар сирэ историяны кытта быһаччы ситимнээх. Аҕа дойду Улуу сэриитэ саҕаланыаҕыттан илин эҥэр биэс оройуонуттан 13 тыһ. тахса киһи Ийэ дойдутун көмүскүү бу манан – Ытык Аартыгынан ыраах айаҥҥа аттаммыта. Күөгэйэр күнүгэр сылдьар, эдэр-сэнэх эр дьонтон үгүстэрэ дойдуларыгар эргиллибэтэхтэрэ, сэрии толоонугар букатыннаахтык хаалбыттара. Кинилэр ортолоругар Мэҥэ-Хаҥалас Сыымаҕын бастыҥ ыччата Федор Попов баара.

photoByWidth&id=37418&width=1000

ФедорПопов Днепр тымныы уутугар эдэр олоҕун толук биэрэн көрдөрбүт хорсун быһыытын норуоппут ырыаҕа ыллаан, хоһооҥҥо хоһуйан уос номоҕо оҥостубута. Бастакы Геройбут сырдык мөссүөнэ аны үтүө өйдөбүнньүк буолан үйэтитиллэр кыахтанна. Бэс ыйын 19 күнүгэр Аллараа Бэстээххэ баар Кыайыы мемориальнай комплексыгар сахалартан бастакы Сэбиэскэй Сойуус Геройа ФедорКузьмичПоповка аналлаах пааматынньык туруорулунна. Бу үлэни Мэҥэ сирин талааннара – Россия Архитектордарын сойууһун чилиэнэ ЮрийЛукин уонна Санкт-Петербурга олорор скульптор ПавелЧампин бырайыактаан оҥорбуттарын Санкт-Петербург куоракка боруонсаттан куппуттар. 

photoByWidth&id=37427&width=1000

photoByWidth&id=37419&width=1000

Герой Федор Попов пааматынньыгын аһыллыытын үөрүүлээх сиэригэр-туомугар ытык бэтэрээннэр, ыраахтан-чугастан кэлбит ыалдьыттар, ыаллыы улуус бэрэстэбиитэллэрэ сырыттылар. Манна Саха Республикатын Государственнай Мунньаҕын (Ил Тумэн) аатыттан тутууга, олох-дьаһах коммунальнай хаһаайыстыбатыгар сис кэмитиэтин бэрэссэдээтэлэ Александр Романов, дьиэ кэргэҥҥэ, оҕо аймахха, ыччакка, физическэй культураҕа уонна спортка сис кэмитиэтин бэрэссэдээтэлэ Юрий Баишев, бюджекка, үпкэ, нолуок уонна сыана политикатыгар, бас билии, приватизация боппуруостарыгар сис кэмитиэтин бэрэссэдээтэлэ Юрий Николаев кытыннылар.

photoByWidth&id=37421&width=1000

Мустубут дьон иннигэр эҕэрдэ тылы этэригэр Мэҥэ-Хаҥалас улууһун баһылыга Николай Старостин мэҥэ өйдөбүнньүгү туруорууга бэтэрээннэр, улуус олохтоохторун, предпринимателлэр, “Победа” ГУ салалта кылааттарын бэлиэтээтэ. Бырайыагы оҥорбут, олоххо киллэрбит бэдэрээтчиттэргэ, скульптордарга махталын биллэрдэ. Кэлэр өттүгэр мемориальнай комплексы салгыы тупсаран, Ытык аартыкка ыччат дьон, оҕо аймах сөбүлээн сылдьар, аҕа көлүөнэҕэ сүгүрүйэр миэстэлэригэр кубулуйуоҕун эттэ. 

Республика салалтатын аатыттан СӨ Ил Дарханын уонна Правительство дьаһалтатын салайааччы Юрий Куприянов эҕэрдэлииригэр Ийэ дойдуларын дьиҥнээх патриоттара – саха буойуттарын туһунан сырдык өйдөбүл, кэриэстэбил уонна сүгүрүйүү бу маннык ытык миэстэттэн саҕыллан, үүнэр көлүөнэҕэ тиэрдиллиэхтээҕин туһунан эттэ. 

photoByWidth&id=37424&width=1000

Ил Түмэн дьиэ кэргэҥҥэ, оҕо аймахха, ыччакка, физическэй культураҕа, спортка сис кэмитиэтин бэрэссэдээтэлэ Юрий Баишев: “Саха норуотун уһулуччулаах уолугар, Аҕа дойду Улуу сэриитигэр саха бастакы Геройугар Федор Поповка үйэлээх өйдөбүнньүк туруоруллубута дириҥ суолталаах. Хорсун буойун Федор Попов холобуругар иитиллэн, биһиги оҕолорбут, ыччат дьоммут тапталлаах Ийэ дойдуларыгар, төрөөбүт республикаларыгар патриоттуу санаалара күүһүрэн иһиэҕэр эрэнэбит. Ытыктабыллаах бэтэрээннэр, оччотооҕу кэм тыыннаах туоһулара эһиги баар буолаҥҥыт көлүөнэлэр ситимнэрэ барар, оҕолорбут эр санааланыы, Аҕа дойдуну көмүскээһин өйдөбүллэригэр эһигиттэн үөрэнэллэр. Онон, ытык дьоммут, чэгиэнник сылдьан биһиги ортобутугар уһуннук олоруҥ”, -- диэн баҕа санааны эттэ.

Үөрүүлээх тэрээһиҥҥэ Аллараа Бэстээххэ “Факел” байыаннай-патриотическай лааҕыр оҕолоро көхтөөхтүк кыттаннар, миэстэтигэр бу хайысхаҕа утумнаах үлэ ыытылларын кэрэһилээтилэр.

photoByWidth&id=37425&width=1000

 

При частичном или полном использовании материалов гиперссылка на сайт ysia.ru обязательна.
Категория: Общество Просмотров: 925 Источник: ЯСИА Автор: Ил Тумэн пресс-сулууспата Подписаться на обновления

Комментарии

Вы не можете оставить комментарий, пока не войдете на сайт. Вход / Регистрация

Авторизация на сайте через социальные сети

ЯСИА, Якутия, Саха Сирэ