Штаб үлэтин Күндээдэ орто оскуолатын учуутала, физика учууталларын улуустааҕы методическай холбоһуктарын салайааччы Кузьмина Анна Семеновна иилиир-саҕалыыр.
Анна Семеновна этэринэн, быйылгы выпускниктар Ньурбатааҕы "Абитуриент" штабка туттарбыт докумуоннарын үөрэх тэрилтэлэринэн наардаабыттар. Улуустан направлениелаах 14 оҕо туһааннаах үөрэхтэригэр докумуоннарын бары туттарбыттар.
Абитуриеннар ХИФУ-ка уонна орто анал үөрэх тэрилтэлэригэр туттарсаллар. Докумуоннары үөрэх тэрилтэлэригэр туттарыыга уустуктар син көстөллөр. Холобура, Дьокуускайдааҕы медицинскэй базовай колледжка быйыл нотариуһунан бигэргэтиллибит эрэ докумуоннары туталлар. Авиационнай колледж эмиэ туспа ирдэбиллээх, нарколог, психиатр ыспыраапкалара баар буолуохтаахтар.
Бу дьылтан үрдүк үөрэххэ туттарсар оҕо портфолиота учуоттанар балаһыанньата олохтоммута. Ол эрэн, маныаха чахчы улахан ситиһии болҕомтоҕо ылыллар эбит. Чуолаан, ХИФУ ыллахха, кыһыл көмүс мэтээллээх, ХИФУ бэйэтин олимпиадатыгар миэстэлэспит, итиэннэ “Кэскилгэ хардыы” НПК сорох хайысхаларыгар бастаабыт абитуриеннарга эрэ ситиһии бааллара учуоттанар. Оттон маннык оҕо тарбахха баттанар.
Билигин оҕолор "Абитуриент" штабка консультация, сүбэ-ама ыла үгүстүк кэлэллэр. Атырдьах ыйын ортотугар диэри штаб үлэһиттэрэ кинилэри көрсөн кэпсэтэргэ, көмөлөһөргө бэлэмнэр.
Комментарии
Авторизация на сайте через социальные сети