Үбүлүөйдээх тэрээһиҥҥэ, хомуска анаммыт декадаҕа Нам улууһуттан СР культуратын үтүөлээх үлэһитэ, Нам улууһун ытык киһитэ Дмитрий Кривошапкин салайар "Дьүрүл" хомусчуттар народнай ансамбыллара, улууспутугар, республикаҕа эрэ буолбакка аан дойдуга биллэр мындыр ууспут, РСФСР үөрэҕириитин туйгуна, СР үтүөлээх учуутала Иннокентий Готовцев уо.д.а. кыттыыны ыллылар.
Декада кэмигэр тэриллибит пресс-конференцияҕа варганистар аан дойдутааҕы тэрилтэлэрин президенэ Франц Кумпл саха хомусчуттарын, хомуһу оҥорооччуларын үрдүктүк сыаналаата, сылтан сыл хомуска оонньооһун, хомуһу оҥоруу таһыма тупсан, сайдан иһэрин бэлиэтээтэ.
Бу күннэргэ Хомус музейыгар үс саҥа экспозиция аһылынна. Онтон биирдэстэригэр хомус уустара урут көрдөрүүгэ туруорбатах үлэлэрэ көрөөччү дьүүлүгэр таҕыста.
Франц Кумпл хомуһу сайыннарыыга, пропагандалааһыҥҥа сүҥкэн кылааты киллэрбит биэс чулуу киһибитигэр "Аан дойдуга хомус тэнийиитигэр, сайдыытыгар киллэрбит сүдү кылааттарын иһин" бочуоттаах бэлиэни туттарда. Наҕараадаламмыттар ортолоругар Нам улууһун бастыҥ ууһа Иннокентий Готовцев баар.
Иннокентий Никитич уонтан тахса тыһыынча хомуһу, ол иһигэр сиэдэрэй моһуоннаах, ураты ойуулаах-бичиктээх 480 хомуһу Сахатын сирин дьонугар-сэргэтигэр тиксэрбитин таһынан, омук дойдуларынан тарҕатан киһи аймахха улахан бэлэҕи оҥорбут ууһунан буолар. Онон биһиги -- сахалар, биһиги -- намнар, маннык чулуу уустаахпытынан, үтүө киһилээхпитинэн, сахалары аар-саарга аатырдыбыт убайдаахпытынан киэн туттабыт.
Бу күннэргэ биир дойдулаахпыт, устар ууну сомоҕолуур хомоҕой тыллаах хоһоонньуппут Юрий Потапов-Саргын биир дойдулааҕар И.Н. Готовцевка -- Хоһуун Ууска махтанарын, сүдү талааныгар сүгүрүйэрин биллэрэн "Кубалаах хомус" диэн хоһоонун анаата.
Комментарии
Авторизация на сайте через социальные сети