– Надежда Григорьевна, үөрэммит идэҥ олох атын ээ. Онтон хайдах атыы-эргиэн эйгэтигэр көстүҥ?
– 1995-2000 сылларга идэбинэн Сунтаардааҕы музыкальнай оскуолаҕа фортепиано кылааһыгар преподавателинэн үлэлии сылдьыбытым. Онтон Новосибирскай куоракка «Татыйыына» фирмаҕа экспедиторынан үлэлии барбытым. 2003 сыллаахха ИП регистрацияланан, предприниматель быһыытынан үлэбин саҕалаабытым. Бастаан рынокка икки атыылыыр сирдээҕим. Сыыйа кэҥээн, күн бүгүн 5 улахан маҕаһыыннаахпын уонна 1 ювелирнай салоннаахпын (Кутанаҕа, Элгээйигэ, Тойбохойго уонна Сунтаарга 2 маҕаһыын).
Нэһилиэнньэҕэ атыыга таһаарар табаарбын Новосибирскай, Дьокуускай, Екатеринбург, Мирнэй, Москва куораттартан, Китай, Европа дойдуларыттан аҕалабын. Биллэн турар, табаарым хаачыстыбатыгар улахан болҕомтобун уурабын. Дьон барыта үрдүк хамнастаах буолбат, ону эмиэ учуоттуубун.
– Хас үлэһиттээххиний?
– Барыта 60-ча үлэһиттээхпин. Үгүстэрэ эдэрдэр. Үлэһит тэрилтэтиттэн өйөбүллээх, тирэхтээх буоллаҕына, үлэтэ да таһаарыылаах буолара биллэр. Ол да курдук, үлэһиттэрбэр социальнай пакеттарын толору төлүүбүн, сыллааҕы уоппускаларын бары ылаллар. Үлэлиир усулуобуйаны эмиэ көрөбүн. Маҕаһыыннарым бары саҥалар.
Бэрээдэги, үлэ чааһын тутуһууну кытаанахтык ирдиибин. Хамнаһы үлэһиттэрим ыйга 2-тэ абаансанан ылаллар. Үлэлиир тэрилтэлэрин туһугар ис сүрэхтэриттэн кыһаллан үлэлээччилэргэ сыл түмүгүнэн харчынан бириэмийэ олохтуубун, сынньанар путевканан наҕараадалыыбын. Үлэһиттэрим оскуоланы бүтэрэр оҕолоругар грант олохтообуппут, кыһалҕалаахтар бириэмэтигэр харчынан көмө ылаллар. Онон үтүө үлэһиттэрдээх буолан, сайдан-кэҥээн иһэр буоллахпыт.
– Инникитин туох былааннардааххыный?
– Киһи ылыммыт соругун сайыннарар сыаллаах үлэлиир-хамсыыр. Мин бэйэ бородууксуйатын оҥорон таһаарыынан дьарыктаныахпын баҕарабын. Былыр-былыргыттан эргиэмсиктэр, атыыһыттар олохтоох нэһилиэнньэ олоҕо тупсарыгар, дойдулар икки ардыларыгар сыһыан олохтонуутугар оруоллара улахан. Ол сиэринэн билиҥҥи предприниматель бэйэтин туһугар эрэ буолбакка, тыа дьонун олохторо тупсарын туһугар үлэлиэхтээх-хамсыахтаах. Мин бэйэм сахалыы итэҕэли, сиэри-туому төһө сатыырбынан билэ-көрө, тутуһа сатыыбын. Үлэһиттэрим эмиэ сахалыы куттаах-сиэрдээх буолалларыгар баҕарабын.
– Надежда Григорьевна, сыралаах үлэҥ түмүктээх, таһаарыылаах буоллун. Дьонуҥ-сэргэҥ махталларын мэлдьи ыла сырыт.
Комментарии
Авторизация на сайте через социальные сети