Оҕолор аҕыйах сыл иһигэр ситиһиилэрэ да боччум: «Ороһуоспа сулустара-2014» диэн норуоттар икки ардыларынааҕы VI-с куонкурус-фестиваль I степеннээх лауреаттара, «Париж халлаанын анныгар-2014» норуоттар икки ардыларынааҕы куонкуруска Гран-при хаһаайынынан, I степеннээх лауреатынан буолбуттара.
Бу күннэргэ Кытайга буолбут куонкуруска кыттан эмиэ Гран-прини ылан үөрүүлэрэ муҥура суох. Кэпсииллэринэн, фестиваль-куонкурус үҥкүү, ырыа, инструментальнай музыка, художественнай гимнастика, муода театра, циркэ о.д.а. түһүмэхтэринэн ыытыллыбыт. Улахан түһүлгэҕэ Японияттан, Монголияттан, Таджикистантан о.д.а. дойдулартан барыта 360 күрэстэһээччи кыттыбыт.
Муода түһүмэҕэр кыттыбыт «Айар стиль» студия оҕолоро “Күн дьөһөгөй оҕото» диэн коллекцияларын көрдөрбүттэр. Кинилэр хас биирдии тахсыыларын көрөөччүлэр улаханнык кэрэхсээннэр дохсун ытыс тыаһынан арыаллаабыттар. Түмүккэ, дьүүллүүр сүбэ чилиэннэрэ куонкурустаһааччылар бары үрдүк бэлэмнээхтэрин, күрэстэһии сыллата сытыырхайан иһэрин бэлиэтээбиттэр. Саха сирин оҕолорун хайҕаабыттар, киһи болҕомтотун тардар ураты коллекцияны аҕалан көрдөрбүттэригэр махтаммыттар.
Анна уонна Семен Яковлевтар бу куонкуруска кыыстарын Наташаны тэрийэн ыыппыттар:
-- Наташа Тааттатааҕы лицей 5-с кылааһыгар үөрэнэр. Бу студияны бэйэтин баҕатынан талан дьарыктаммыта сыл буолла. Манна 20-тэн тахса оҕо сылдьар. Бары олус иллээхтэр. Төрөппүттэр сибээһи ыкса тутабыт, оҕолорбут тустарыгар кыһаллабыт. Бу куонкуруска бэлэмнэнэллэригэр таҥастарын-:саптарын тигиигэ, бэрийиигэ бары күүспүт кыайарынан көмөлөспүппүт. Үрдүкү кылаас кыргыттара таҥастарын бэйэлэрэ тикпиттэрэ. Онтон кыра кыргыттар таҥастарын төрөппүттэр тикпиппит, оҕолорбут илии-атах буолан көмөлөспүттэрэ. «Айар стиль» бу курдук барыбытын түмэр.
Яковлевтар бэлиэтииллэринэн, кыыстара манна уонна музыка оскуолатыгар үҥкүү кылааһыгар сылдьыаҕыттан туттара-хаптара таһыччы уларыйбыт, туохха барытыгар олус эппиэтинэстээхтик сыһыаннаһар буолбут. Бэл, улахан киһилии дуоспуруннанан, күннээҕи, нэдиэлэтээҕи бириэмэтин бэйэтэ аттарынарын, былаанныырын этэллэр.
Билигин төрөппүттэр оҕолоро Кытайтан кыайыы көтөллөөх үөрэн-көтөн кэлэллэрин долгуйа күүтэллэр.
Комментарии
Авторизация на сайте через социальные сети