- Ыһыах тэрийэр хамыыһыйатын бэрэссэдээтэлэ, Ил Түмэн бэрэссэдээтэлин солбуйааччы Алексей Дьячковскай ураты ыһыах ыһыллыбытын, Чурапчы дьоно-сэргэтэ түмсүүлэрин, дьулуурдарын бэлиэтээтэ. Улуус баһылыга Андрей Ноговицын биир дойдулаахтарыгар махталын биллэрдэ уонна Чурапчыга ыытыллыбыт ыһыаҕы киртитэр информацияны олоҕо суоҕунан ааҕарын эттэ.
- Бу кэннэ үрдүк сыанаҕа икки күн устата барбыт күөн күрэстэр кыайыылаахтара наҕараадаланнылар. Ол курдук, оҕолорго олоҥхоҕо күөн күрэс чулуулара Дьокуускайтан Марк Данилов, Бүлүүттэн Миша Шамаев, Чурапчы Сылаҥыттан Маша Сивцева Париж куоракка сынньанан кэлэр путевканы туттулар. Олоҥхоҕо „Кылаан чыпчаал“ ытык аакка Амма улууһун ыччата Юрий Борисов тиксэн, ыһыах дьонун ортотугар массыына күлүүһүн тутта.
- Олоҥхо кыайыылаахтара - Үөһээ Бүлүүттэн Марфа Осипова, Чурапчы Чакырыттан Настя Алексеева, Үөһээ Бүлүүттэн Ньургуйаана Неряева эмиэ Парижка айанныыр үрдүк чиэскэ тигистилэр. Оһуохай тойон түһүлгэтин „Кылаан чыпчаал“ аатын хаһаайынынан Үөһээ Бүлүүттэн Егор Егоров буолан, „Синтай“ тыраахтар күлүүһүн тутта. „Тоҕус томтор оонньууларын“ кыайыылааҕа Уус-Алдантан Иван Белолюбскай „Нива“ массыынананан наҕараадаламмытын иһитиннэрдилэр.
- Бу кэннэ Олоҥхо ыһыаҕын ытык дуоҕатын туттарыы сиэрэ-туома ыытылынна. Улуус баһылыга А.Т.Ноговицын ытык дуоҕаны кэлэр сылга Олоҥхо ыһыаҕа ыһыллар Дьааҥы улууһун баһылыгар Виктор Павловка туттарда. Онон Олоҥхо бэлиэтэ хоту улуустарга айаннаата. Бу кэннэ хас биирдиилэрэ дириҥ сахалыы ис хоһоонноох үҥкүүлэрдээх „Күндүл“ (Дьокуускай), „Алаҕаркаана“ (Алаҕар), „Күн Өркөн“ (Дьокуускайдааҕы культура уонна искусство колледжа), „Күбэйэ“ (Сылаҥ), „Көлүкэчээн“ (Мугудай), „Ситим“ (ХИФУ) ансамбллар күүстэринэн тэриллибит кэнсиэринэн Олоҥхо ыһыаҕа түмүктэннэ.
При частичном или полном использовании материалов гиперссылка на сайт ysia.ru обязательна.
Комментарии
Авторизация на сайте через социальные сети